Yangi O‘zbekistonni barpo etishda ta’lim va fan sohalarini sifat jihatdan rivojlantirish borasida olib borilayotgan tub islohotlar natijasida ko‘plab yutuqlarga erishilmoqda. Jahondagi global o‘zgarishlar, raqamli va sun’iy intellekt texnologiyalari, keskin raqobat sharoitida barcha sohalar qatori ta’lim va fan, jumladan oliy ta’limdan keyingi ta’lim sohalarini doimiy ravishda takomillashtirib borishni taqozo etmoqda. Shunga ko‘ra maqsadli chora-tadbirlar tizimli tarzda amalga oshirilib kelinmoqda.
Sh.Ayupov tomonidan “Jadid” gazetasi va ommaviy axborot vositalarida ta’lim turlari, oliy ta’lim, pedagogika, oliy malakali ilmiy kadrlar tayyorlash (innovatsion rivojlanish agentligi), ilmiy darajali kadrlar attestatsiyasi,  tibbiyot va huquq sohalariga oid fikrlar bildirilgan.
U bir-birini inkor qiluvchi fikrlarni ham bildirmoqda, masalan:
2000-2016 yillarda ta’lim-fanga munosabatni u shunday tavsiflaydi: “Yaqin tarix yurtimizda fanga e’tibor susayib ketganiga guvohlik beradi. Ilm-fanga nisbatan 2000 yillarda boshlangan befarqlik 2016 yilga kelib Fanlar akademiyasini yopilish arafasiga keltirib qo‘ydi... Eng yomoni, ilmiy maktablar kelajagi xavf ostida qoldi: nuroniy olimlar oramizdan keta boshladi, o‘rta yoshlilar turg‘un holga tushib qoldi, yoshlar ilm yo‘lini chetlab o‘ta boshladi”. Shunday sharoitda o‘zi rahbarlik qilgan davrdagi (1997-2003 yy.) ishlarni “mezon” sifatida ko‘rsatmoqda !?
2016 yildan boshlangan islohotlar va ularning natijalari yuzasidan maqolasida ijobiy fikrlar bildirgan. Lekin negadir shu jarayonda amalga oshirilgan ishlar natijalari faqat muammo sifatida ko‘tarilgan. Ta’kidlash kerakki, Sh.Ayupov fikrlarida negadir ta’lim-fan sohalarini sifat jihatdan rivojlantirish bo‘yicha islohotlar natijalari e’tiborga olinmayotganday tuyulmoqda! 
Ko‘tarilgan fikrlar bo‘yicha taalluqligiga ko‘ra tegishli vazirliklar va idoralar o‘z munosabatini bildiradilar. Ushbuda ilmiy darajali kadrlar attestatsiyasiga oid fikrlar bo‘yicha munosabat - raddiya keltirilgan.

Bugungi kunda davlat va jamiyat boshqaruvida ochiqlik va shaffoflikni ta’minlash, axborot olish erkinligi hamda jamoatchilik nazoratiga ustuvor ahamiyat qaratilmoqda. 8 aprel kuni Oliy attestatsiya komissiyasida joriy yil I chorak yakuni bo‘yicha hisobot anjumani o‘tkazildi. 
Anjumanda ommaviy axborot vositalari xodimlari, doktorat va mustaqil ilmiy tadqiqotchilar, keng ilmiy jamoatchilik vakillari ishtirok etdi.

2 aprel kuni Oliy attestatsiya komissiyasi raisi A.T.Yusupov Buxoro viloyatida bo‘lib, oliy ta’lim tashkilotlarida ilmiy izlanishlar olib borayotgan yosh ilmiy tadqiqotchilar va ilmiy-pedagogik jamoalar bilan uchrashuv va sayyor qabullar o‘tkazdi. Uchrashuvlar dastlab Buxoro davlat universitetida Buxoro xalqaro universiteti va Osiyo xalqaro universitetlari ilmiy tadqiqotchilari, pedagogik jamoalari hamda kunning ikkinchi yarmida Buxoro davlat pedagogika institutida tashkil etildi.

Mamlakatimizda davlatimiz rahbarining tashabbusi bilan har  haftaning payshanba kuni “Yoshlar kuni” etib belgilanib, joylarda yoshlar bilan ochiq va yuzma-yuz muloqotlar tashkil etilishiga muhim e’tibor qaratilmoqda. Zero, samimiy va do‘stona uchrashuv va suhbatlar yoshlarda o‘ziga ishonch va g‘ururni uyg‘otishi bilan birga, ularni o‘ylantirayotgan masalalarga tez va to‘g‘ri echim topishda katta ahamiyat kasb etmoqda. 
Joriy yilning 26 mart kuni Oliy attestatsiya komissiyasi raisi A.T.Yusupov Qoraqalpog‘iston Respublikasi oliy ta’lim va ilmiy tadqiqot tashkilotlarida bo‘lib, ilmiy-pedagogik va olimlar jamoasi hamda yosh ilmiy tadqiqotchilar bilan uchrashuv va sayyor qabullar o‘tkazdi. Uchrashuvlar dastlab Qoraqalpoq davlat universiteti, Qoraqalpog‘iston qishloq xo‘jaligi va agrotexnologiyalar instituti hamda kunning ikkinchi yarmida Qoraqalpog‘iston tibbiyot instituti va Nukus davlat pedagogika instituti, undan so‘ng esa, Fanlar Akademiyasining Qoraqalpog‘iston Respublikasi bo‘limi, Tabiiy fanlar va Gumanitar fanlar ilmiy tadqiqot institutlarida tashkil etildi.

19 mart kuni OAK raisi A.T.Yusupov tomonidan Toshkent shahrida Milliy estrada san’ati institutining ilmiy-pedagogik jamoasi hamda yosh ilmiy tadqiqotchilari bilan uchrashuv va sayyor qabul o‘tkazildi.

Uchrashuvda oliy ta’lim tashkilotining 135 nafar ilmiy-pedagogik jamoasi, xususan 35 yoshgacha bo‘lgan 102 nafar yosh tadqiqotchi ishtirok etdi.
Ochiq va samimiy ruhda o‘tkazilgan tadbirda Yangi O‘zbekistonni barpo etishda ilm-fanning o‘rni, ilmiy-pedagogik kadrlar faoliyati va ilmiy-amaliy salohiyatining ahamiyati va bu borada davlatimiz tomonidan amalga oshirilayotgan islohotlar, ayniqsa yosh olimlarni, ayol-qizlarni har jihatdan qo‘llab-quvvatlash, munosib rag‘batlantirish borasidagi amliy ishlar xususida fikrlar bildirildi. Yuzma-yuz uchrashuvda yosh tadqiqotchilarning oliy malakali ilmiy va ilmiy pedagog kadrlar attestatsiyasiga doir 10 ta savoliga batafsil tushuntirishlar berildi va 1 nafar tadqiqotchining ilmiy faoliyati yuzasidan joyida namunaviy tarzda uslubiy yordam ko‘rsatildi.