Олий аттестация комиссиясида 25 март куни Ўзбекистон Либерал демократик партияси қошида ташкил этилган “Ёш олимлар лигаси” лойиҳаси иштирокчилари билан давра суҳбати ўтказилди.
Тадбир “Ўзбекистон – 2030” стратегияси асосида халқимизнинг эркин ва фаровон, Янги Ўзбекистонни барпо этиш бўйича хоҳиш-иродасини рўёбга чиқариш, ҳар бир фуқарога ўз салоҳиятини намоён этиши учун барча имкониятларни яратиш, соғлом, билимли ва маънавий баркамол авлодни тарбиялаш ҳамда адолат, қонун устуворлиги, хавфсизлик ва барқарорликни кафолатли таъминлаш юзасидан белгиланган бешта устувор йўналиш ва юз мақсадни қамраб олган чора-тадбирлар доирасида ташкил этилди.
Давра суҳбатида Янги Ўзбекистонда илм-фанни ривожлантириш, узлуксиз таълим тизимида ёш авлодни баркамол вояга етказиш, иқтидорларини намоён этишда амалга оширилаётган туб ислоҳотлар ҳамда илмий ва илмий-педагог кадрлар аттестацияси, соҳада шаффофлик ва холисликни таъминлаш, аттестация жараёнларини рақамлаштириш, коррупциявий ҳолатларга сабаб бўлувчи омилларни бартараф этиш борасида амалга оширилаётган долзарб вазифалар хусусида маълумот бериб ўтилди.
ОАК масъул мутахассислари томонидан “Олий малакали илмий ва илмий-педагог кадрлар аттестациясига оид норматив-ҳуқуқий ҳужжатлар”, “Олий малакали илмий ва илмий-педагог кадрлар аттестация натижалари”, “Олий малакали илмий ва илмий-педагог кадрлар аттестацияси жараёнини рақамлаштириш” мавзуларида амалий фаолият асосида умумий ахборот берилди.
2024 йил – “Ёшлар ва бизнесни қўллаб-қувватлаш йили” давомида “Ўзбекистон – 2030” стратегиясининг тегишли бандлари ижросини таъминлаш мақсадида O‘zLiDePнинг “Ёшлар қаноти” жамоатчилик Кенгаши билан ҳамкорликда ўтказилган давра суҳбатида “Ёш олимлар лигаси” аъзолари Олий аттестация комиссияси фаолиятига доир ўзларини қизиқтирган қўшимча саволларига ҳам атрофлича жавоб олди.
Давра суҳбати якунида ОАК масъуллари томонидан талаба ҳамда ёш олимларга келажакда мамлакатимиз тараққиёти, халқимиз фаровонлиги йўлида муносиб хизмат қилувчи рақобатбардош мутахассис-кадрлар бўлиб камол топишига ишонч билдирилиб, илмий-ижодий, интеллектуал фаолиятида муҳим бўлган бебаҳо илмий-адабий китоблар тўплами туҳфа этилди.
ОАК Ахборот хизмати
