Нарзуллаев Шоҳрух Нурали ўғлининг
фалсафа доктори (PhD) диссертацияси ҳимояси ҳақида эълон 

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): «Сочилувчан материалларнинг намлигини мониторинг қилувчи интеллектуал қурилма», 05.03.01 – Асбоблар. Ўлчаш ва назорат қилиш усуллари (техника фанлари).
Диссертация мавзуси рўйхатга олинган рақам: B2020.2.PhD/T1612
Илмий раҳбар: Улжаев Эркин, техника фанлари доктори, профессор.
Диссертация бажарилган муассаса номи: Тошкент давлат техника университети.
ИК фаолият кўрсатаётган муассасалар номи, ИК рақами: Тошкент давлат техника университети, DSc.03/30.12.2019.Т.03.02.
Расмий оппонентлар: Гулямов Шухрат Манапович, техника фанлари доктори, профессор; Саттаров Хуршид Абдишукурович, техника фанлари номзоди, доцент. 
Етакчи ташкилот: Тошкент кимё-технология институти.
Диссертация йўналиши: назарий ва амалий аҳамиятга молик.
II. Тадқиқотнинг мақсади: сочилувчан материалларнинг намлигини мониторинг қилувчи интеллектуал ўлчаш қурилмаси ва унинг алгоритмларини яратишдан иборат.
III. Тадқиқотнинг илмий янгилиги:
сочилувчан материалларнинг намлигини мониторинг қилиш ва ўлчаш учун сунъий нейрон тармоқлар асосида интеллектуал қурилманинг математик модели ишлаб чиқилган;
мураккаб поляризацион диэлектрикнинг эквивалент схемаси асосида диэлектрик йўқотиш тангенс бурчагининг кўп қатламли диэлектрик сингдирувчанликка боғлиқлигини ҳисобга олган ҳолда сиғимли ўзгарткич учун математик муносабат қурилган;
энг кичик квадратлар усули асосида сочилувчан материаллар намлигини мониторинг қилувчи интеллектуал қурилманинг ўлчаш хатоликларини камайтиришга олиб келувчи градуировкалаш ва ишлаш алгоритмлари ишлаб чиқилган;
ўлчаш қурилмаларининг ишлаш принципи ва ўлчаш методологияси асосида сочилувчан материалларнинг намлигини мониторинг қилувчи интеллектуал қурилманинг статик ва динамик характеристикаларини тадқиқ этишни соддалаштириш имкониятини берувчи схема ва усул ишлаб чиқилган;
сочилувчан материалларнинг намлигини мониторинг қилиш учун цилиндрсимон сиғим ўзгарткичлар асосида мавжуд аналогларидан: ўлчаш аниқлиги, ўлчаш вақтининг тезлиги, мобиллиги, энергия ва ресурс тежамкорлиги билан фарқ қиладиган интеллектуал ўлчаш қурилмаси яратилган.
IV. Тадқиқот натижаларининг жорий қилиниши.
Сочилувчан материалларнинг намлигини ўлчаш ва мониторинг қилиш учун интеллектуал қурилмани тадқиқ қилиш ва ишлаб чиқиш натижалари асосида:
сочилувчан материалларнинг намлигини мониторинг қилиш ва ўлчаш учун сунъий нейрон тармоқлар асосида интеллектуал қурилма «G’alla-Alteg» АЖда жорий этилган («Ўздонмаҳсулот» АКнинг 2022 йил 23 февралдаги 11-2-3/33-230 - сон маълумотномаси). Натижада, яратилган қурилма қабул қилинаётган ва узатилаётган донни ўлчашга тайёрлаш, қуритишдан олдин ва кейин уларни тарозида тортиш, махсус хоналардан фойдаланиш ва билвосита ўлчаш натижаларини ҳисоблаш ишларидан озод қилиш имконини берган;
мураккаб поляризацион диэлектрикнинг эквивалент схемаси асосида диэлектрик йўқотиш тангенс бурчагининг кўп қатламли диэлектрик сингдирувчанликка боғлиқлигини ҳисобга олган ҳолда қурилган сиғимли ўзгарткич учун математик муносабати «G’alla-Alteg» АЖда жорий этилган («Ўздонмаҳсулот» АКнинг 2022 йил 23 февралдаги 11-2-3/33-230 - сон маълумотномаси). Натижада, дон намлигини ўлчаш қурилмасининг аниқлигини ошириш (хатолик ±0,3-0,4%) имконини берган;
ўлчаш қурилмаларининг ишлаш принципи ва ўлчаш методологияси асосида сочилувчан материалларнинг намлигини мониторинг қилиш учун интеллектуал қурилманинг статик ва динамик характеристикаларини тадқиқ этишни соддалаштириш имкониятини берувчи схема ва усул «G’alla-Alteg» АЖда жорий қилинган («Ўздонмаҳсулот» АКнинг 2022 йил 23 февралдаги 11-2-3/33-230 - сон маълумотномаси). Бу ўлчаш натижасини 10-20 сек. оралиқда олиш имконини берган.