Жўраев Баҳромнинг
фалсафа доктори (PhD) диссертацияси ҳимояси ҳақида эълон
I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): «Касб-ҳунар коллежи ўқувчиларида юридик тушунчалар шаклланишининг психологик асослари», 19.00.06–Ёш ва педагогик психология. Ривожланиш психологияси (психология фанлари).
Диссертация мавзуси рўйхатга олинган рақам: B2017.1.PhD/Psi11.
Илмий раҳбар: Жабборов Азим Мейликулович, психология фанлари доктори, профессор.
Диссертация бажарилган муассаса номи: Қарши давлат университети.
ИК фаолият кўрсатаётган муассаса номи, ИК рақами: Ўзбекистон Миллий университети, DSc.27.06.2017.Psi.01.07.
Расмий оппонентлар: Ғозиев Эргаш Ғозиевич, психология фанлари доктори, профессор;Маматов Худоёр Тешаевич, юридик фанлар доктори.
Етакчи ташкилот: Тошкент давлат педагогика университети.
Диссертация йўналиши: назарий ва амалий аҳамиятга молик.
II. Тадқиқотнинг мақсади: касб-ҳунар коллежи ўқувчиларида юридик тушунчалар шаклланишининг психологик механизмларини такомиллаштиришдан иборат.
III. Тадқиқотнинг илмий янгилиги:
касб-ҳунар коллежи ўқувчиларида тушунчалар шаклланишининг педагогик-психологик диагностик тизими ўқитувчи билан ўқувчи фаолиятини баҳолаш, фанни ўзлаштиришга таъсир кўрсатувчи омилларнинг аҳамиятини баҳолаш методикаларини яратилиши ва татбиқ қилиниши асосида такомиллаштирилган;
касб-ҳунар коллежи ўқувчиларида юридик тушунчалар шаклланишининг когнитив, коммуникатив ва конатив хусусиятлари ҳамда ўқув-услубий компонентлари аниқланган;
ўқувчиларда юридик тушунчаларни шаклланиш механизмлари асаб тизимининг индивидуал-психологик хусусиятларига кўра аниқланган;
ўқувчиларда юридик тушунчалар шаклланишини самарали ташкил этиш бўйича психологик ривожлантириш дастури ишлаб чиқилган;
ўқувчиларда юридик тушунчаларни шаклланиш модели ишлаб чиқилган.
IV. Тадқиқот натижаларининг жорий қилиниши.
Касб-ҳунар коллежи ўқувчиларида юридик тушунчалар шаклланишининг психологик механизмларини такомиллаштириш бўйича олинган илмий натижалар асосида:
касб-ҳунар коллежи ўқувчиларида юридик тушунчалар шаклланишининг психологик хусусиятларини таҳлил қилувчи методикалардан Ўзбекистон Республикаси Вазирлар Маҳкамасининг 2016 йил 12 августдаги «Ота-онасининг қарамоғидан маҳрум бўлган болаларни ижтимоий қўллаб-қувватлаш тизимини такомиллаштириш тўғрисида»ги 263-сон қарори билан тасдиқланган «2016–2019 йилларда ота-онасининг қарамоғидан маҳрум бўлган болаларни ижтимоий қўллаб-қувватлаш тизимини такомиллаштириш дастури»да меъёрий-методик ҳужжатларни ишлаб чиқишда фойдаланилган (Республика болалар ижтимоий мослашув марказининг 2016 йил 22 сентябрдаги 06/512-сон маълумотномаси). Натижада ўқувчиларнинг ҳуқуқий тушунчаларнинг мазмун-моҳиятини тўлиқ ўзлаштириш имконини берган;
касб-ҳунар коллежи ўқувчиларида юридик тушунчалар шаклланишининг когнитив, коммуникатив ва конатив хусусиятлари ҳамда ўқув-услубий компонентларини аниқлаштиришга доир таклифлардан Ўзбекистон Республикаси Вазирлар Маҳкамасининг 2016 йил 25 июндаги 56-сон баёни билан тасдиқланган ташкилий-амалий, маънавий-маърифий тарғибот-ташвиқот ишлари дастурининг меъёрий-методик таъминотини ишлаб чиқишда фойдаланилган (Республика маънавият ва маърифат кенгаши Миллий ғоя ва мафкура илмий-амалий марказининг 2016 йил 10 октябридаги 259-сон маълумотномаси). Мазкур таклифлар асосида ўрта махсус, касб-ҳунар таълими муассасаларида ташкил этиладиган маънавий-маърифий тадбирлар тизими лойиҳалаштирилган;
ўқувчиларда юридик тушунчалар шаклланиши механизмларининг асаб тизими индивидуал-психологик хусусиятларини такомиллаштиришга доир таклифлардан Ўзбекистон Республикаси Вазирлар Маҳкамасининг 2016 йил 4 апрелдаги «Оила-маҳалла-таълим муассасаси ҳамкорлиги механизмини татбиқ этишнинг амалий жиҳатлари тўғрисида»ги 49-сон баёни ҳужжатларини ишлаб чиқишда фойдаланилган (Республика маънавият ва маърифат кенгаши Миллий ғоя ва мафкура илмий-амалий марказининг 2016 йил 10 октябридаги 259-сон маълумотномаси). Натижада ўқувчиларнинг ҳуқуқий саводхонлигини оширишга доир тренинглар мажмуи ишлаб чиқилган ва амалиётга татбиқ этилган;
ўқувчиларда юридик тушунчалар шаклланиш моделини такомиллаштиришга доир таклифлардан Республика болалар ижтимоий мослашув марказида амалга оширилган А-1-026 рақамли «Болаликни муҳофазалашда яқин катталар орқали ахборот хавфсизлигини таъминлашнинг ижтимоий-психологик йўллари» мавзусидаги илмий-амалий лойиҳанинг III бобини тайёрлашда фойдаланилган (Республика болалар ижтимоий мослашув марказининг 2016 йил 30 сентябрдаги 06/532-сон маълумотномаси). Тадқиқот натижалари болаларнинг ахборот-коммуникация соҳасига оид ҳуқуқий тушунчаларни ўзлаштириш даражаларини баҳолашга доир ижтимоий-психологик сўровномалар ишлаб чиқишга имкон яратган.
