Туксанов Алишер Искандаровичнинг
фалсафа доктори (PhD) диссертацияси ҳимояси ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): «Жигардан ташқари портал гипертензияси билан оғриган беморларни жарроҳлик усули билан даволашнинг тактик ва техник жиҳатларини такомиллаштириш», 14.00.27 – Хирургия (тиббиёт фанлари).
Диссертация мавзуси рўйхатга олинган рақам:№B2021.2.PhD/Tib1978.
Илмий раҳбар: Исмаилов Сайдимурад Ибрагимович, тиббиёт фанлари доктори.
Диссертация бажарилган муассаса номи: академик В.Воҳидов номидаги Республика ихтисослаштирилган хирургия илмий-амалий тиббиёт маркази.
ИК фаолият кўрсатаётган муассасаноми, ИК рақами: академик В.Воҳидов номидаги Республика ихтисослаштирилган хирургия илмий-амалий тиббиёт маркази Dsc.04/30.12.2019.Tib.49.01.
Расмий оппонентлар: Акилов Хабибулла Атауллаевич, тиббиёт фанлари доктори, профессор; Беркинов Улугбек Базарбаевич, тиббиёт фанлари доктори, профессор.
Етакчи ташкилот: Андижон давлат тиббиёт институти
Диссертация йўналиши: амалий аҳамиятга молик.
II. Тадқиқотнинг мақсади: геморрагик синдром профилактикасининг мақбул усулини танлашнинг тактик жиҳатларини такомиллаштириш орқали портал гипертензиянинг жигардан ташқари шакли бўлган беморларни хирургик даволаш натижаларини яхшилашдан иборат.
III. Тадқиқотнинг илмий янгилиги қуйидагилардан иборат:
портал гипертензиянинг жигардан ташқари тури шаклланишининг структуравий хусусиятларига, шунингдек, этиологик омиллар, жигар ости блокининг жойлашуви ва давомийлигига боғлиқ ҳолда портал тизимнинг гепатопетал гемодинамикаси ва ангиоархитектоникасидаги ўзига хос ўзгаришларга аниқлик киритилган;
портал тизимнинг мезентериал ёки талоқ томирлари томонидан декомпрессия учун маълум шароитлар мавжуд бўлганда, портал гипертензиянинг жигардан ташқари шаклида портотизимли шунтлаш қизилўнгач-ошқозондан қон кетиши профилактикасининг устувор усули эканлиги исботланган;
жигар ости блокининг тарқалиш даражасига кўра жигардан ташқари портал гипертензияни тизимлаштиришни ҳисобга олган ҳолда, декомпрессив, ажратувчи ва эндоскопик аралашувлардан кейинги геморрагик синдромнинг рецидивсиз кечиши давомийлигининг ва такрорий эпизодлари хавфининг клиник жиҳатлари аниқланган;
жигардан ташқари портал гипертензияси бўлган беморларда портал тизим асосий томирларининг анатомик хусусиятларини, коллатерал қон айланишини, маҳаллий ёки тизимли предикторларни, шунингдек, шунтлашнинг техник жиҳатларини ҳисобга олган ҳолда портотизим анастомози тромбозининг ривожланиш хавфини верификацияловчи патогномоник мезонлар аниқланган;
портал қон оқимининг жигар ости блоки бўлган беморларда шунтловчи аралашувларнинг декомпрессия даражасига ва рецидив геморрагик синдромли тромбоз хавфига турли хил омилли белгилар ва уларнинг ассоциациялари таъсирининг патогенетик жиҳатлари индивидуал ёки биргаликдаги прогностик аҳамиятини аниқлаш орқали очиб берилган;
портал генезли қон кетишини тўхтатиш ва олдини олиш учун тўлиқ интрамурал веноз транссекция ва ошқозонни алоҳида трансорган тикишни таъминлайдиган гастроэзофагеал коллекторни тўлиқ ажратиш амалиётининг лапароскопик амалга ошириш усули ишлаб чиқилган.
IV. Тадқиқот натижаларининг жорий қилиниши. Жигардан ташқари портал гипертензияда турли хил аралашувларнинг тактик ва техник жиҳатларини оптималлаштириш бўйича илмий тадқиқот натижалари асосида: 
“Қизилўнгач ва ошқозон веналарининг варикоз кенгайиши бўлган беморларда гастроэзофагеал веноз коллекторни лапароскопик ажратиш усули” такомиллаштирилган (Ихтиро учун патент IAP 065202, 30.06.2021). Таклиф этилган усул портал гипертензиянинг жигардан ташқари шакли бўлган беморларда портал генезли қон кетишларни профилактикаси учун оператив аралашувлар доирасини кенгайтиришга имкон берган;
жигардан ташқари портал гипертензия фонида қизилўнгач ва ошқозон варикоз кенгайган веналаридан қон кетишининг хирургик профилактика қилиш бўйича тадқиқотнинг илмий натижалари асосида ишлаб чиқилган «Жигардан ташқари портал гипертензия фонида қизилўнгач ва ошқозон варикоз кенгайган веналаридан қон кетишининг хирургик профилактика қилиш тактикасини танлаш алгоритми» номли услубий тавсиянома тасдиқланган (Соғлиқни сақлаш вазирлигининг 2022 йил 3 мартдаги 08-09/6817-сон маълумотномаси). Ишлаб чиқилган тавсиялар жигардан ташқари портал гипертензияда декомпрессив ва ажратувчи аралашувларни амалга оширишда тактик ёндашувларни оптималлаштириш, анастомоз тромбозини ва геморрагик синдромнинг қайталанишини камайтириш имконини берган;
олинган илмий натижалар соғлиқни сақлашнинг амалий фаолиятига, жумладан, Андижон давлат тиббиёт институти клиникасига, Республика шошилинч тиббиё ёрдам илмий маркази Навоий филиалига ва академик В.Вохидов номидаги Республика ихтисослаштирилган хирургия илмий-амалий тиббиёт марказига (Соғлиқни сақлаш вазирлигининг 2022 йил 3 мартдаги 08-09/6817-сон маълумотномаси) жорий этилган. Портал гипертензиянинг жигардан ташқари шакли бўлган беморларни хирургик даволашнинг тактик ва техник жиҳатларини такомиллаштириш декомпрессив, ажратувчи ва эндоскопик аралашувлардан сўнг геморрагик синдромнинг такрорий эпизодлари хавфини камайтиришга, портотизимли шунтлашда 82,4% ҳолларда ва гастроэзофагеал коллекторни тўлиқ ажратишда 64,9% ҳолларда муваффақиятли даволашга эришишга имкон берган.