Bugun mamlakatimizda amalga oshirilayotgan keng ko‘lamdagi demokratik islohotlar jahon hamjamiyati tomonidan e’tirof etilmoqda. Xususan, davlat hokimiyati va boshqaruvi organlari faoliyatining ochiqligini ta’minlash, fuqarolar uchun ijtimoiy ahamiyatga molik axborotlardan foydalanish uchun yaratilgan zarur sharoitlar o‘zining ijobiy bahosini topib ulgurdi desak, xato qilmaymiz. Buni Oliy attestatsiya komissiyasi faoliyati misolida ham ko‘rish va ishonch hosil qilish mumkin. Bu borada OAK “tezkor aloqa xizmati” faoliyatini alohida ta’kidlash kerak.
OAK veb-saytida tashkil qilingan tezkor aloqa xizmati orqali kelib tushgan savollar ishchi guruh tomonidan ko‘rib chiqilishi yo‘lga qo‘yilgan.
2021 yilda “tezkor aloqa xizmati” orqali 400 ga yaqin savol kelib tushib, ularga masalaning mohiyatidan kelib chiqqan holda tezkor javoblar berilishi tashkil qilindi. Savollar mohiyatiga ko‘ra, nizomlarga tushuntirish berish, xorijiy davlatlarda ilmiy daraja olganlik to‘g‘risidagi hujjatlarni tan olish, tegishli attestatsiya hujjatlarini rasmiylashtirish, malakaviy imtihonlar va ixtisosliklar kabi masalalar yuzasidan bo‘lgan. Xususan, oliy ta’limdan keyingi ta’limning bir pog‘onali tizimi joriy qilingan xorijiy davlatlarning xalqaro reytinglarda birinchi 300 ta o‘rindan birini egallagan oliy ta’lim tashkilotlari tomonidan berilgan falsafa doktori (PhD) yoki fan doktori (DSc) ilmiy darajasi to‘g‘risidagi hujjatlar mamlakatimizda fan doktori (DSc) sifatida to‘g‘ridan-to‘g‘ri tan olinishga oid ko‘plab savollar tushdi va ularga tegishli tushuntirishlar berildi.
“Tezkor aloqa xizmati” orqali kelib tushgan savollarga asoslangan holda joylarda ilmiy jamoatchilik bilan o‘tkaziladigan uchrashuvlarda ham tushuntirishlar berilishi yo‘lga qo‘yilgan. Masalan, 2021 yilda Qoraqalpog‘iston Respublikasi hamda Sirdaryo, Jizzax, Buxoro, Samarqand, Surxondaryo, Qashqadaryo, Andijon, Namangan, Farg‘ona, Toshkent viloyatlarida 71 ta uchrashuv tashkil etildi.
Ta’kidlash kerakki, “tezkor aloqa xizmati” orqali kelib tushgan savollar va takliflar attestatsiya jarayonini tashkil qilishda e’tiborga olinadi. Misol uchun, dissertatsiya mavzusini ro‘yxatdan o‘tkazish va “OAK Byulleteni”da chop etish, dissertatsiyalar asosiy ilmiy natijalarini chop etish tavsiya etilgan ilmiy nashrlar ro‘yxatini bekor qilish bo‘yicha takliflardan OAKning yangi nizomlari loyihasini tayyorlashda foydalanildi.
“Tezkor aloqa xizmati” orqali kelib tushgan eng ko‘p savol bo‘yicha OAK ishchi guruh tavsiyasiga asosan ilmiy darajalar beruvchi ilmiy kengashlar bilan maqsadli ishlash tadbirlarini tashkil etish yo‘lga qo‘yilgan.
Oliy attestatsiya komissiyasi tomonidan murojaatlarni o‘z muddatida va sifatli ko‘rib chiqish bo‘yicha amalga oshirilayotgan tadbirlar izchil davom ettiriladi.
OAK Axborot xizmati
