Xolboev Azamat G‘anisherovichning
falsafa doktori (PhD) dissertatsiyasi himoyasi haqida e’lon

I. Umumiy ma’lumotlar.
Dissertatsiya mavzusi, ixtisoslik shifri (ilmiy daraja beriladigan fan tarmog‘i nomi): «Muntazam ko‘pyoqlikning bir o‘lchamli sinchida ziddiyatli boshqaruvga oid kombinatorik masala», 01.01.02 – Differensial tenglamalar va matematik fizika (fizika-matematika fanlari).
Dissertatsiya mavzusi ro‘yxatga olingan raqam: B2019.2.PhD/FM339
Dissertatsiya bajarilgan muassasa nomi: V.I.Romanovskiy nomidagi Matematika instituti.
IK faoliyat ko‘rsatayotgan muassasa nomi, IK raqami: Matematika instituti huzuridagi DSc.02/30.12.2019.FM.86.01 raqamli Ilmiy kengash.
Ilmiy rahbarlar: Azamov Abdulla, fizika-matematika fanlari doktori, akademik.
Rasmiy opponentlar: Eshmatov Farxod Xasanovich, fizika-matematika fanlari doktori, katta ilmiy xodim; Axmedov Odiljon Saxibjonovich, fizika-matematika fanlari nomzodi, katta ilmiy xodim.
Yetakchi tashkilot: Samarqand davlat universiteti.
Dissertatsiya yo‘nalishi: nazariy ahamiyatga molik.
II. Tadqiqotning maqsadi Evklid fazosidagi muntazam ko‘pyoqliklarning qirralaridan iborat graf bo‘ylab harakatlanuvchi nuqtalar – quvuvchilar jamoasi va qochuvchi ishtirokidagi quvish-qochish o‘yinlari uchun sifat masalasini echishdan iborat.
III. Tadqiqotning ilmiy yangiligi:
graflardagi quvish-qochish masalasini Dj. fon Neyman normal formasiga keltiruvchi maxsus strategiyalar sinfi kiritilgan;
to‘rt o‘lchamli evklid fazoda muntazam ko‘pyoqliklarning qirralaridan iborat graflarda geometrik strukturasini potensial funksiya yordamida tasnifi ishlab chiqilgan;
ixtiyoriy o‘lchamli evklid fazosidagi simpleks, kokub, va kub qirralaridan iborat graflarda, hamda uch va to‘rt o‘lchamli evklid fazosidagi muntazam jismlar qirralaridan iborat graflardagi quvish-qochish o‘yinida quvuvchi nuqtalarning optimal soni topilgan;
uch o‘lchamli fazodagi muntazam ko‘pyoqliklarning bir o‘lchamli sinchida sekin quvuvchilar ishtirokidagi quvish-qochish o‘yinidagi sifat masalasi echilgan.
IV. Tadqiqot natijalarining joriy qilinishi. Muntazam ko‘pyoqlikning bir o‘lchamli sinchida ziddiyatli boshqaruvga oid kombinatorik masala bo‘yicha olingan natijalar asosida:
to‘rt va undan yuqori o‘lchamli fazoda simpleks, kokub va kub qirralaridan iborat grafdagi quvish-qochish o‘yinidagi yutish strategiyalaridan 01-01-17-1921FR raqamli «Evklid metrikasiga ega manifoldlarda ko‘p quvuvchili quvish va qochish differensial o‘yinlar uchun yangi usul» mavzusidagi xorijiy grant loyihada quvish-qochish o‘yinida yutish strategiyasini qurishda foydalanilgan (Putra Malayziya universitetining 2021 yil 7 iyuldagi ma’lumotnomasi). Ilmiy natijaning qo‘llanilishi l2 fazodagi quvish-qochish o‘yinida quvuvchilar uchun yutish strategiyasini qurishni va asosiy natijani isbotlash imkonini bergan;
uch o‘lchamli Evklid fazosidagi muntazam ko‘pyoqliklarning qirralaridan iborat grafning xossalari va shu bilan birga muntazam ko‘pyoqliklarning qirralaridagi quvish-qochish o‘yinida o‘yinchilarning yutish strategiyalaridan OT-F1-16 «Optimal boshqaruv masalalari va graflarda differensial tenglamalar uchun chegaraviy masalalar nazariyasini ishlab chiqish» mavzusidagi fundamental loyihada boshqariladigan ob’ektlarni boshqarishda foydalanilgan (Toshkent moliya instituti 2021 yil 7 sentyabr`dagi № 28/2094-sonli ma’lumotnomasi). Ilmiy natijaning qo‘llanilishi differensial tenglamalarning echimlarini graflarda qurishda va echimlarning cheksizlikda joylashgan nuqtalardagi xususiyatlarini o‘rganish imkonini bergan.