Рахимов Наврўзбек Шохназаровичнинг 
фалсафа доктори (PhD) диссертацияси ҳимояси ҳақида эълон

I. Умумий маълумотлар:
Диссертация мавзуси, ихтисослик шифри (илмий даража берадиган фан тармоғи номи): “Хоразм Халқ Шўролар Жумҳурияти тарихини ўрганиш муаммолари ва ёндашувлар (1920-2020 йиллар)”. 07.00.08 – Тарихшунослик,  манбашунослик ва тарихий тадқиқот усуллари (тарих фанлари).
Диссертация мавзуси рўйхатга олинган рақами: В2021.4.PhD/Tar.718.
Илмий раҳбар: Мустафаева Нодира Абдуллаевна, тарих фанлари доктори.
Диссертация бажарилган муассаса номи: Фанлар академияси Тарих институти
ИК фаолият кўрсатаётган муассаса, ИК рақами: Ўзбекистон Фанлар академияси Тарих институти. DSc.02/30.12.2019. Tar.56.01. 
Расмий оппонентлар: Эргашев Бахтиёр Эргашевич, тарих фанлари доктори, доцент; Саидов Шавкат Жумабаевич, тарих фанлари номзоди, доцент.
Етакчи ташкилот: Низомий номидаги Тошкент давлат педагогика университети.
Диссертация йўналиши: назарий ва амалий аҳамиятга молик.
II. Тадқиқотнинг мақсади Хоразм Халқ Шўролар Жумҳуриятида кечган ижтимоий-сиёсий, иқтисодий ва маданий жараёнларга оид қарашлар, илгари сурилган ғоя ва ёндашувларнинг ўзгариб боришига таъсир қилган омилларни очиб беришдан иборат.
III. Тадқиқотнинг илмий янгилиги:  
1920-1924 йилларда Хоразм ҳудудидаги давлат илмий адабиётларда “Хоразм Республикаси”, “Хоразм Халқ Республикаси”, “Хоразм Халқ Совет Республикаси” каби турли номларда берилганлиги, аслида расмий ҳужжатлар, “Инқилоб қуёши” рўзномаси, давр адабиёти ва миллий арбобларнинг хотиралари асосида ушбу давлат номини “Хоразм Халқ Шўролар Жумҳурияти” деб аташ зарурлиги  асосланган; 
1930-1950 йиллардаги тадқиқотлар кўпроқ “Ёш хиваликлар” ва миллий зиёлиларни обрўсизлантиришга қаратилганлиги ҳамда уларга нисбатан “радикал буржуа-миллатчи” ва “пантуркист” баҳолари қўлланилганлиги исботланган;
1960-1980 йиллар совет тарихшунослигида Хоразм Халқ Шўролар Жумҳурияти тарихи хонлик бошқарувидан “миллий социалистик давлат” тузилишигача бўлган “оралиқ давр” сифатида баҳоланганлиги ва тадқиқотлар ушбу ғояни исботлашга йўналтирилганлиги далилланган;
1991-2020 йилларда яратилган илмий адабиётлар асосида Хоразм Халқ Шўролар Жумҳурияти раҳбарияти РСФСР ҳукумати билан дастлаб тенг шартлар остида алоқа олиб боргани ҳамда миллий манфаатларни ҳимоя қилишга интилганликлари туфайли бошқарувдан четлатилганликлари далилланган.
IV. Тадқиқот натижаларининг жорий қилиниши. Мавзу юзасидан ишлаб чиқилган илмий хулоса ва таклифлар асосида:
ХХ аср биринчи чорагига тааллуқли давлатчилик тарихи, Ёш хиваликлар вакилларининг Хоразм Халқ Шўролар Жумҳурияти тузилишидаги ўрни ва уларнинг кейинги тақдири, ижтимоий-иқтисодий, маданий ҳаётига оид илмий хулосаларидан Республика маънавият ва маърифат маркази томонидан Ўзбекистон Республикаси Президентининг 2019 йил 3 майдаги “Маънавий-маърифий ишлар самарадорлигини ошириш бўйича қўшимча чора-тадбирлар тўғрисида”ги Қарор дастурининг VIII боб “Халқимизнинг тарихий мероси, урф-одатлари ва миллий тарбия анъаналарини асраб-авайлаш, кенг аҳоли қатламлари, айниқса ёшлар ўртасида динлараро бағрикенглик, миллатлараро тотувлик ва ўзаро меҳр-оқибат муҳитини мустаҳкамлашга доир тадбирлар” йўналиши доирасида “Жамоат ташкилотлари билан олиб бориладиган ишлар” яъни, “Тарихий хотира ва инсон омили буюк келажагимизнинг гаровидир”, “Ёшларда тарихий тафаккурни шакллантиришнинг муҳим омили”, “Комил инсонни шаклланишида тарих ва маънавий қадриятларнинг тутган ўрни”, “Миллий ва тарихий онг маънавий қадрият сифатида” ўтказилган тарғибот ишларида фойдаланилган (Республика маънавият ва маърифат марказининг 2020 йил 16 июндаги 02/011-556-сон маълумотномаси). Натижалар Ўзбекистон давлатчилиги тарихида 1920-1924 йилларда мавжуд бўлган Хоразм Халқ Шўролар Жумҳуриятининг фаолияти тўғрисидаги маълумотларни кенг жамоатчиликка етказиб беришга хизмат қилган;
Хоразм Халқ Шўролар Жумҳуриятига тааллуқли манбаларни ўрганиш орқали Хива хонлигининг тугатилиши, Хоразм Халқ Шўролар Жумҳуриятининг ташкил топиши, давлат тузилмаси, ижтимоий-сиёсий, иқтисодий ва маданий соҳадаги жараёнларига доир қўлга киритилган янгиликлардан “O‘zbekiston tarixi” телеканалининг “Мавзу” кўрсатуви, “Тарихий савол” ток-шоусини тайёрлашда фойдаланилган (Ўзбекистон миллий телерадиокомпанияси “O‘zbekiston tarixi” телеканали давлат унитар корхонасининг 2020 йил 17 сентябрдаги 02-40-864-сон маълумотномаси). Тадқиқот илмий хулосалари ХХШЖнинг қисқа фаолияти давомида эришган ютуқлари ва йўл қўйган камчиликларини очиб беришга хизмат қилган.