Гамидов Семур Шукур ўғлининг
фалсафа доктори (PhD) диссертацияси ҳимояси ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): «Ўзбекистонда ишлаб чиқарилаётган замонавий енгил автомобиллар ҳаракатланишида пиёдалар билан тўқнашувда етказилган жароҳатланишларнинг суд-тиббий  тавсифи » 14.00.24 – Патологик анатомия (тиббиёт фанлари).
Диссертация мавзуси рўйхатга олинган рақам: B2020.4.PhD/Tib1570.
Илмий раҳбар: Индиаминов Сайит, тиббиёт фанлари доктори, профессор.
Диссертация бажарилган муассаса номи: Самарканд давлат тиббиёт институти.
ИК фаолият кўрсатаётган муассаса (муассасалар) номи, ИК рақами: Тошкент тиббиёт академияси, DSc.04/30.12.2019.Tib.30.03.
Расмий оппонентлар: Искандаров Алишер Искандарович, тиббиёт фанлари доктори, профессор, Акбергенова Камила Абдикиримовна, тиббиёт фанлари номзоди, доцент.
Етакчи ташкилот: Узоқ шарқий давлат тиббиёт университети (Россия Федерацияси).
Диссертация йўналиши: амалий аҳамиятга молик.
II. Тадқиқотнинг мақсади: Ўзбекистонда ишлаб чиқарилаётган енгил русумли замонавий автомобиллар билан тўқнашувда жабрланган пиёда шахслардаги жароҳатланишларни суд-тиббий ташхислашни такомиллаштиришдан иборат.
III. Тадқиқотнинг илмий янгилиги:
замонавий енгил русумли автомобиллар билан тўқнашувда автоҳалокатнинг 1-чи фазасида аксарият ҳолларда пиёдаларда иккала болдир ёки битта сон ва битта болдир суякларида диафизар қўшалоқ синишлар шаклланиши исботланган;
ҳаракатдаги замонавий енгил автомобилларнинг пиёдалар билан тўқнашувида жарохатланишнинг 1-чи фазасида терида махсус турдаги контактли жарохатлар юзага келиши эҳтимоли камлиги аниқланган;
эски русумли енгил автомобилларнинг пиёдалар билан тўқнашувидаги бирламчи зарба соҳаларида юмшоқ тўқималар жароҳатланишлар, замонавий енгил автомобиллар билан тўқнашувидаги жароҳатланишларга нисбатан эзилишлар ва қон қуйилишлар сезиларли даражада намоён бўлиши асосланган;
пиёдаларнинг замонавий енгил русумли автомобиллар билан тўқнашуви 3-чи фазасида тананинг сезиларли масофага отилиши ҳамда тананинг кучли силкиниши натижасида кўкрак ва қорин бўшлиғи ҳамда бош олд-ёнбош ва юз соха тузилмаларида жароҳатлар жиддий ва кўламли бўлиши аниқланган;
пиёдаларни Кобальт, Лаcетти, Малибу русумли автомобиллар билан тўқнашувининг 2-чи фазасида умуртқа поғонасининг эгилиши ва қайрилиши билан чекланиши, Матиз ва Спарк русумли автомобиллар билан тўқнашувининг 2-чи фазасида энса-бўйин соҳаларда жиддий жароҳатланишлар шаклланиши исботланган.
IV. Тадқиқот натижаларининг жорий қилиниши.
Енгил русумли замонавий автомобиллар билан тўқнашувда жабрланган пиёда шахслардаги жароҳатланишларни суд-тиббий ташхислашни такомиллаштириш бўйича олинган илмий натижалар асосида:
пиёдаларнинг танасида аниқланган жароҳатлар жихатлари беморларга шошилинч ва ихтисослаштирилган тиббий ёрдам кўрсатишнинг самарали усулларини ишлаб чиқишга қаратилган илмий натижалар асосида ишлаб чиқилган «Автомобил травмаси натижасида пиёдаларда  қўл-оёқ суяклари синишини суд-тиббий баҳолаш усуллари» номли услубий тавсиянома тасдиқланган (Соғлиқни сақлаш вазирлигининг 2021 йил 5 апрелдаги 8н-р/280-сон маълумотномаси). Натижада марҳумлар жасадлари тиббий экспертизадан ўтказиш сифати ошириш ва йўл-транспорт ҳодисалари билан боғлиқ суд-тиббий масалаларни ишончли тарзда ҳал этиш имконини берган;
енгил русумли замонавий автомобиллар билан тўқнашувда жабрланган пиёда шахслардаги жароҳатланишларни суд-тиббий ташхислашни такомиллаштириш бўйича олинган илмий натижалар соғлиқни сақлаш амалиётига жумладан, Республикаси суд-тиббий экспертиза илмий-амалий марказининг Андижон, Навойи, Тошкент ва Фарғона вилоят филиаллари морфология ва амбулатория бўлимлари экспертиза амалиётига татбиқ этилган (Соғлиқни сақлаш вазирлигининг 2021 йил 28 декабрдаги 08-09/21175-сон маълумотномаси). Натижада ташхислаш вақтини қисқартириш, иқтисодий харажатларини камайтириш ва суд-тиббий тадқиқотлар сифатини ошириш имконини берган.