Амонов Бахром Баходировичнинг
фалсафа доктори (PhD) диссертацияси ҳимояси ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): «Миастеник синдромли тимома билан оғриган беморларни комплекс жарроҳлик даволаш ва периоператив олиб боришни такомиллаштириш », 14.00.27 – Хирургия (тиббиёт фанлари).
Диссертация мавзуси рўйхатга олинган рақам: B2018.1.PhD/Tib510.
Илмий раҳбар: Худайбергенов Шухрат Нурматович, тиббиёт фанлари доктори.
Диссертация бажарилган муассаса номи: академик В.Воҳидов номидаги Республика ихтисослаштирилган хирургия илмий-амалий тиббиёт маркази.
ИК фаолият кўрсатаётган муассасаноми, ИК рақами: академик В.Воҳидов номидаги Республика ихтисослаштирилган хирургия илмий-амалий тиббиёт маркази Dsc.04/30.12.2019.Tib.49.01.
Расмий оппонентлар: Беркинов Улугбек Базарбаевич, тиббиёт фанлари доктори, профессор; Юсупбеков Аброрбек Ахмаджонович,тиббиёт фанлари доктори, профессор
Етакчи ташкилот: Краснодар ўлкаси Соғлиқни сақлаш вазирлиги “Профессор. С.В. Очаповский номидаги 1-сон ўлка клиник шифохонаси - илмий тадқиқот институти” ДССБМ (Россия Федерацияси)
Диссертация йўналиши: амалий аҳамиятга молик.
II. Тадқиқотнинг мақсади: миастеник синдромли тимома билан оғриган беморларни хирургик даволаш натижаларини тимэктомиянинг тактик-техник жиҳатларини такомиллаштириш орқали яхшилашдан иборат.
III. Тадқиқотнинг илмий янгилиги қуйидагилардан иборат:
миастеник синдромнинг ривожланиши, бу оғир инқирозли кечиш ва декомпенсациянинг тез ривожланиши билан кечувчи патологик жараённинг ривожланиши учун хавф омилларини етарлича баҳоламаслик эҳтимолини юзага келтирадиган ҳамда прогностик омон қолиш кўрсаткичларини сезиларли даражада камайтирадиган тимоманинг илк клиник белгиси бўлиши мумкинлиги аниқланган;
тимомани ўз вақтида текшириш ва фаол хирургик тактика инқирозли кечиш ривожланиши ва миастеник синдромнинг оғир турлари шаклланиши хавфини камайтиришга ёрдам бериши аниқланган;
миастеник инқироз бўлган беморларда ташрихдан олдинги ва кейинги даврда плазмаферез ўтказиш яллиғланиш цитокинлари ажралишини пасайишига, тизимли яллиғланишни хамда ҳаракат функциялари яхшиланган холда холинорецепторларга антитаначалар концентрациясини камайишига олиб келиши, полиорган дисфункция синдромини бартараф этиши аниқланган;
мултислайс компьютер томографияси ўсимта ўлчамларини, ўрта чизиққа нисбатан ўсиш хусусиятини, атрофдаги аъзолар ва тўқималарга инвазия мавжудлиги ёки йўқлигини, шунингдек, инвазив ўсиш даражасини тўғри аниқлаш имконини берувчи энг информатив тадқиқот усули эканлиги исботланган;
тимэктомияда оптимал хирургик кириш йўлини танлашга дифференциал ёндашув имкониятига таъсир қилувчи ўсимтанинг жойлашуви, ўлчамлари ва ўсиш хусусиятини ҳисобга олган ҳолда патологик жараённинг ривожланиш даражасини баҳолашнинг топографик мезонларига аниқлик киритилган.
IV. Тадқиқот натижаларининг жорий қилиниши. Миастеник синдромли тимома билан оғриган беморларни комплекс хирургик даволаш ва периоператив олиб боришни такомиллаштириш бўйича илмий тадқиқот натижалари асосида:
Миастеник синдромли тимомани даволаш бўйича илмий тадқиқот натижалари асосида ишлаб чиқилган «Миастеник синдромли тимомани ташхислаш ва даволаш тамойиллари» номли услубий тавсиянома тасдиқланган (Соғлиқни сақлаш вазирлигининг 2021 йил 20 декабрдаги №08-09/20112-сон маълумотномаси). Таклиф этилган даволаш-тактик алгоритм тимома ва миастеник синдромли беморларни ташхисоти ва хирургик даволаш натижаларини яхшилашга имкон берган;
миастеник синдромли тимома билан оғриган беморларни хирургик даволашни оптималлаштириш бўйича олинган илмий натижалар соғлиқни сақлашнинг амалий фаолиятига, жумладан, “Академик В.Воҳидов номидаги Республика ихтисослаштирилган хирургия илмий-амалий тиббиёт маркази” ДМ ўпка ва кўкс оралиғи хирургияси бўлимига, Бухоро вилоят кўп тармоқли тиббиёт маркази хирургия бўлимига ва Республика шошилинч тиббий ёрдам илмий маркази Хоразм филиалига жорий этилган (Соғлиқни сақлаш вазирлигининг 2021 йил 20 декабрдаги №08-09/20112-сон маълумотномаси). Тадқиқот натижаларини жорий этиш тимоманинг жойлашишига ва миастения оғирлик даражасига қараб дифференциал ёндашув ва хирургик усулни танлашнинг тактик ва техник жиҳатларини стандартлаштиришга, бу эса ташрихдан кейинги асоратларни 22,3% дан 6% гача пасайтиришга, хирургик даволаш самарадорлигини оширишга ва беморларнинг шифохонада ётиш муддатини қисқартиришга имкон берган.