Джураева Шахнозахон Гайратовнанинг
фалсафа доктори (Phd) диссертация ҳимоясисиз ихтиро патенти асосидаги ҳимоя ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи):  «Полимер композициялар асосида тўқимачилик материаллари ва буюмлари учун декоратив элементларни ишлаб чиқиш ва қўллаш», 05.06.02-«Тўқимачилик материаллари технологияси ва хом ашёга дастлабки ишлов бериш»(техника фанлари).
Диссертация мавзуси рўйхатга олинган рақам: В2021.4.PhD/Т285.
Илмий раҳбар: Ташпулатов Солих Шукурович, техника фанлари доктори, профессор.     
Диссертация бажарилган муассаса номи: Тошкент тўқимачилик ва енгил саноат институти.
ИК фаолият кўрсатаётган муассаса номи, ИК рақами: Тошкент тўқимачилик ва енгил саноат институти, DSc.03/30.12.2019.T.08.01.
Диссертация йўналиши: амалий аҳамиятга молик.
II. Тадқиқотнинг мақсади тўқимачилик материалларига пигмент бўёқларни босиш учун, яхши консистентликка эга бўлган янги таркибни яратиш, ҳамда ўзбек миллий безак элементларидан фойдаланиб замонавий кийимни лойиҳалаш усулини такомиллаштиришдан иборат.
III. Тадқиқотнинг илмий янгилиги қуйидагилардан иборат:
тўқимачилик материаллари ва буюмларига декоратив элементларни қўллаш учун яхши мустаҳкамликка эга, нақш контурларининг аниқлигини ва адгезиясини таъминлаб бера оладиган  полимер композициясини олиш усули яратилган;
босма бўёқнинг физик-кимёвий хусусиятлари, жумладан плёнка адгезияси, ишқаланишга рангнинг мустахкамлиги, тасвирнинг аниқлиги, кўпикнинг ёпишқоқлиги, диструкцияланиш даражаси, нисбий бўялувчанлик қобилияти, ранг интенсивлиги ва ювишга рангнинг мустахкамлиги хамда матога босилган декоратив элемент тасвири юзасида бахмал хоссасини намоён қилиш хусусиятлари аниқланган;
модификацияланган коллаген гидролизати асосида босма бўёқ билан босилган нақшларнинг ишқаланишга чидамлилиги, гул чегара чизиғининг ёйилиб кетмаслиги, нақш контурининг равшанлиги таъминланган;
тўқимачилик материаллари ва буюмларига полимер композициясидан декоратив элементларни қўллаш бўйича тавсиялар ишлаб чиқилган;
ҳудудий жиҳатдан анъанавий ўзбек декоратив элементлари тизимлаштирилган ва маҳсулотларда декоратив эффект яратиш усулларининг таснифи ишлаб чиқилган;
замонавий кийимларда миллий безак элементлари сифатини эксперт баҳолаш усулларини қўллаб аҳамиятлилик коэффициентлари, жумладан безак элементларининг шакли ва ранги, тайёр махсулотда безакнинг қомат билан боғлиқлиги, кийим тектоникаси, кашта нақшларининг композицион қурилиши, ранг композицияларининг уйғунлиги, нақш чизиқларининг аниқлиги, безак элементларининг кийим деталларида жойлашиш тектоникаси ва модификацияланган коллагенли пигментли янги бўёқ таркиби билан матога нақш туширилганда бўёқда тарқалиб кетиш хусусияти йўқлиги аниқланган ҳамда миллий декоратив элементларининг электрон ахборот базаси яратилган.
IV. Тадқиқот натижаларининг жорий қилиниши: Полимер композициялар асосида тўқимачилик материаллари ва буюмлари учун декоратив элементларни ишлаб чиқиш  бўйича олинган натижалар асосида:
газламаларни пардозлаш учун янги полимер композициясига Ўзбекистон Республикаси Интеллектуал мулк агентлигининг ихтиро патенти олинган ("Газламаларни пардозлаш учун босма бўёқ", № IAP 05640). Натижада ушбу ихтирони жорий этиш орқали ишлаб чиқарилган маҳсулотлар таннархи 56% га камайишига эришилган;
газламаларни пардозлаш учун босма бўёқ "BETLIS TEKSTIL" МЧЖ корхонасида ишлаб чиқаришга жорий этилган (“Ўзтўқимачиликсаноат” уюшмасининг 2021 йил 7-июнь №04/12-1795-сонли маълумотномаси).  Натижада тикув ва тўқимачилик маҳсулотлари ишлаб чиқариш сифати, декоратив элементли маҳсулотлар ишлаб чиқариш салоҳияти қарийб 50% га ошишига эришилган.
тўқимачилик материаллари учун таклиф этилган янги босма бўёқ ва декоратив элементлар электрон базаси “AVIS TRIKO-TEX" МЧЖ корхонасида ишлаб чиқаришга жорий этилган (“Ўзтўқимачиликсаноат” уюшмасининг 2021 йил 7-июнь №04/12-1795-сонли маълумотномаси). Натижада тикув ва тўқимачилик маҳсулотлари ишлаб чиқариш сифати, декоратив элементли маҳсулотлар ишлаб чиқариш салоҳияти қарийб 70% га ошишига имконият яратилган.