Ильясов Азизбек Бахтияровичнинг
фалсафа доктори (PhD) диссертацияси ҳимояси ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): «Ҳомилада хромосом ва генетик касалликларни инвазив пренатал усул билан аниқлаш», 14.00.01 – Акушерлик ва гинекология  (тиббиёт фанлари).
Диссертация мавзуси рўйхатга олинган рақам: В2020.2.PhD/Tib610.
Илмий раҳбар: Юсупбаев Рустем Базарбаевич, тиббиёт фанлари доктори.
Диссертация бажарилган муассаса номи: Республика ихтисослаштирилган акушерлик ва гинекология илмий-амалий тиббиёт маркази.
ИК фаолият кўрсатаётган муассаса (муассасалар) номи, ИК рақами: Республика ихтисослаштирилган акушерлик ва гинекология илмий-амалий тиббиёт маркази PhD.04/05.06.2020.Tib.114.01.
Расмий оппонентлар: Ешимбетова Гульсара Закировна, тиббиёт фанлари доктори, профессор; Джаббаров Улугбек Узакович, тиббиёт фанлари доктори.
Етакчи ташкилот: Тошкент педиатрия тиббиёт институти.
Диссертациянинг йўналиши: амалий аҳамиятга молик.
II. Тадқиқотнинг мақсади: ҳомилада хромосом ва ген касалликларини пренатал ташхислаш усулларини оптималлаштиришдан иборат.
III. Тадқиқотнинг илмий янгилиги:
илк бор ирсий касалликлар ривожланиши бўйича ультратовуш, биокимёвий ва анамнестик хавф омилларини аниқлашнинг диагностик мезонлари такомиллаштирилган; ультратовуш ва биокимёвий скрининг орқали хромосом касалликлар билан болалар туғилишини эрта ташхислашнинг прогностик имкониятлари аниқланган;
илк бор генетик касалликларни туғруққа қадар эрта аниқлашда пренатал диагностика усулларининг сезувчанлиги ҳамда специфик жиҳатлари аниқланган;
илк бор операциядан кейинги асоратлар частотасини камайтириш мақсадида ультратовушли датчик ва холдер учун биопсия насадкасидан фойдаланган ҳолда биологик материални йиғишнинг абдоминал техникаси такомиллаштирилган;
илк бор ҳомилада ирсий генетик патологиялар ривожланишининг юқори хавфи бўлган ҳомиладорларни олиб боришнинг дифференциал ёндашуви ишлаб чиқилган.
IV. Тадқиқот натижаларининг жорий қилиниши.
Генетик патологияларнинг антенатал диагностикасини оптималлаштириш бўйича олинган илмий натижалар асосида:
Гестациянинг эрта муддатларида ҳомилада ирсий касалликларни қурсоқ ичида диагностика қилиш бўйича тадқиқотнинг илмий натижалари асосида ишглаб чиқилган «Гестациянинг эрта муддатларида ҳомилада ирсий касалликларни қурсоқ ичида диагностика қилиш алгоритми» номли услубий тавсиянома тасдиқланган (Соғлиқни сақлаш вазирлигининг 2020 йил 23 ноябрдаги 8н-р/456-сон маълумотномаси). Мазкур услубий тавсиянома ҳомиладорликнинг эрта муддатларида хромосом ва ген аномалияларини пренатал аниклаш ҳамда популяциянинг генетик юкини енгиллатиш имконини берган.
Инвазив пренатал диагностика усулларини такомиллаштириш бўйича олинган илмий натижалар амалий тиббиётда қўлланилиб, жумладан Тошкент вилояти перинатал маркази, Қибрай туманидаги туман тиббиёт бирлашмаси клиник амалиётига киритилган (Соғлиқни сақлаш вазирлигининг 2020 йил 6 декабрдаги 08-05/19188-сон маълумотномаси). Натижада даволаб бўлмайдиган жиддий нуқсонлар билан болалар туғилишининг олдини олиш имконини берган.