Annaev Jaloliddin Tuxtashevichning
falsafa doktori (PhD) dissertatsiyasi himoyasi haqida e’lon

I. Umumiy ma’lumotlar.
Dissertatsiya mavzusi, ixtisoslik shifri (ilmiy daraja beriladigan fan tarmog‘i nomi): «Tarmita-Termiz buddaviylik markazlari madaniyati», 07.00.06 - Arxeologiya (tarix fanlari).
Dissertatsiya mavzusi ro‘yxatga olingan raqam: B2021.2.PhD/Tar111.
Ilmiy rahbar: Sagdullaev Anatoliy Sagdullaevich, tarix fanlari doktori, professor, akademik.
Dissertatsiya bajarilgan muassasa nomi: O‘zbekiston milliy universiteti.
IK faoliyat ko‘rsatayotgan muassasa nomi, IK raqami: Milliy arxeologiya markazi, DSs.02/02.30.12.2019.Tar.45.01.
Rasmiy opponentlar: Asqarov Axmadali Asqarovich, tarix fanlari doktori, professor,  akademik;  Pidaev Shokir Rasulovich, tarix fanlari nomzodi.
Yetakchi tashkilot: Samarqand davlat universiteti.
Dissertatsiya yo‘nalishi: nazariy va amaliy ahamiyatga molik.
II. Tadqiqotning maqsadi yangi arxeologik manbalar asosida Tarmita-Termiz buddaviylik markazlari madaniyatini ochib berishdan iborat.
III. Tadqiqotning ilmiy yangiligi:
yangi stratigrafiya ma’lumotlari va arxeologik materiallarni davrlashtirish asosida Tarmita-Termizning Fayoztepa buddaviylik monastiri va Muhammad Hakim Termiziy maqbarasi atrofidagi g‘orsimon inshootlarning barpo etilishi davri hamda asosiy faoliyat bosqichlari aniqlangan; 
buddaviylik inshootlarining shakllanish bosqichlarini qiyoslash natijasida Fayoztepa O‘rta Osiyo hududida bunyod etilgan ilk buddaviylik monastiri sifatida va Amudaryodan shimoliy hududlarga buddaviylik ta’limoti kirib kelgan dastlabki aholi manzili Tarmita-Termiz ekanligi isbotlangan;
buddaviylik yodgorliklarining geografiyasi va topilgan arxeologik manbalari (numizmatika, epigrafika, tasviriy san’at namunalari) xronologiyasiga tayangan holda, buddaviylik ta’limotining Tarmita-Termizdan Shimoliy Baqtriyada tarqalishining Amudaryo yuqori oqimi o‘ng sohili, Surxondaryo havzasi va “Temir darvoza” asosiy yo‘nalishlari aniqlangan;
Shimoli-g‘arbiy Baqtriyada keng yoyilgan g‘orsimon inshootlarning o‘ziga xos qurilish jihatlari asosida Tarmita-Termizda Bomiyon va Sharqiy Turkistondagi singari buddaviylik g‘or me’morchiligi maktabi shakllanganligi va taraqqiy etganligi asoslangan.
IV. Tadqiqot natijalarining joriy qilinishi. Dissertatsiya doirasida ishlab chiqilgan nazariy va amaliy xulosa, tavsiya va ishlanmalar asosida:
Tarmita-Termiz buddaviylik markazlari madaniyati bo‘yicha ilmiy xulosa va takliflardan: 2004–2006 yillarda Fayoztepa monastiri, 2006–2008 yillarda Muhammad Hakim Termiziy maqbarasi yaqinidagi g‘orsimon inshootlar majmui, 2012–2015 yillar davomida o‘zbek-fransuz Baqtriya ekspedisiyasi tomonidan Kichik Chingiztepa, “Kushon binosi” yodgorligida olib borilgan tadqiqotlar jarayonida qo‘lga kiritilgan arxeologik topilmalardan Termiz arxeologiya muzeyi ekspozisiyasini boyitishda foydalanilgan (O‘zbekiston Respublikasi Madaniyat vazirligining 2020 yil 12 oktyabrdagi 01-12-103821-son dalolatnomasi). Natijada Tarmita-Termiz buddaviylik madaniyati va yodgorliklari tarixining mazmuni va ahamiyatini muzey tashrifchilari uchun ochib berishda hamda ularning tarix bo‘yicha bilimlarini oshirishga xizmat qilgan;
Tarmita-Termiz hududida buddaviylik ta’limotining tarqalishi, ushbu ta’limot bilan bog‘liq yodgorliklar va topilmalarning o‘rganilishi hamda tahlili yuzasidan olingan ilmiy natijalar «O'zbekiston tarixi» telekanalida efirga uzatilgan “Taqdimot” ko‘rsatuvi ssenariysini tayyorlashda foydalanilgan (O‘zbekiston milliy teleradiokompaniyasi “O‘zbekiston” teleradiokanali davlat unitar korxonasining 2020 yil 3 dekabrdagi 02-40-1227-son ma’lumotnomasi). Natijalar O‘zbekiston tarixiy-madaniy merosini targ‘ibotiga xizmat qilgan.