Шодмонов Ғолиб Дўстмуродовичнинг диссертация ҳимоясисиз ихтиро патенти асосида фалсафа доктори (PhD) илмий даражасини бериш бўйича эълон
 
I. Умумий маълумотлар.
Диссертация мавзуси, ихтисосликшифри: «Полиз экинлари экиш учун тупроққа ишлов бериш усули ва агрегатини ишлаб чиқиш», 05.07.01-Қишлоқ хўжалиги ва мелиорация машиналари. Қишлоқ хўжалиги ва мелиорация ишларини механизациялаш (техника фанлари).
Диссертация мавзуси рўйхатга олинган рақам: В2018.4.PhD/Т481
Илмий раҳбар: Маматов Фармон Муртозевич, техника фанлари доктори, профессор.
Илмий-тадқиқот иши бажарилган муассаса номи: Қарши муҳандислик-иқтисодиёт институти.
ИК фаолият кўрсатаётган муассаса номи, ИК рақами: Қарши муҳандислик-иқтисодиёт институти, PhD.03/30.06.2020.Т.111.02
Ўзбекистон Республикаси Интеллектуал мулк агентлигининг ихтирога патенти олинган: “Тупроққа ишлов бериш ва экиш усули” (№IAP 05360, 2017).Ўзбекистон Республикаси Интеллектуал мулк агентлигининг 2021 йил 24 февралдаги 01-11/402- сон хулосаси.
II. Тадқиқотнинг мақсади  ғалладан бўшаган далаларда полиз экинлари экиш учун тупроқни экишга тайёрлаш ва экишнинг энергия-ресурстежамкор усули ва уни амалга оширадиган агрегатни ишлаб чиқишдан иборат.
III. Тадқиқотнинг илмий янгилиги:
илк бор ғалладан бўшаган далаларни полиз экинлари экиш учун тайёрлашда бир йўла пушта юзасини саёз юмшатиш, экиш ҳудуди юза қисмини юмшатилган пушта устига ўнг ва чапга ағдариб, сўнгра чуқур юмшатиш билан бирга локал ўғит солиш ва суғориш ариғини очиш ҳамда уруғ экиш технологик жараёнларини ўз ичига олган янги усул яратилган;
далаларга ишлов бериш ва полиз экинларини экиш усулини амалга оширадиган янги агрегатнинг конструкцияси ва унинг ишчи органларини рамада ўзаро жойлашиши бир йўла пушта юзасини саёз юмшатиш, экиш ҳудуди юза қисмини ўнг ва чапга юмшатилган пушта устига ағдариш, сўнгра чуқур юмшатиш билан бирга локал ўғит солиш ва суғориш ариғини очиш ҳамда уруғ экиш технологик жараёнларини бажарилиши таъминланган ҳолда асосланган;
ғалладан бўшаган далаларни полиз экинларини экиш учун сифатли ва қисқа муддатларда тайёрлашда ўнг ва чап томонга ағдарувчи корпуслар, текискескичлар, ариқ ҳосил қилгич билан жиҳозланган чуқурюмшаткич ва ўғит бериш сошниги ҳамда экиш қурилмасидан ташкил топган янги агрегат яратилган;
агрегат ишчи қисмларининг энергиятежамкорлигини ва пуштада майин тупроқли қатлам ҳосил қилишини ҳамда уруғларни бир текис экилишини таъминлайдиган параметрлари асосланган. 
IV. Тадқиқот натижаларининг жорий қилиниши.
Полиз экинлари экиш учун тупроққа ишлов бериш усули ва агрегатини ишлаб чиқиш бўйича олинган натижалар асосида:
полиз экинлари экиш учун тупроққа ишлов бериш ва экиш усулига Ўзбекистон Республикаси Интеллектуал мулк агентлигининг ихтирога патенти олинган («Тупроққа ишлов бериш ва экиш усули»,  № IAP 05360, 2017 й.). Натижада ғалладан бўшаган далаларни полиз экинлари экишга тайёрлаш ва экиш усулини ишлаб чиқиш имкони яратилган;
ғалладан бўшаган далаларни бир ўтишда полиз экинлари экишга тайёрлаш ва экиш учун ишлаб чиқилган агрегат Қашқадарё вилояти Қарши, Қамаши ва Нишон туманлари фермер хўжаликларида жорий этилган (Қишлоқ хўжалиги вазирлигининг 2020 йил 28 декабрдаги 05/032-4661-сон маълумотномаси). Натижада ғалладан бўшаган далаларда тупроқни полиз экинлари экиш учун тайёрлаш ва уруғ экишда ёнилғи сарфи 31,5-46,2 фоизга, меҳнат сарфи 29,0-39,2 фоизга ва фойдаланишдаги харажатлар 30,2-45,3 фоизга камайган;
ишлаб чиқилган агрегатнинг саноат нусхаларини ишлаб чиқиш ва тайёрлаш учун дастлабки талаблар, техник топшириқ ва лойиҳа-конструкторлик ҳужжатлари (техникавий шартлар ва чизмалар) «BMKB-Agromash» АЖ да лойиҳалаш жараёнига жорий этилган (Қишлоқ хўжалиги вазирлигининг 2020 йил 28 декабрдаги 05/032-4661-сон маълумотномаси). Натижада асосланган параметрларга эга агрегатнинг саноат нусхаларини ишлаб чиқариш имкони яратилган.