O‘zbekiston Respublikasi Vazirlar Mahkamasi huzuridagi Oliy attestatsiya komissiyasi tomonidan manfaatdor vazirlik va idoralar, oliy ta’lim muassasalari va ilmiy tashkilotlar bilan hamkorlikda ilmiy darajalar beruvchi ilmiy kengashlar  faoliyatini nizomlar talablari asosida tashkil qilish, ilmiy darajalar berishda talablarning yagonaligini ta’minlash, faoliyatda har qanday salbiy holatlarning oldini olish yuzasidan tizimli chora-tadbirlar amalga oshiriloqda.
Ana shunday sa’y-harakatlar natijasida shu yilning o‘tgan davrida 4 ta ilmiy kengash faoliyati tugatildi. Bir nafar ilmiy kengash raisi faoliyatni tegishli ravishda tashkil qila olmagani,  tegishli ilmiy kotiblar kamchiliklarga yo‘l qo‘ygani sababli vazifasidan ozod etildi.
Ilmiy kengashlar faoliyatida ilmiy kotiblarning o‘rni  muhim ahamiyat kasb etadi. Attestatsiya ishlariga doir barcha hujjatlarning me’yoriy-texnik ekspertizadan o‘tkazilishi, avtoreferatlarning rasmiylashtirilishi va taqdim etilishi, shuningdek, talabgorlar bilan bevosita muloqotlar ham ular tomonidan amalga oshirilishini inobatga olsak, masalaning mohiyati yana chuqurroq anglashiladi. Shulardan kelib chiqqan holda, OAK tomonidan ilmiy kotiblar ishtirokida ishchi seminari tashkil etildi.
Seminarda ilmiy kengashlar faoliyati bilan bog‘liq dolzarb masala va muammolar ochiq-oydin gapirilib, tahlil va tanqid qilindi. Ilmiy kotiblarning xizmat vazifalari bilan bog‘liq mas’uliyat va vazifalari alohida ta’kidlanib,  ular o‘z faoliyatlarini tegishli nizomlar talablari asosida bajarishi, vazifalar ijrosiga jiddiy yondashishi, dissertatsiya himoyasi haqidagi ma’lumotlarni e’lon qilish yoki boshqa hujjatlarni taqdim etishda kechiktirishga yo‘l qo‘ymasligi, attestatsiya tadbirlarini muddatida amalga oshirishi, faoliyatda har qanday salbiy holatlarga yo‘l qo‘ymasligi, talabgor va boshqa shaxslarga asossiz ma’lumotlar bermasligi, harakatsizlikka yo‘l qo‘ymasligi yuzasidan ogohlantirildi.
Ishchi seminari yakunida ishtirokchilarga ilmiy kengashlar  faoliyatini nizomlar talablari asosida tashkil qilish va talablarning yagonaligini ta’minlash yuzasidan tegishli ko‘rsatmalar va tavsiyalar berildi.

OAK Axborot xizmati