Сафаров Алишер Бекмуродовичнинг 
фалсафа доктори (PhD) диссертацияси ҳимояси ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): “Бухоро вилоятининг иқлимий шароитларига мослаштирилган самарадор шамол энергетик қурилмасини яратиш”, 05.05.06 – “Қайта тикланадиган энергия турлари асосидаги энергия қурилмалари” ихтисослиги бўйича.
Диссертация мавзуси рўйхатга олинган рақам: B2020.4.PhD/T777
Илмий раҳбар: Садуллаев Насулло Нематович, техника фанлари доктори, профессор.
Диссертация бажарилган муассаса номи: Бухоро муҳандислик-технология институти.
ИК фаолият кўрсатаётган муассаса номи, ИК рақами: Қарши муҳандислик-иқтисодиёт институти, PhD.03/30.09.2020.T.111.03.
Расмий оппонентлар: Тоиров Олимжон Зувурович, техника фанлари доктори, профессор; Уришев Бобораим техника фанлари доктори, профессор.
Етакчи ташкилот: Тошкент ирригация ва қишлоқ хўжалигини механизациялаш муҳандислари институти. 
Диссертация иши: назарий ва амалий аҳамиятга молик.
II. Тадқиқотнинг мақсади кучсиз шамол оқимларида ишлайдиган вертикал ўқли шамол энергетик қурилмасини ишлаб чиқиш ва параметрларини асослашдан иборат.
III. Тадқиқотнинг илмий янгилиги: 
ташқи йўналтирувчи сиртларга эга бўлган, ички қарама-қарши айланувчи шамол ғилдиракларининг парраклари вертикал ўққа нисбатан парраклар орасидаги масофа кенглигида қиялаштирилган ҳамда статор ва ротори қарама-қарши томонга айланувчи, аксиал кўп қутбли генераторли вертикал ўқли шамол энергетик қурилмаси ишлаб чиқилган;
шамол энергиясининг потенциалини ҳисобга олган ҳолда ўзгарувчан ва кучсиз шамол оқимларида электр энергияси олиш имконини берадиган  статор ва ротори қарама-қарши томонга айланувчи шамол электр генераторининг конструкцияси такомиллаштирилган;
қурилмага йўналтирилаётган шамол оқимининг узлуксизлигини таъминлаш ва шамол парракларига акс таъсир қилувчи кучларни камайтириш усули ташқи йўналтирувчи сиртларнинг геометрик ўлчамлари ва улар орқали ўзгартирилган шамол оқими тезлигини ҳисобга олган ҳолда асосланган;
кучсиз шамол оқимларида ишлайдиган вертикал ўқли шамол энергетик қурилмасининг турли баландликлардаги шамол оқимининг тезлигини ҳисобга олган ҳолда қуввати, ишлаб чиқарадиган энергияси ва шамол энергиясидан фойдаланиш коэффициентлари аниқланган. 
IV. Тадқиқот натижаларининг жорий қилиниши. 
Бухоро вилоятининг иқлим шароитларига мослаштирилган самарадор шамол энергетик қурилмасини ишлаб чиқиш ҳамда параметрларини асослаш бўйича олинган натижалар асосида: 
иқлим шароитлари учун мослаштирилган кучсиз шамол оқимларида ишловчи вертикал ўқли шамол энергетик қурилмаси учун Интеллектуал мулк агентлигининг фойдали моделига патент олинган (“Шамол энергетик қурилмаси” FAP 01607, 2021 й). Натижада, ўзгарувчан ва кучсиз шамол оқимларида энергия ишлаб чиқаришни ўртача  20% га ошириш имконияти яратилган;
шамол тезлиги паст бўлган ҳудудлар учун самарали  ишлаш имкониятини берадиган статор ва ротори қарама-қарши томонга айланувчи шамол электр генераторининг конструкцияси такомиллаштирилган (Қишлоқ хўжалиги вазирлигининг 2020 йил 26 октябрдаги 02/021-3461-сон маълумотномаси). Натижада, шамол тезлиги 2,5-8,0 м/с бўлган оралиқда электр энергиясини ишлаб чиқариш ишончлилиги ва узлуксизлиги таъминланишига эришилган;
статор ва ротори қарама-қарши томонга айланувчи, аксиал кўп қутбли генераторли кучсиз шамол оқимларида ишончли ишлайдиган вертикал ўқли шамол энергетик қурилмаси Бухоро вилояти Шофиркон туманидаги “Buxoro zarhal teks” фермер хўжалигида жорий этилган (Қишлоқ хўжалиги вазирлигининг 2020 йил 26 октябрдаги 02/021-3461-сон маълумотномаси). Натижада, 4 кВт қувватли шамол энергетик қурилмасида йилига 7600 кВт·соат электр энергияси ишлаб чиқаришга ҳамда марказлашган электр таъминоти тизимига нисбатан йиллик 85 млн.сўм маблағни тежаш имконияти яратилган.