O‘zbekiston Respublikasi Vazirlar Mahkamasi huzuridagi Oliy attestatsiya komissiyasining navbatdagi Rayosat majlisi 2021 yilning 30 yanvar` kuni bo‘lib o‘tdi.

    Rayosat majlisi qaroriga ko‘ra, talabgorlarning 21 nafari fan doktori, 252 nafari falsafa doktori ilmiy darajalarida, 10 nafari professor, 79 nafari dotsent va 11 nafari katta ilmiy xodim ilmiy unvonlarida tasdiqlandi.

    Xalqaro reytinglarda birinchi 300 ta o‘rindan birini egallagan oliy ta’lim tashkilotlari tomonidan berilgan 18 nafar talabgorning falsafa doktori (PhD) ilmiy darajasi to‘g‘risidagi hujjatlari to‘g‘ridan-to‘g‘ri fan doktori (DSc) diplomi sifatida nostrifikatsiya qilindi.

    Rayosat majlisida oliy malakali ilmiy va ilmiy-pedagog kadrlar attestatsiyasi sifatini ta’minlash yuzasidan Toshkent davlat agrar universiteti huzuridagi DSc.05/30.12.2019.Qx.13.01 raqamli ilmiy kengashda «O‘rmon va manzarali daraxtlarda shahar mo‘ylovdori (Aeolesthes sarta Sols.) bioekologiyasi hamda ular miqdorini boshqarishni takomillashtirish» mavzusidagi dissertatsiya tadqiqotining mohiyati bo‘yicha ilmiy-uslubiy jihatdan xatolikka yo‘l qo‘yilganligi, dissertatsiya va avtoreferatda qator kamchiliklar mavjudligi, tadqiqot yakunlanmagani, olingan ma’lumotlar ishonchsizligi hamda talabgor savollarga qoniqarsiz javob berganligi sababli qishloq xo‘jaligi fanlari bo‘yicha falsafa doktori (PhD) ilmiy darajasiga talabgorning PhD/22.12.2020/Qx.1338 raqamli attestatsiya ishiga rad javobi berildi.
    Rayosatda mazkur ilmiy kengash ogohlantirilgan holda oliy malakali ilmiy va ilmiy-pedagog kadrlar attestatsiyasiga oid talablarning buzilishi yana bir bor takrorlansa, ilmiy kengash faoliyatini tugatish masalasini ko‘rib chiqish yuzasidan qaror qabul qilindi.