2020 йилнинг 29 декабрида давлатимиз раҳбарининг Ўзбекистон Республикаси  Олий Мажлисига йўллаган Мурожаатномаси мамлакатимиз ижтимоий-сиёсий ва иқтисодий ҳаётида муҳим воқеа бўлгани шубҳасиздир.
ОАКда Тошкент молия институти доценти, иқтисодиёт фанлари номзоди Жамолиддин Нуриллаев иштирокида бўлиб ўтган тадбирда дастлаб Мурожаатноманинг мазмун-моҳиятига бағишланган видеоролик намойиш этилди. Сўнгра нотиқ “Ўзбекистон Республикаси Президентининг Мурожаатномасида қўйилган янги вазифалар” мавзусида слайд-тақдимотини ўтказиб, ўзининг фикр-мулоҳазаларини баён этди.

Тадбир давомида “Ёшларни қўллаб-қувватлаш ва аҳоли саломатлигини мустаҳкамлаш йили”деб номланган 2021 йилда илғор хорижий амалиёт асосида доцент ва профессор илмий унвонлари ҳамда фалсафа доктори ва фан доктори илмий даражаларини тасдиқлаш ваколатини ўз йўналиши бўйича нуфузли олийгоҳларга бериш бўйича методик ва илмий-ташкилий ишларни амалга оширишга доир вазифалар хусусида ҳам фикрлар айтилди.
Мурожаатномада белгилаб берилган давлат бошқаруви идоралари фаолиятини тубдан такомиллаштириш, бошқарув идораларининг масалаларни ҳал қилишдаги масъулият ва жавобгарлигини кучайтириш, коррупциянинг ҳар қандай кўринишига муросасиз бўлиш, ислоҳотлар самарасини ҳар бир инсон ўз ҳаётида ҳис этиши учун қабул қилинаётган ҳужжатлар ижросини ўз вақтида ва самарали таъминлаш, давлат ва жамият бошқарувида аёлларнинг ўрни ва мавқеини янада мустаҳкамлаш, эркин фуқаролик жамиятини ривожлантиришда оммавий ахборот воситаларини қўллаб-қувватлаш, инсон ҳуқуқ ва эркинликларини кафолатли ҳимоя қилиш, қонун устуворлигини таъминлаш каби долзарб вазифалар батафсил баён қилинди.
Тадбир “Эл-юрт умиди” жамғармаси фаолиятига бағишланган видеоролик намойиши ва савол-жавоблар билан якун топди.

ОАК Ахборот хизмати