Tog‘aev Isamiddin Safarovichning 
falsafa doktori (PhD) dissertatsiyasi himoyasi haqida e’lon

I. Umumiy ma’lumotlar.
Dissertatsiya mavzusi, ixtisoslik shifri (ilmiy daraja beriladigan fan tarmog‘i nomi): «Janubiy Nurotaning strukturaviy-deshifrovka majmualari va ulardan mintaqaviy geologik tadqiqotlarda samarali foydalanish», 04.00.01 – Umumiy va mintaqaviy geologiya (geologiya-mineralogiya fanlari).
Dissertatsiya mavzusi ro‘yxatga olingan raqam: B2020.2.PhD/GM80. 
Ilmiy rahbar: Nurxodjaev Anvarbek Qoraxodjaevich, geologiya-mineralogiya fanlari doktori.
Dissertatsiya bajarilgan muassasa nomi: O‘zbekiston milliy universiteti. 
IK faoliyat ko‘rsatayotgan muassasa nomi, IK raqami: Geologiya va geofizika instituti, DSc.24/30.10.2020.GM.125.01. 
Rasmiy opponentlar: Abdullaev Raxmat Nurillaevich, geologiya-mineralogiya fanlari doktori, professor; Asadov Akmal Ro‘zimurodovich, geologiya-mineralogiya fanlari nomzodi, dotsent.
Yetakchi tashkilot: «Regionalgeologiya» DUK.
Dissertatsiya yo‘nalishi: nazariy va amaliy ahamiyatga molik.
II. Tadqiqotning maqsadi: Janubiy Nurota hududida Erni masofadan zondlash va geologik-geofizik ma’lumotlardan kompleks foydalanib geologiya-qidiruv ishlari samaradorligini oshirish va istiqbolli maydonlar belgilangan masofaviy asosni yaratishdan iborat.
III. Tadqiqotning ilmiy yangiligi:
yuqori imkoniyatli kosmik suratlarda geologik xususiyatlarni namoyon qiluvchi strukturaviy-deshifrovka majmualari aniqlangan; 
ochiq maydondagi geologik tuzilmalarning tektonik tuzilishi va mezo-kaynozoy yotqiziqlari bilan qoplangan maydonlarning geologik deshifrovka qilishning belgilari aniqlangan; 
Erni masofadan zondlash materiallaridan foydalanib yirik miqyosdagi kosmogeologik xarita-masofaviy asos tuzish usuli takomillashtirilgan;
Janubiy Nurota va unga tutash bo‘lgan hududlar bo‘yicha istiqbolli maydonlarni ajratishning ilmiy asoslari ishlab chiqilgan; 
Janubiy Nurota hududining raqamli kosmik suratlarini avtomatik deshifrovka qilishda RGB tizimining (Red-qizil, Green-yashil, Blue-ko‘k) eng qulay kanallar mutanosibligi aniqlangan.
IV. Tadqiqot natijalarining joriy qilinishi. 
Janubiy Nurota hududida kosmogeologik izlanishlar va Erni masofadan zondlash materiallarini komplekslash bo‘yicha olingan ilmiy natijalar asosida: 
1:50 000 miqyosda tuzilgan kosmogeologik xarita - masofaviy asos «Urankamyobmetgeologiya» DUK faoliyatiga joriy qilingan (Davlat geologiya va mineral resurslar qo‘mitasining 2020 yil 29 iyuldagi 01/05-son ma’lumotnomasi). Natijada, Janubiy Nurota hududining istiqbolini baholash va olib borilayotgan geologiya qidiruv ishlarini samarali rejalashtirish imkonini bergan;
yirik miqyosda tuzilgan masofaviy asos «Regionalgeologiya» DUK faoliyatiga joriy qilingan (Davlat geologiya va mineral resurslar qo‘mitasining 2020 yil 29 iyuldagi 01/05-son ma’lumotnomasi). Natijada, Janubiy Nurota hududida foydali qazilma konlari uchun geologik tasvirlash ishlarini olib borishga asos bo‘lib xizmat qilgan;
kosmogeologiya va deshifrovka natijalari «Surxongeologiya» DUK faoliyatiga joriy qilingan (Davlat geologiya va mineral resurslar qo‘mitasining 2020 yil 29 iyuldagi 01/05-son ma’lumotnomasi). Natijada, Janubiy Nurota hududlari bo‘yicha  kosmik suratlarning deshifrovka mezonlari etalon sifatida Hisor tog‘lari va unga yondosh hududlarida geologik qidiruv ishlari samaradorligini oshirish hamda istiqbolli maydonlarni aniqlash imkonini bergan.