Бекназаров Ҳасан Сойибназаровичнинг

докторлик диссертацияси ҳимояси ҳақида эълон

I. Умумий маълумотлар.

Диссертация мавзуси, ихтисослик шифри (илмий даража бериладиган фан тармоғи): «Янги олигомер антиоксидант ва коррозия ингибиторларини маҳаллий хомашёлардан олиш технологияси», 02.00.14–Органик моддалар ва улар асосидаги материаллар технологияси (техника фанлари).

Талабгорнинг илмий ва илмий-педагогик фаолият олиб боришга лаёқати бўйича тест синовидан ўтгани ҳақида маълумот: /кимё фанлари номзоди/.

Диссертация мавзуси рўйхатга олинган рақам: 28.04.2016./В2016.2.Т107.

Илмий маслаҳатчи: Джалилов Абдулахат Турапович, кимё фанлари доктори, профессор.

Диссертация бажарилган муассаса номи: Тошкент кимё-технология институти.

ИК фаолият кўрсатаётган муассаса номи, ИК рақами: Тошкент кимё-технология институти, 14.07.2016.Т.08.01.

Расмий оппонентлар: Мухамедиев Мухтар Ганиевич, кимё фанлари доктори, профессор; Қодиров Тўлқин Жумаевич, техника фанлари доктори, профессор; Ашуров Нигмат Рустамович, техника фанлари доктори, профессор.

Етакчи ташкилот: Тошкент давлат техника университети.

Диссертация йўналиши: назарий ва амалий аҳамиятга молик.

II. Тадқиқотнинг мақсади: таркибида азот, фосфор ва олтингугурт тутган олигомерлардан кўп функцияли антиоксидантлар, коррозия ингибиторлари олиш технологияларини ишлаб чиқишдан иборат.

III. Тадқиқотнинг илмий янгилиги:

госсиполнинг олигомер таркибли ҳосилалари, полиметиленди(тио)-амидофосфатлар, эпихлоргидрин билан ди(тио)амидофосфатлар олигомерлари ва диметилтерефталатнинг полиэтиленполиамин билан олигомерлари асосидаги органик кимёвий қўшимчаларнинг физик-кимёвий хоссалари ва тузилиши аниқланган;

олинган N-, S- ва P-сақловчи олигомер ингибиторларининг полимер материаллар ва металл маҳсулотларининг физик-кимёвий ва механик хоссаларига таъсири аниқланган;

госсипол асосида синтез қилинган олигомерли антиоксидантларни эффективлиги фенол асосидаги ишлаб чиқаришда кенг қўлланиладиган антиоксидантлар билан таққосланган ва уларнинг сифат ва миқдор таъсири ҳамда кимёвий боғлардаги фарқлари асосланган;

олинган олигомер таркибли коррозия ингибиторларининг металларда хлорид ва сульфид кислота муҳитларидаги ингибирлаш хоссалари аниқланган;

металларни коррозиядан ҳимояловчи олигомер таркибли коррозия ингибиторларини ҳамда полимерлар барқарорлигини ошириш учун антиоксидант маҳсулотларини олиш технологиялари яратилган.

IV. Тадқиқот натижаларининг жорий қилиниши:

Олигомер таркибли антиоксидантлар ва коррозия ингибиторларини олиш ва уларни синтез қилиб олиш технологияси ва қўлланилиши бўйича олинган илмий натижалар асосида:

антиоксидант хоссасига эга бўлган олигомер стабилизаторни олиш усулига Ўзбекистон Республикаси Интеллектуал мулк агентлигининг ихтирога патенти олинган (IAP 04208, 2010). Мазкур ихтирога патент юқори самарага эга бўлган антиоксидант олиш имконини беради;

олигомер коррозия ингибиторини олиш усулига Ўзбекистон Республикаси Интеллектуал мулк агентлигининг ихтирога патенти олинган (IAP 03969, 2009). Мазкур ихтирога патент металлар коррозиясини олдини олиш имконини беради;

занглаш олигомер ингибиторини олиш усулига Ўзбекистон Республикаси Интеллектуал мулк агентлигининг ихтирога патенти олинган (IAP 03613, 2008). Мазкур ихтирога патент металларни занглашдан ва юзасида тузларни йиғилишининг олдини олиш имконини беради;

ишлаб чиқилган олигомер антиоксидантлар ва коррозия ингибиторлари «Ўзкимёсаноат» АЖ корхоналарида полимер материалларини барқарорлигини оширишда ва сув айланма системаларида коррозияга қарши жорий этилган («Ўзкимёсаноат» АЖнинг 2016 йил 10 майдаги 05-1522/М-сон маълумотномаси). Полимер композияларида қўлланиладиган ингридиентни олигомер антиоксидантга алмаштириш ва сув қувурларини ҳимоя қилиш 7% ортишига эришилган.