Yosh avlodni vatanga sadoqat va fidoyilik ruhida kamol toptirgan elning kelajagi yuksak bo‘lishi, shubhasiz. Mamlakatimizda olib borilayotgan yoshlarga oid davlat siyosati ana shunday mezonga asoslangan desak, xato qilmaymiz. Zero, so‘nggi yillarda yurtimiz yoshlarini barkamol qilib tarbiyalash, ular uchun barcha zarur sharoitlarni yaratishga qaratilgan tizimli ishlar amalga oshirilmoqda. Yoshlarga oid davlat siyosatining huquqiy asoslarini mustahkamlash maqsadida O‘zbekiston Respublikasining “Yoshlarga oid davlat siyosati to‘g‘risida”gi Qonuni qabul qilingani, 30 iyun` – “Yoshlar kuni” deb belgilangani, turli sohalarda yuksak natijalarga erishayotgan yoshlar uchun “Mard o‘g‘lon” davlat mukofoti va “Kelajak bunyodkori” medalining ta’sis etilgani yuqoridagi fikrimizning yorqin dalilidir.
Yil sayin yoshlarga bo‘lgan e’tibor yanada ortib, ularni fan, madaniyat, san’at, jismoniy tarbiya va sportga keng jalb etish, axborot texnologiyalari bo‘yicha savodxonligini oshirish, yoshlar o‘rtasida kitobxonlikni keng targ‘ib qilish, ular bandligini ta’minlash kabi vazifalarni o‘z ichiga olgan beshta muhim tashabbus amalga oshirilmoqda.
2020 yilning 30 iyunida O‘zbekiston Respublikasi Prezidentining “O‘zbekiston Respublikasida yoshlarga oid davlat siyosatini tubdan isloh qilish va yangi bosqichga olib chiqish chora-tadbirlari to‘g‘risida”gi PF-6017-son Farmoni hamda “O‘zbekiston Respublikasi Yoshlar ishlari agentligi faoliyatini tashkil etish to‘g‘risida”gi PQ-4768-son qarori qabul qilindi.
Mazkur hujjatlar yurtimiz yoshlarining buguni va ertasi uchun muhim va mustahkam poydevor vazifasini o‘taydi.
Shu o‘rinda bugun mamlakatimiz yoshlarining ilm-fan bilan shug‘ullanishlari, o‘zlarining bilim va iqtidorlarini namoyon etishlari uchun ham barcha shart-sharoitlar yaratilganini alohida ta’kidlab o‘tish lozim.
OAK veb-saytida – “Yoshlar siyosati” rukni tashkil qilindi. Unda falsafa doktori (PhD) va fan doktori (DSc) ilmiy darajalarida tasdiqlangan yosh olimlar haqida ma’lumotlar berib boriladi.
OAK Axborot xizmati
