Садуллаев Улуғбек Норқуловичнинг фалсафа доктори (PhD) диссертацияси ҳимояси ҳақида эълон
 
I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): «Гўшт ва сут етиштириш соҳасини модернизациялашни рағбатлантиришнинг асосий йўналишлари», 08.00.04–Қишлоқ хўжалиги иқтисодиёти (иқтисодиёт фанлари).
Диссертация мавзуси рўйхатга олинган рақам: B2020.1.PhD/Iqt372
Илмий раҳбар: Умурзаков Ўктам Пардаевич, иқтисодиёт фанлари доктори, профессор.
Диссертация бажарилган муассаса номи: Қишлоқ хўжалиги иқтисодиёти илмий-тадқиқот институти ва Тошкент ирригация ва қишлоқ хўжалигини механизациялаш муҳандислари институти.
ИК фаолият кўрсатаётган муассасалар номи, ИК рақами: Тошкент ирригация ва қишлоқ хўжалигини механизациялаш муҳандислари институти, DSc.03/30.01.2020.I.10.03.
Расмий оппонентлар: Эгамбердиев Фармонқул Турсунқулович, иқтисодиёт фанлари доктори, профессор; Кушаров Зоҳид Келдиёрович, иқтисодиёт фанлари номзоди, доцент.
Етакчи ташкилот:  Тошкент давлат иқтисодиёт университети.
Диссертация йўналиши: назарий ва амалий аҳамиятга молик.
II. Тадқиқотнинг мақсади: Гўшт ва сут етиштириш соҳасини модернизациялашни рағбатлантириш йўналишлари ва амалга ошириш йўллари бўйича илмий таклиф ва амалий тавсиялар ишлаб чиқиш ҳисобланади.
III. Тадқиқотнинг илмий янгилиги:
гўшт ва сут ишлаб чиқариш жараёнини техник ҳамда технологик модернизациялашда “илмий ҳажмдорлик даражаси”ни илмий тадқиқотларга сарфланган харажатлар миқдори, илмий малакали кадрлар салмоғи ва техник таъминот даражаси каби коэффициентлардан фойдаланган ҳолда ҳисоблаш усули таклиф этилган;
гўшт ва сут маҳсулотларини ишлаб чиқарувчи субъектлар фаолиятини модернизациялашни давлат томонидан субсидиялаш, валюта курсини таргетлаш, револвер ва солиқ кредитлари каби молия-кредит дастаклари орқали рағбатлантириш йўллари асосланган;
чорвачиликда ақлли қурилмалар учун буюртмалар бериш, ишлаб чиқариш ва жорий этишни рағбатлантириш мақсадида “Ақлли чорвачилик тизимини қўллаб-қувватлаш Маркази”ни ташкил этиш ва унинг фаолиятини венчур фондлари орқали молиялаштириш бўйича таклифлар асосланган;
чорвачилик тармоғини техник-технологик модернизациялаш асосида гўшт етиштириш ҳажми ўзгаришининг 2025 йилгача бўлган прогнози ишлаб чиқилган.
IV. Тадқиқот натижаларининг жорий қилиниши.
Гўшт ва сут етиштириш соҳасини модернизациялашни рағбатлантиришнинг асосий йўналишлари бўйича олинган илмий натижалар асосида:
гўшт ва сут ишлаб чиқаришни техник-технологик модернизациялашда илм-фан натижаларидан фойдаланиш даражасини баҳолаш усуллари бўйича ишлаб чиқилган услубий тавсиялари Ветеринария ва чорвачиликни ривожлантириш қўмитаси томонидан амалиётга жорий қилинган (Ветеринария ва чорвачиликни ривожлантириш қўмитасининг 2019 йил 9 октябрдаги 02/023-1482-сон маълумотномаси). Илмий тавсиялар ёрдамида чорвачилик маҳсулотлари, хусусан гўшт ва сут етиштириш жараёнида илм-фан ютуқларидан самарали фойдаланиш, инновацион ишланмаларнинг амалиётга жорий этиш ҳолатини баҳолаш, соҳада илмий ҳажмдорлик даражасини аниқлаш имкониятини яратган;
гўшт ва сут маҳсулотларини ишлаб чиқарувчи субъектлар фаолиятини модернизациялашни давлат томонидан рағбатлантириш йўналишлари доирасида инновацион технологияларни субсидиялаш объектлари, мезонлари ва усуллари юзасидан ишлаб чиқилган таклифлар Ветеринария ва чорвачиликни ривожлантириш қўмитаси томонидан тегишли дастурларни шакллантириш ва жорий қилишда фойдаланилган (Ветеринария ва чорвачиликни ривожлантириш қўмитасининг 2019 йил 9 октябрдаги 02/023-1482-сон маълумотномаси). Бунда давлат тадбиркорнинг манфаатларини инобатга олган ҳолда мотивация қилиши асосида замонавий техника ва технологияларни жорий этиш 20-30 фоизгача ошишига эришилган;
чорвачилик тармоғини рақамли трансформацион тизим доирасида модернизациялашда “ақлли ферма”ларни қўллаб-қувватлаш инновацион марказини ташкил этиш орқали ривожлантириш бўйича таклифлар Ветеринария ва чорвачиликни ривожлантириш қўмитаси томонидан амалиётга жорий қилинган (Ветеринария ва чорвачиликни ривожлантириш қўмитасининг 2019 йил 9 октябрдаги 02/023-1482-сон маълумотномаси). Ушбу таклифни амалиётга қўллаш соҳада илмий тадқиқотлар олиб бориш, ақлли қурилмаларга талабни ички имкониятлар эвазига таъминлаш ва моддий рағбатлантириш механизмларини яратиш имконини берган.
гўшт ва сут ишлаб чиқариш ҳолати ҳамда уларнинг ўзгариш динамикасининг башоратлари юзасидан ишлаб чиқилган таклифлари Ветеринария ва чорвачиликни ривожлантириш қўмитаси томонидан амалиётга жорий қилинган (Ветеринария ва чорвачиликни ривожлантириш қўмитасининг 2019 йил 9 октябрдаги 02/023-1482-сон маълумотномаси). Шу орқали мамлакатимизда гўшт ва сут ишлаб чиқариш тизимининг қисқа, ўрта ва узоқ муддатли ўзгариш тенденциялари таҳлил этган ҳолда истиқболда амалга ошириладиган тадбирлар ва ислоҳотлар йўналишларини танлаб олишга ҳиссасини қўшган.