Фозилов Ғолибжон Ғуломжоновичнинг
фалсафа доктори  (PhD) диссертацияси ҳимояси ҳақида эълон

I. Умумий маълумотлар. 
Диссертация мавзуси, ихтисослик шифри (илмий даража бериладиган фан тармоғи номи): «Сўтаянчгич қурилмасини такомиллаштириш ва унинг параметрларини асослаш», 05.07.01– Қишлоқ хўжалиги ва мелиорация машиналари. Қишлоқ хўжалиги ва мелиорация ишларини механизациялаш (техника фанлари).
Диссертация мавзуси рўйхатга олинган рақам: В2017.2.PhD/T221.
Илмий раҳбар: Астанақулов Комил Дуллиевич, техника фанлари доктори, катта илмий ходим.
Диссертация бажарилган муассаса номи: Қишлоқ хўжалигини механизациялаш илмий-тадқиқот институти.
ИК фаолият кўрсатаётган муассаса номи, ИК рақами: Тошкент ирригация ва қишлоқ хўжалигини механизациялаш муҳандислари институти, DSс.27.06.2017.Т.10.01.
Расмий оппонентлар: Ризаев Анвар Абдуллаевич, техника фанлари доктори, профессор; Дускулов Абсаттор Ахадович, техника фанлари номзоди, доцент. 
Етакчи ташкилот: “BMKB-Agromash” АЖ.
Диссертация йўналиши: назарий ва амалий аҳамиятга молик.
II. Тадқиқотнинг мақсади: қобиқларидан тозаланмаган сўталарни янчиб, донини ажратиб оладиган сўтаянчгич қурилмани такомиллаштириш, унинг ишчи қисмлари параметрлари ва иш режимларини асослашдан иборат. 
III. Тадқиқотнинг илмий янгилиги: 
қобиқли сўталарни янчиб, донини ажратиб оладиган сўтаянчгичнинг такомиллаштирилган конструкцияси ишлаб чиқилган;
сўтаянчгич сидирувчи планкалари таъсирида сўта қобиқларининг титилиш жараёни моҳияти очиб берилган ва улар асосида планкаларнинг параметрлари аниқланган;  
сўтаянчгичда янчилиб чиқаётган сўта қобиғи ва ўзаги таркибидаги донларни жадал ажратиб олиш учун ғалвирли мослама ишлаб чиқилган;  
ғалвирли мосламада донларнинг ажратиб олиниши ғалвирнинг қиялик бурчаги, тебранишлар амплитудаси ва частотасига боғлиқ ҳолда асосланган; 
такомиллаштирилган сўтаянчгич қурилма ишчи қисмларининг мақбул параметрлари уларнинг таъсирида дондаги аралашманинг белгиланган талабдан кўп бўлмаган ҳолда чиқитга чиқаётган дон миқдорининг энг кам бўлишидан келиб чиқиб аниқланган.
IV. Тадқиқот натижаларининг жорий қилиниши. 
Такомиллаштирилган сўтаянчгич қурилма ишчи қисмларининг параметрларини асослаш бўйича олинган натижалар асосида:
сўтаянчгич қурилмага Ўзбекистон Республикаси Интеллектуал мулк агентлигининг фойдали моделга патенти олинган («Маккажўхори сўталарини янчиш учун янчгич қурилма», №FAP 00776-2012 й.). Натижада қобиқли сўталарни янчиб, донини ажратадиган сўтаянчгич қурилманинг такомиллаштирилган конструкциясини ишлаб чиқиш имконияти яратилган;
такомиллаштирилган сўтаянчгич Янгийўл ва Зангиота туманларидаги фермер хўжаликларида жорий этилган (Ўзбекистон Республикаси Қишлоқ хўжалиги вазирлигининг 2019 йил 23 майдаги 02/023-327-сон маълумотномаси). Натижада дон нобудгарчилигини 3,0 фоизга, дон шикастланишини эса 3 мартага камайтириш имкони яратилган;
сўтаянчгич қурилмани ишлаб чиқаришни ўзлаштириш учун лойиҳа-конструкторлик ҳужжатлари (техникавий шартлар ва чизмалар) «BMKB-Agromash» АЖда лойиҳалаш жараёнига жорий этилган (Ўзбекистон Республикаси Қишлоқ хўжалиги вазирлигининг 2019 йил 23 майдаги 02/023-327-сон маълумотномаси). Натижада габарит ўлчамлари кичик, металл ва материал ҳажмдорлиги кам бўлган такомиллаштирилган сўтаянчгич қурилмани ишлаб чиқариш имкони яратилган.