Хамдамов Уткир Рахматиллаевичнинг
фан доктори (DSc) диссертацияси ҳимояси ҳақида эълон

I. Умумий маълумотлар. 
Диссертация мавзуси, ихтисослик шифри (илмий даража бериладиган фан тармоғи номи): «Телекоммуникация рақамли тизимларида кўп ўлчовли сигналларга вейвлет функциялар ёрдамида параллел ишлов бериш моделлари ва алгоритмлари», 05.04.01–Телекоммуникация ва компьютер тизимлари, телекоммуникация тармоқлари ва қурилмалари. Ахборотларни тақсимлаш (техника фанлари).
Диссертация мавзуси рўйхатга олинган рақам: В2019.3.DSc/Т171.
Илмий маслаҳатчи: Зайнидинов Хакимжон Насиридинович, техника фанлари доктори, профессор.
Диссертация бажарилган муассаса номи: Муҳаммад ал-Хоразмий номидаги Тошкент ахборот технологиялари университети.
ИК фаолият кўрсатаётган муассаса (муассасалар) номи, ИК рақами: Муҳаммад ал-Хоразмий номидаги Тошкент ахборот технологиялари университети, DSc.28.12.2017.Т.07.02.
Расмий оппонентлар: Раджабов Тельман Дадаевич, физика-математика фанлари доктори, профессор, академик; Абдуқаюмов Абдурашид Абдуқаюмович, техника фанлари доктори, профессор; Кабулов Анвар Василович, техника фанлари доктори, профессор.
Етакчи ташкилот: Тошкент темир йўл муҳандислари институти. 
Диссертация йўналиши: назарий ва амалий аҳамиятга молик.
II. Тадқиқотнинг мақсади: рақамли телекоммуникация тизимларининг ишлаш самарадорлигини, тармоқларнинг ўтказувчанлик қобилиятини оширишни таъминловчи товуш сигналлари ва тасвирларга рақамли ишлов бериш моделлари, параллел алгоритмлари ҳамда дастурлар мажмуасини ишлаб чиқишдан иборат. 
III. Тадқиқотнинг илмий янгилиги: 
сигналларга рақамли ишлов бериш усулларини тадқиқ қилиш натижасида рақамли телекоммуникация тизимларида фойдаланиладиган бир ва икки ўлчовли сигналларни вейвлет ўзгартириш усуллари яратилган;
умумий ва тақсимланган хотирали ҳисоблаш тизимлари ҳамда гетероген ва кластерли ҳисоблаш тизимлари учун сигналларга рақамли ишлов беришнинг параллел дастурлаш моделлари ишлаб чиқилган;
каналларнинг ўтказиш қобилиятини ҳисобга олган ҳолда товуш сигналлари, тасвирларга рақамли ишлов берувчи телекоммуникация тизимларининг узатиш ва қабул қилиш қуйи тизими моделлари ҳамда структуралари ишлаб чиқилган;
умумий хотирали ҳисоблаш тизимларининг бир ва икки ўлчовли сигналларга кўп оқимли параллел ишлов бериш ҳамда кўп процессорли, кластерли ва график процессорлар асосидаги гетероген ҳисоблаш тизимларининг сигналларга тақсимланган параллел ишлов бериш алгоритмлари яратилган;
ҳисоблаш кластерининг ишлаш самарадорлигини ҳамда хотира ва тармоқ ресурсларидан фойдаланиш параметрларини баҳолаш учун оммавий хизмат кўрсатиш тизими имитацион модели ишлаб чиқилган;
рақамли телекоммуникация тизимларида товуш сигналлари ва тасвирларни сиқиш ҳамда уларни тиклашнинг такомиллаштирилган вейвлет усули ва алгоритмлари таклиф этилган.
IV. Тадқиқот натижаларининг жорий қилиниши. 
Телекоммуникация рақамли тизимларида товуш сигналлари ва тасвирларга вейвлет функциялар ёрдамида параллел ишлов бериш моделлари ва алгоритмларини яратиш бўйича олинган натижалар асосида:
умумий хотирали ҳисоблаш тизимлари учун параллел дастурлаш моделлари, бир ўлчовли вейвлет ўзгартириш сонли усули ҳамда товуш сигналларга кўп оқимли параллел ишлов бериш алгоритми ва дастурий воситаси “Радиоалоқа, радиоэшиттириш ва телевидение маркази” давлат унитар корхонасининг телерадиосигналларга ишлов бериш жараёнларига татбиқ этилган (Ахборот технологиялари ва коммуникацияларни ривожлантириш вазирлигининг 2019 йил 27 сентябрдаги 33-8/6743-сон маълумотномаси). Натижада алоқа каналлари орқали узатиладиган маълумотлар ҳажмини чегара қийматига қараб 25–28 фоиз камайтиришга ва ҳисоблаш жараёни вақтини 3,6–3,7 марта қисқартиришга эришилган;
тақсимланган хотирали ҳисоблаш тизимлари учун параллел дастурлаш моделлари, икки ўлчовли вейвлет ўзгартириш сонли усули ҳамда тасвирларга кўп процессорли тақсимланган ишлов бериш алгоритми ва дастурий воситаси “Ўзбектелеком” АК “Ахборот тизимлари” филиалининг “Video on Demand” хизмати аудио-видео ахборотларига ишлов бериш жараёнларига татбиқ этилган (Ахборот технологиялари ва коммуникацияларни ривожлантириш вазирлигининг 2019 йил 27 сентябрдаги 33-8/6743-сон маълумотномаси). Натижада каналнинг ўтказиш қобилиятига қараб узатиладиган маълумотлар ҳажмини 36–37,5 фоиз камайтиришга ва ҳисоблаш жараёни вақтини 3,0–3,3 марта қисқартиришга эришилган;
гетероген ҳисоблаш тизимлари учун параллел дастурлаш моделлари, бир ва икки ўлчовли вейвлет ўзгартириш сонли усуллари ҳамда график процессорларда сигналларга параллел ишлов бериш алгоритми ва дастурий воситаси “COSCOM” масъулияти чекланган жамиятининг “MMS” ва “Видео чақирув” хизматлари ҳисоблаш жараёнларига татбиқ этилган (Ахборот технологиялари ва коммуникацияларни ривожлантириш вазирлигининг 2019 йил 27 сентябрдаги 33-8/6743-сон маълумотномаси). Натижада каналнинг ўтказиш қобилияти ва гетероген ҳисоблаш тизимининг хусусиятларига қараб ҳисоблаш жараёнларини 4,6–5,9 марта тезлаштириш имконини берган.