Икрамов Отабек Азизбековичнинг
фалсафа доктори (PhD) диссертацияси ҳимояси ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): «Клиник ва молекуляр-генетик тадқиқотлар асосида миопияни ривожланиши ва зўрайишини прогнозлаштириш», 14.00.08–Офтальмология (тиббиёт фанлари).
Диссертация мавзуси рўйхатга олинган рақам: В2018.1.PhD/Tib555.
Илмий раҳбар: Каримова Муяссар Хамитовна, тиббиёт фанлари доктори, профессор.
Диссертация бажарилган муассаса номи: Андижон тиббиёт институти.
ИК фаолият кўрсатаётган муассаса номи, ИК рақами: Тошкент давлат стоматология институти, DSс.28.12.2017.Tib.59.01.
Расмий оппонентлар: Маккаева Сакинат Магомедовна, тиббиёт фанлари доктори, профессор; Касимова Мунира Садикджановна, тиббиёт фанлари доктори, профессор.
Етакчи ташкилот: Академик С.Н. Фёдоров номидаги «Кўз микрохирургияси» соҳалараро илмий-техник комплекси «Миллий тиббий тадқиқот маркази» Федерал давлат автоном муассасаси.
Диссертация йўналиши: амалий аҳамиятга молик.
II. Тадқиқотнинг мақсади: клиник ва молекуляр-генетик тадқиқотлар асосида миопиянинг ривожланиши ва жадаллашишининг янги мезонларини ишлаб чиқишдан иборат.
III. Тадқиқотнинг илмий янгилиги:
турли даражада миопия аниқланган беморларда бўйин умуртқаси артериялари допплерографиясига кўра қон томирлар диаметри ва қон оқими чизиқли систолик тезлигининг асимметрияси каби қон айланишнинг функционал бузилишлари аниқланган;
кўп миқдорда коллаген тутувчи тўқималарнинг зарарланиш даражаси юқорилиги сабабли болаларда сколиоз, кифоз ва ясси оёқлик миопия ривожланиши ва жадаллашувининг прогностик омиллари бўлиб хизмат қилиши асосланган; 
генетик детерминацияланган вегетатив бошқарувнинг учраш даражаси юқорилиги кўриш аъзоси аккомодация функциясининг биологик бошқарувига бевоcита таъсир кўрсатиб, клиник рефракцияни шакллантириши исботланган; 
илк бор COL1A1 гени rs1107946 ва VDR гени rs10735810 полиморфизмларининг патогенетик аҳамияти ва ушбу номзод генларнинг ўзбек популяциясидаги болаларда миопиянинг ривожланиши ва жадаллашувига таъсири асосланган; 
миопия ривожланиш хавфини белгилаб, самарали профилактик чора-тадбирлар ўтказиш имконини бера оладиган ҳамда миопия ривожланиши ва зўрайишини башоратловчи прогностик кўрсаткичлар ишлаб чиқилган.
IV. Тадқиқот натижаларининг жорий қилиниши.
Клиник ва молекуляр генетик тадқиқотлар асосида миопияни ривожланиши ва зўрайишини прогнозлаштириш бўйича олинган илмий натижалар асосида:
«Миопиянинг зўрайиб бориш даражасини прогнозлаш усули» услубий тавсияномаси тасдиқланган (Соғлиқни сақлаш вазирлигининг 2019 йил 3 июндаги 8н-р/218-сон маълумотномаси). Мазкур услубий тавсиянома миопиянинг зўрайиб бориш патогенезида бўйин умуртқа патологиялари, гемодинамик ўзгаришлар ва вегетотомир бузилишларни, умуртқа артерияларида қон айланиши даражасининг бузилиши натижасида юзага келадиган миопияни прогнозлаш имконини берган;
«Вегетатив асаб тизими тонусини инобатга олган ҳолда миопиянинг зўрайиб боришини баҳолаш усули» услубий тавсияномаси тасдиқланган (Соғлиқни сақлаш вазирлигининг 2019 йил 3 июндаги 8н-р/219-сон маълумотномаси). Мазкур услубий тавсиянома миопиянинг зўрайиб боришида вегетатив асаб тизими ваготоник тури устун бўлган миопия аниқланган беморларда рефракциянинг ортиб боришига номутаносиб равишда ООЎ жаддаллашув градиентининг катталигини эътиборга олган ҳолда жарроҳлик амалиёти ўтказишни режалаштириш орқали касаллик асоратларининг олдини олиш имконини берган;
миопияни ривожланиши ва зўрайишини прогнозлаштириш бўйича олинган илмий натижалар соғлиқни сақлаш амалиётига, жумладан, Республика клиник офтальмология шифохонаси, Республика ихтисослаштирилган кўз микрохирургияси илмий-амалий маркази, Андижон давлат тиббиёт институти клиникаси ва Андижон вилоят болалар кўп тармоқли тиббиёт маркази клиник амалиётига жорий қилинган (Соғлиқни сақлаш вазирлигининг 2019 йил 14 июндаги 8н-д/138-сон маълумотномаси). Олинган тадқиқот натижаларининг клиник амалиётга жорий қилиниши зўрайиб борувчи миопия аниқланган беморларда эрта ташхислаш ва унинг сифатини яхшилаш, даволаш тактикасини такомиллаштириш ва оғир асоратлар ривожланишини олдини олиш имконини берган.