Содиқов Бахром Сатторовичнинг
фалсафа доктори (PhD) диссертацияси ҳимояси ҳақида эълон

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): «Кунгабоқарнинг замбуруғли касалликлари ва уларга қарши кураш чоралари», 06.01.09– Ўсимликларни ҳимоя қилиш (қишлоқ хўжалиги фанлари).
Диссертация мавзуси рўйхатга олинган рақам: B2019.2.PhD/Qx307.
Илмий раҳбар: Авазов Сардоржон Эркин ўғли, қишлоқ хўжалиги фанлари доктори, доцент.
Диссертация бажарилган муассаса номи: Тошкент давлат аграр университети. 
ИК фаолият кўрсатаётган муассаса номи, ИК рақами: Тошкент давлат аграр университети, DSc.27.06.2017.Qx.13.01.
Расмий оппонентлар: Махмудходжаев Нажмиддин Мавлянходжаевич, биология фанлари доктори, профессор; Холдоров Мирхалил Ўразбекович, қишлоқ хўжалиги фанлари номзоди.
Етакчи ташкилот: Ўсимликшунослик илмий-тадқиқот институти.
Диссертация йўналиши: амалий аҳамиятга молик.
II. Тадқиқотнинг мақсади: Тошкент вилояти шароитидаги фермер хўжаликлари далаларида етиштирилаётган кунгабоқар ўсимлигидаги замбуруғлар қўзғатадиган  касалликларнинг тарқалишини аниқлаш ҳамда улар келтирган зарарини ҳисоблаш, замбуруғларнинг тарқалиш қонуниятларини ва биоэкологик хусусиятларини ўрганиш асосида уларга қарши самарали кураш чораларини ишлаб чиқишдан иборат.
III. Тадқиқотнинг илмий янгилиги:
илк бор Тошкент вилоятининг ҳар хил тупроқ иқлим шароитида экилган кунгабоқар ўсимлиги касалликларининг тарқалиши ва зарари аниқланган; 
кунгабоқарда аниқланган касалликларнинг ташхислари такомиллаштирилган;
йиғилган гербарий намуналаридан касаллик қўзғатувчи замбуруғларнинг тур таркиби аниқланган;
касалланган кунгабоқардан ажратилган замбуруғлар 4 та бўлим, 6 та синф, 6 та тартиб, 9 та оила, 17 та туркум ва 21 та замбуруғ турига мансублиги аниқланган;
кунгабоқар экилган далаларда касаллик қўзғатувчиларнинг кунгабоқар ўсимлигини касаллантириш даражаси аниқланган;
кенг тарқалган ва катта зарар келтирадиган касалликларга қарши самарали кураш чоралари ишлаб чиқилган;
ишлаб чиқилган кураш чораларининг биологик ва иқтисодий самарадорлиги аниқланган.
IV. Тадқиқот натижаларининг жорий қилиниши. 
Кунгабоқар ўсимлигининг замбуруғли касалликлари ва уларга қарши кураш чоралари бўйича олиб борилган тадқиқот натижалари асосида: 
Тошкент вилояти Пискент туманидаги “Агро Стимул Тех Сервис” фермер хўжалигида 2 гектар кунгабоқар майдонида кунгабоқарнинг сохта ун-шудринг касаллигига қарши “Превикур SL 722 с.э.к.” ва “Ридомил Голд МЦ 68% н.кук.” фунгицидларини қўллаш технологияси жорий этилган (Қишлоқ хўжалиги вазирлигининг 2019 йил 16 мартдаги 02/023-185-сон маълумотномаси). Бунинг натижасида гектаридан 8,3–5,6 центнергача қўшимча кунгабоқар ҳосили олишга эришилган; 
кунгабоқарнинг кулранг чириш касаллигига қарши “Шавит Ф 72 % с.э.г” фунгицидини қўллаш технологияси Тошкент вилояти Бўка тумани “Шонли Диёр Файз”, “Хуррам Рустам Агро”, “Офарин Мойтепа”, Зангиота тумани “Самандар Агро Идеал”, Юқори Чирчиқ тумани “Оқ тепа оқ олтин” ва “Суранткент Орзу Инвест” фермер хўжаликларида жами 8 гектар кунгабоқар экилган майдонларда жорий этилган (Қишлоқ хўжалиги вазирлигининг 2019 йил 16 мартдаги 02/023-185-сонли маълумотномаси). Натижада юқори биологик самарадорликка эришилган ва гектаридан 5,2–4,1 центнер қўшимча ҳосил олиш имкони яратилган;
кунгабоқарнинг фузариоз илдиз чириш касаллигига қарши уруғларни Максим XL 035 FS, 3,5% сус.к. уруғ дорилагичи билан 4,0 л/т нормада ишлов бериш технологияси Тошкент вилояти фермер хўжаликларида кунгабоқар экин майдонларига жорий этилган (Қишлоқ хўжалиги вазирлигининг 2019 йил 16 мартдаги 02/023-185-сон маълумотномаси). Ушбу уруғдорилагич қўлланилганда 80,0 фоиз биологик самарадорликка эришилган ва назоратга нисбатан 11,8 центнер қўшимча ҳосил олишга эришилган.