Назаров Насриддин Атақуловичнинг
фан доктори (DSc) диссертацияси ҳимояси ҳақида эълон

I. Умумий маълумотлар
Диссертация мавзуси, ихтисослик шифри (илмий даража бериладиган фан тармоғи номи): «Марказий Осиё полиэтник социумида миллатлараро муносабатлар такомиллашувининг фалсафий-функционал тадқиқи», 09.00.04–Ижтимоий фалсафа (фалсафа фанлари.).
Диссертация мавзуси рўйхатга олинган рақам: В2018.1.DSc/Fal30.
Илмий маслаҳатчи: Хоназаров Қўчқор Хоназарович, фалсафа фанлари доктори, профессор.
Диссертация бажарилган муассаса номи: Ўзбекистон Миллий университети.
ИК фаолият кўрсатаётган муассаса (муассасалар) номи, ИК рақами: Ўзбекистон Миллий университети, DSc.27.06.2017.Ғ.01.05.
Расмий оппонентлар: Абилов Ўрол Муродович, фалсафа фанлари доктори, профессор; Мадаева Шаҳноза Омонуллаевна, фалсафа фанлари доктори, профессор; Мусаев Одил Раҳматович, фалсафа фанлари доктори.
Етакчи ташкилот: Тошкент педиатрия тиббиёт институти.
Диссертация йўналиши: назарий аҳамиятга молик.
II. Тадқиқотнинг мақсади: Марказий Осиё полиэтник социумида миллатлараро муносабатлар такомиллашувининг ижтимоий-фалсафий моҳиятини очиб беришдан иборат.
III. Тадқиқотнинг илмий янгилиги:
«Ҳаракатлар стратегияси» дастурий вазифалари доирасида Марказий Осиё халқлари орасида миллатлараро тотувлик, барқарор тараққиёт, аҳил қўшничилик, халқ дипломатияси, маданиятлараро мулоқот ҳамда бир-бирини қўллаб-қувватлашга йўналтирилган фаолиятни тарғиб этиш муҳимлиги илмий асосланган;
миллий муносабатлар тизимида шахсий ўзликни англашдан миллий ўзликни англаш орқали умуминсоний ўзликни англаш сари ривожланиш эволюцияси ва унинг миллатлараро муносабатлар тараққиётига позитив таъсири очиб берилган;
«Бешта муҳим ташаббус» концепцияси доирасида миллатлараро муносабатлар субъекти бўлган ёшларни маданият,  санъат ва спорт соҳаларига кенг жалб этиш Марказий Осиё минтақасида миллий тотувликни таъминлашда муҳим омил эканлиги асослаб берилган;
«миллат» тушунчаси умумжамият ғоясига эга бўлиб, муайян давлат таркибига бирлашган этнослар ҳосиласи эканлиги, «миллатлараро муносабатлар» шахс ва миллатлар билан бир қаторда давлатлараро муносабатларни ҳам ўзида мужассам этиши, «этнос» тил, жамоавий код (урф-одат, анъана, миллий ўзликни англаш, ҳудуд), менталь хусусиятлар (тафаккурдаги ўзликни англаши, тарихий онг, умумий руҳият) ядросини мужассамлаштирган кишилар гуруҳи эканлиги билан бойитилган;
миллатнинг шаклланиш жараёни ва тараққиёт босқичларини акс эттирувчи ўзига хос «этнос-империя-миллат-миллий тараққиёт» тизими ишлаб чиқилган;
Марказий Осиё минтақасида миллатлараро ҳамжиҳатликни таъминлашда Ўзбекистон ташаббусларининг позитив натижалари  мамлакатнинг  халқаро имижини белгилайдиган асосий омиллардан бири эканлиги асосланган.
IV. Тадқиқот натижаларининг жорий қилиниши.
Марказий Осиё полиэтник социумида миллатлараро муносабатлар такомиллашувининг фалсафий-функционал тадқиқи бўйича олинган илмий натижалар асосида:
«Ҳаракатлар стратегияси» дастурий вазифалари доирасида Марказий Осиё халқлари орасида миллатлараро тотувлик, барқарор тараққиёт, аҳил қўшничилик, халқ дипломатияси, маданиятлараро мулоқот ҳамда бир-бирини қўллаб-қувватлашга йўналтирилган фаолиятни тарғиб этиш муҳимлигига доир таклиф ва хулосалардан Ўзбекистон Республикаси Вазирлар Маҳкамаси ҳузуридаги Миллатлараро муносабатлар ва хорижий давлатлар билан дўстлик алоқалари қўмитаси фаолиятида миллатлараро муносабатларни янада такомиллаштиришда, республикада истиқомат қилаётган миллат ва элатлар орасида дўстлик муҳитини юксалтиришда, Марказий Осиё минтақасидаги давлатлар орасида ўзаро яхши қўшничилик ва дўстона ҳамкорлик жараёнларини юқори босқичга кўтаришда қўлланилган (Республика Миллатлараро муносабатлар ва хорижий мамлакатлар билан дўстлик алоқалари қўмитасининг 2018 йил 3 майдаги 01-09-699-сон маълумотномаси). Булар жамиятда миллий тотувликни таъминлаш борасида «Ҳаракатлар стратегияси»да белгиланган вазифалар ижросида ижобий роль ўйнаган;
миллий муносабатлар тизимида шахсий ўзликни англашдан миллий ўзликни англаш орқали умуминсоний ўзликни англаш сари ривожланиш эволюцияси ва унинг миллатлараро муносабатлар тараққиётига позитив таъсирига доир таклиф ва тавсиялардан Ўзбекистон Республикаси «Ижтимоий фикр» жамоатчилик фикрини ўрганиш марказининг «Ўзбекистон – умумий уйимиз» ва «Миллий ўзлик» жамоатчилик сўровларини ўтказишда тайёрланган дастур ва сўровномаларда фойдаланилган (Ўзбекистон Республикаси «Ижтимоий фикр» жамоатчилик фикрини ўрганиш марказининг 2018 йил 30 апрелдаги 01-16/156-сон маълумотномаси). Натижада республикада миллий ҳамжиҳатликни таъминлаш ва миллий ўзликнинг эмпирик жиҳатларини ўрганишда назарий-методологик тадқиқотларга таяниш имконини бериб, концептуал қарашлар ва эмпирик жараёнлар уйғунлигини таъминлашга хизмат қилган;
«Бешта муҳим ташаббус» концепцияси доирасида миллатлараро муносабатлар субъекти бўлган ёшларни маданият,  санъат ва спорт соҳаларига кенг жалб этиш, улар орасида адолат мезонини қарор топтириш бўйича хулосалар «Адолат» социал-демократик партияси фаолиятидаги тарғибот ишларини янада оптималлаштиришда фойдаланилган (Республика «Адолат» социал-демократик партиясининг 2018 йил 1 майдаги 01-03/234 сон маълумотномаси). Бу борада ишлаб чиқилган таклиф ва тавсиялар мақсадли дастурлар воситасида жамиятда ижтимоий-сиёсий барқарорликни таъминлашга, миллий тотувлик, тинчлик ва тараққиётни янада мустаҳкамлашга, тарғибий фаолият самарадорлигини оширишга хизмат қилган;
миллат, миллатлараро муносабатлар, фуқароларнинг миллий ўзлигини англаш эволюцияси, этнос тушунчаларига оид муаллифлик таърифларидан «Социология» дарслигининг «Социал гуруҳлар», «Жамиятнинг социал структураси ва стратификацион жараёнлар», «Ижтимоий тараққиёт социологияси» мавзуларини тайёрлашда фойдаланилган (274-011-сон гувоҳнома, Олий ва ва ўрта махсус таълим вазирлигининг 2019 йил 15 июндаги 89-03-2490-сон маълумотномаси, Ўзбекистон Журналистика ва оммавий коммуникациялар университетининг 2019 йил 12 июндаги 16-1/240-сон маълумотномаси). Натижада миллат, миллатлараро муносабатлар, фуқароларнинг миллий ўзлигини англаш эволюцияси, этнос тушунчаларига оид муаллифлик таърифларини тушинишга хизмат қилган;
Марказий Осиё минтақасида миллатлараро ҳамжиҳатликни таъминлашда Ўзбекистон ташаббусларининг позитив натижалари мамлакатнинг халқаро имиджини белгилайдиган асосий омиллардан бири эканлиги тўғрисидаги ғоялардан Тожикистон ўзбеклар жамияти фаолиятида (Тожикистон ўзбеклар жамиятининг 2018 йил 23 апрелдаги 21-сон маълумотномаси), этнослар орасидаги алоқаларни уйғунлаштиришда, жумладан ўзаро ҳамжиҳатлик, дўстлик, бир-бирини қўллаб-қувватлашга йўналтирилган фаолиятларни тарғиб этиш масалаларида фойдаланилган. Ушбу таклифларнинг амалиётга жорий этилиши кўп миллатли Марказий Осиё жамиятида миллатлараро муносабатлар такомиллашувига, шунингдек,  миллий тотувлик ва ҳамжиҳатликка асосланган манфаатли ҳамкорлик ривожига ижобий таъсир кўрсатган.