Олий аттестация комиссияси томонидан аттестация жараёнларида очиқлик ва шаффофликни таъминлаш, шунингдек, тадқиқотчилар билан тўғридан-тўғри мулоқотни йўлга қўйиш мақсадида “OAK. Onlayn maslahat” Telegram бот ишга туширилди.
Эндиликда тадқиқотчилар диссертация ҳимоясини ташкил этиш, диссертация ишларини экспертизадан ўтказиш, илмий даражалар бериш тартиби ҳамда аттестация соҳасига оид бошқа масалалар юзасидан ўзларини қизиқтирган саволлар, таклифлар ва фикр-мулоҳазаларини бот орқали юборишлари мумкин.
Барча мурожаатлар Олий аттестация комиссияси мутахассислари томонидан кўриб чиқилиб, амалдаги норматив-ҳуқуқий ҳужжатлар талаблари асосида аниқ, холис ва асослантирилган жавоблар тақдим этилади.
Мазкур ботнинг ишга туширилиши тадқиқотчиларнинг аттестация жараёнларига оид масалалар бўйича тезкор ва ишончли ахборот олиш имкониятларини кенгайтиради, турли тушунмовчиликларнинг олдини олишга, шунингдек, тизимда очиқлик ва шаффофликни таъминлаш ҳамда жамоатчилик билан самарали мулоқотни янада кучайтиришга хизмат қилади.