Ma’lumki, O‘zbekiston Respublikasi Prezidentining 2026 yil 26 maydagi PF–98-son «Yangi avlod ilmiy kadrlarini tayyorlash va ularni attestatsiya qilish tizimini takomillashtirish to‘g‘risida»gi Farmoni bilan sohaga yangi yondashuvlarni joriy etish, attestatsiya jarayonlarini raqamlashtirish, ilmiy darajalar berish tizimining sifati, samaradorligi va shaffofligini oshirish yuzasidan keng ko‘lamli vazifalar belgilangan.
Ayni paytda mazkur Farmon ijrosini ta’minlashga doir tasdiqlangan «Yo‘l xaritasi»da belgilangan vazifalar bosqichma-bosqich amalga oshirilmoqda. Jumladan, Oliy attestatsiya komissiyasi (OAK) faoliyatini yangi tashkiliy va raqamli mexanizmlarga moslashtirish, attestatsiya jarayonlarini takomillashtirish hamda sohani tartibga soluvchi normativ-huquqiy hujjatlarni zamonaviy talablar asosida qayta ko‘rib chiqish bo‘yicha tegishli ishlar olib borilmoqda.
Shu bilan birga, ayrim tadqiqotchilarda OAK Rayosati majlisining o‘tkazilish sanasiga doir savollar tug‘ilayotgani tabiiy.
Ta’kidlash joizki, OAK Rayosat majlislarining yillik ish rejasida belgilangan sanalar, avvalo, tashkiliy rejalashtirish maqsadida shakllantiriladi. Attestatsiya ishlarini ko‘rib chiqishga tayyorlash, tegishli materiallarni shakllantirish, Rayosat a’zolari va mas’ul tuzilmalar faoliyatini muvofiqlashtirish bilan bog‘liq tashkiliy holatlardan kelib chiqib, majlis o‘tkazish vaqtiga o‘zgartish kiritilishi mumkin.
Bunda ilmiy daraja va ilmiy unvon berishning amaldagi normativ tartibi, belgilangan talablar hamda attestatsiya ishlarini xolis va sifatli ko‘rib chiqish tamoyillariga qat’iy rioya etiladi.
Hozirgi vaqtda oliy ta’lim va ilmiy tashkilotlarda professor-o‘qituvchilarning mehnat ta’tili davri davom etayotgani, shuningdek, attestatsiya ishlarini Rayosat muhokamasiga sifatli tayyorlash va tashkiliy jarayonlarni muvofiqlashtirish zarurati inobatga olingan holda avgust oyidagi OAK Rayosat majlisini 26 avgust kuni o‘tkazish rejalashtirilmoqda.
Shu munosabat bilan Rayosat majlisining yillik ish rejasida dastlab belgilangan sanada o‘tkazilmaganini ilmiy daraja va ilmiy unvonlarni tasdiqlash jarayoni to‘xtatilgani yoki attestatsiya ishlari ko‘rib chiqilmayotgani sifatida baholash to‘g‘ri emas.
OAK attestatsiya ishlarini o‘z vaqtida, xolis va sifatli ko‘rib chiqish, shuningdek, ilmiy daraja va ilmiy unvon talabgorlarining qonuniy manfaatlarini ta’minlashga doimo ustuvor ahamiyat qaratib keladi.
OAK Axborot xizmati
