Ўзбекистон Республикаси Президентининг 2026 йил 26 майдаги ПФ–98-сон Фармони билан янги авлод илмий кадрларини тайёрлаш ва уларни аттестация қилиш тизимини такомиллаштиришга қаратилган ислоҳотлар доирасида 2027 йил 1 январдан бошлаб илмий даражалар бериш тартибида муҳим ўзгаришлар жорий этилмоқда. Хусусан, илмий кенгашлар фаолияти самарадорлиги ва мустақиллигини ошириш мақсадида Олий аттестация комиссиясининг фан тармоқлари бўйича эксперт кенгашлари томонидан диссертацияларни илмий экспертизадан ўтказиш ҳамда ҳимоя қилинган диссертациялар бўйича илмий кенгаш қарорларини Раёсат қарори билан тасдиқлаш амалиёти бекор қилинади.

Бу эса илмий даражалар бериш жараёнида асосий масъулият илмий даражалар берувчи илмий кенгашлар ҳамда улар ҳузуридаги илмий семинарлар зиммасига босқичма-босқич ўтишини англатади. Шу муносабат билан диссертация ҳимоясига тақдим этиладиган ҳужжатларнинг, хусусан, диссертация ва диссертация авторефератининг белгиланган норматив-ҳуқуқий ҳужжатлар ва меъёрий-техник талабларга мувофиқ расмийлаштирилиши учун жавобгарликни босқичма-босқич илмий кенгаш ва илмий семинарлар зиммасига ўтказиш ва уларнинг шахсий масъулиятни янада кучайтириш талаб этилади.
Шу нуқтаи назардан, илмий семинарлар фаолиятини такомиллаштириш, авторефератларнинг мазмунан ва меъёрий-техник жиҳатдан сифатли экспертизадан ўтказилишини таъминлаш ҳамда мазкур жараёнда шахсий масъулиятни кучайтириш зарур. Зеро, 2027 йил 1 январдан диссертация ҳимояси тўғрисидаги эълонларни Олий аттестация комиссияси томонидан қабул қилиш ва эълон қилиш тартиби бекор қилинади.
Шунга кўра, Илмий кенгашлар томонидан жорий йилнинг сентябрь ойидан бошлаб ОАК веб-сайтида диссертация ҳимоясига эълон бериш учун тақдим этиладиган ҳужжатларнинг низом талабларига мос келиши, жумладан диссертация авторефератининг кириш қисми матни таҳрири, илмий янгилиги мазмун-моҳияти талабларга мувофиқ очиб берилиши, илмий натижаларнинг амалиётга жорий қилиниши, чоп этилган илмий ишларнинг мавжудлиги ва интернет тармоғида жойлаштирилганлигини холис ва шаффоф баҳолаш Илмий кенгашлар масъулиятига тўлиқ ўтказилади. Шунингдек, 2027 йил 1 январдан диссертация ҳимояси тўғрисидаги эълонларни ОАК томонидан қабул қилиш ва эълон қилиш тартиби ҳам бекор қилинади.
Шундан келиб чиқиб, барча олий таълим ва илмий ташкилотлар, шунингдек, улар ҳузуридаги илмий даражалар берувчи илмий кенгашлар ҳамда илмий семинарлар раҳбарияти ва аъзолари диссертация ҳимоясига оид ҳужжатларнинг тайёрланиши ва ОАКга тақдим этилишида белгиланган талабларга қатъий риоя этилишини таъминлаши зарур.
Мазкур талабларнинг тўлиқ бажарилиши илмий даражалар бериш жараёнининг очиқлиги, шаффофлиги ва сифатига хизмат қилади ҳамда келгусида илмий кенгашлар фаолияти самарадорлиги рейтингини баҳолашда муҳим мезонлардан бири ҳисобланади.

ОАК Ахборот хизмати