Шадиева Дилдора Хамидовнанинг
фалсафа доктори (PhD) диссертацияси ҳимояси ҳақида эълон

I.Умумий маълумотлар.
Диссертация мавзуси, ихтисослик шифри (илмий даража берадиган фан тармоғи номи): «Миллий иқтисодиётнинг инновацион ривожланишини инвестициялашнинг назарий асосларини такомиллаштириш», 08.00.01–Иқтисодиёт назарияси (иқтисодиёт фанлари).
Диссертация мавзуси рўйхатга олинган рақам: B2017.2.PhD/Iqt131.
Илмий раҳбар: Джураев Тошболта Тўхтаевич, иқтисодиёт фанлари доктори, профессор.
Диссертация бажарилган муассаса номи: Тошкент молия институти.
ИК фаолият кўрсатаётган муассаса номи, ИК рақами: Ўзбекистон Миллий университети, DSc.03.30.12.2019.I.01.11.
Расмий оппонентлар: Тухлиев Нурислом, иқтисодиёт фанлари доктори, профессор;  Шакирова Фароғат Болтаевна, иқтисодиёт фанлари бўйича фалсафа доктори (PhD).
Етакчи ташкилот номи: Тошкент давлат техника университети.
Диссертация йўналиши: назарий ва амалий аҳамиятга молик.
II. Тадқиқотнинг мақсади: миллий иқтисодиётнинг инновацион ривожланишини инвестициялашнинг назарий асосларини такомиллаштириш бўйича илмий таклиф ва амалий тавсиялар ишлаб чиқишдан иборат.
III. Тадқиқотнинг илмий янгилиги:
инновацион фаолиятни инвестициялаш манбаларининг маблағ киритиш шартларини қамраб олувчи янги таснифи ишлаб чиқилган ва унга асосан улар мақсадли қайтарилмайдиган, қарз муносабатларига асосланган ва улушли инвестицион таъминлаш манбаларига таснифланган;
миллий иқтисодиётга инвестицияларни самарали жалб этиш мақсадида инвестиция фондларини ташкил этиш ва уларнинг фаолиятини инновацион ишланмалар, инновацион ғоялар, стартап ва венчур лойиҳаларни инвестициялаш орқали такомиллаштириш бўйича таклифлар ишлаб чиқилган;
инновацион ривожланишни агрессив, корпоратив, консерватив инвестициялаш моделлари ва транзитив иқтисодиётлар модели асосида жаҳон инновация тизимидаги инвестицион оқимлар ҳаракатини ифодаловчи замонавий тенденциялар аниқланган;
иқтисодиёт тармоқларида инновацион фаолликни ошириш мақсадида интеллектуал мулк объектларини яратган ва ишлаб чиқаришга жорий этган мутахассисларни олинган иқтисодий самарага асосан табақаланган равишда рағбатлантириш тартиби ишлаб чиқилган.
IV.Тадқиқот натижаларининг жорий қилиниши.
Миллий иқтисодиётнинг инновацион ривожланишини инвестициялашнинг назарий асосларини такомиллаштириш бўйича олинган илмий натижалар асосида:
инновацион фаолиятни инвестициялаш манбаларининг янги ёндашув асосидаги таснифи давлат илмий-техника дастурлари доирасидаги фундаментал илмий лойиҳаларда фойдаланилган (Ўзбекистон Республикаси Вазирлар Маҳкамаси ҳузуридаги Фан ва технологияларни ривожлантиришни мувофиқлаштириш қўмитасининг 2017 йил 31 январдаги  03-13/100-сон маълумотномаси). Ушбу таклифни жорий этиш натижасида давлат илмий-техника дастурлари доирасида бажариладиган лойиҳалар учун инновацион ривожланиш йўлига ўтиш ва инновацион иқтисодиётни шакллантириш муаммосига бағишланган тадқиқотлар учун муҳим илмий манба яратилган;
миллий иқтисодиётга инвестицияларни самарали жалб этиш мақсадида инвестиция фондларини ташкил этиш ва уларнинг фаолиятини инновацион ишланмалар, инновацион ғоялар, стартап ва венчур лойиҳаларни инвестициялаш орқали такомиллаштириш борасидаги таклифлар 2015 йил 25 августда қабул қилинган Ўзбекистон Республикасининг “Инвестиция ва пай фондлари тўғрисида”ги қонунини ишлаб чиқишда фойдаланилган (Ўзбекистон Республикаси Олий Мажлиси Қонунчилик палатаси Бюджет ва иқтисодий ислоҳотлар қўмитасининг 2016 йил 28 июлдаги 04/1-66-120-сон маълумотномаси). Ушбу тавсия мамлакатимизда инвестиция фондларини турли манбалар ҳисобидан шакллантириш, мавжуд норматив-ҳуқуқий базани такомиллаштириш, инновацион фаолиятни инвестициялаш ҳамда нодавлат манбаларидан маблағларни жалб қилиш имконини берган;
инновацион ривожланишни агрессив, корпоратив, консерватив инвестициялаш моделлари ва транзитив иқтисодиётлар модели асосида жаҳон инновация тизимидаги аниқланган инвестицион оқимлар ҳаракатини ифодаловчи қонуниятлардан фундаментал илмий лойиҳаларни амалга оширишда фойдаланилган (Ўзбекистон Республикаси Вазирлар Маҳкамаси ҳузуридаги Фан ва технологияларни ривожлантиришни мувофиқлаштириш қўмитасининг 2017 йил 31 январдаги 03-13/100-сон маълумотномаси). Натижада миллий иқтисодиётни инновацион ривожлан-тириш стратегиясини амалга оширишда ва унда белгиланган вазифа - 2030 йилга қадар миллий иқтисодиёт Глобал инновацион индекс рейтинги бўйича жаҳоннинг 50 та илғор мамлакатлар қаторига киришига эришишда муҳим илмий манба яратилган;
иқтисодиёт тармоқларида инновацион фаолликни ошириш мақсадида интеллектуал мулк объектларини яратган ва ишлаб чиқаришга жорий этган мутахассисларни олинган иқтисодий самарага асосан табақаланган равишда рағбатлантириш тартиби борасидаги таклиф Навоий кон-металлургия комбинати фаолиятига жорий этилган (Ўзбекистон Республикаси Навоий кон-металлургия комбинати давлат корхонасининг 2016 йил 9 августдаги 02-06-11/8621-сон маълумотномаси). Ушбу таклифни амалиётга жорий этилиши  натижасида мавжуд минерал-хом ашё базасининг қувватини тўлдириш концепцияси такомиллаштирилди, 2030 йилгача ишлаб чиқаришнинг прогноз кўрсаткичлари ҳамда НКМК ва Қизилқум минтақасининг 2020 йилгача мўлжалланган ривожланиш стратегияси ишлаб чиқилган.