Олий аттестация комиссияси томонидан “Олий аттестация комиссиясида коррупцияга қарши кураш даражасини ўрганиш бўйича” аноним сўровнома ташкиллаштирилди ва унда умумий ОАК аппарати  ходимлари респондентлар сифатида иштирок этди.
Шунингдек, сўровнома натижалари таҳлил қилиниб, қуйидагилар маълум бўлди:
1. “Коррупция” деганда нимани тушунасиз?” деган саволга 
77,8% иштирокчи “Пора бериш”, “Пора олиш”, “Моддий манфаат олиш эвазига хизмат ваколатини суистеъмол қилиш”, 77,7% иштирокчи “Ғаразли мақсадда бошқа шахслар учун имтиёз яратиб бериш”,  33,4% иштирокчи “Шахсий мақсадларда бюджет маблағларини ўзлаштириш” ва 22,2% иштирокчи “Жазолаш орқали қўрқитиб, пул ундириш шакли” деган жавобларни белгилаган.
2. “Коррупциявий ҳолатларга дуч келган вақтингизда қандай йўл тутишни биласизми?” деган саволга 84,9% иштирокчи 
“Ҳа, биламан”, 15,1% - “Бу ҳақда тушунтиришлар олиб борилишини сўрайман” жавобларини белгилаган.
3. “Сиз фаолият олиб бораётган ташкилотда Коррупцияга қарши кураш ҳолатини қандай баҳолайсиз?” деган саволга иштирокчиларнинг 
66,7% “Аъло”, 22,2% - “Яхши” ва 11,1% - “Қониқарли” жавобларини белгилаган.
4. “Қайси қонун давлат хизматчиларининг ахлоқий қоидаларини белгилайди?” деган саволга 77,9% иштирокчи “Давлат хизмати тўғрисидаги қонун” ва 22,1% - “Коррупцияга қарши курашиш тўғрисидаги қонун” жавобларини белгилаган.
5. “Ўзбекистон Республикасининг Манфаатлар тўқнашуви тўғрисидаги Қонунига кўра, давлат хизматчисининг яқин қариндошларига кимлар киритилган?” деган саволга 55,6% иштирокчи “ота-оналар, ака-укалар, опа-сингиллар,ўғиллар, қизлар, эр-хотинлар, шунингдек ер-хотинларнинг ота-оналари, ака-укалари,опа-сингиллари ва фарзандлари”, 33,3% - “қариндош ёки қуда томондан қариндош бўлган шахслар, яъни ота-она, туғишган ва ўгай ака-ука ва опа-сингиллар, эр-хотин, фарзанд, шу жумладан фарзандликка олинганлар, бобо, буви, неваралар, шунингдек эр-хотиннинг ота-онаси, туғишган ва ўгай ака-ука ва опа-сингиллари” ва 11,1% - “та-оналар, ака-укалар, опа-сингиллар,ўғиллар, қизлар, эр-хотинлар, шунингдек ер-хотинларнинг ота-оналар” жавобларни белгилаган.
6. “Коррупциянинг олдини олиш мақсадида давлат хизматчиларига қандай таъқиқлар мавжуд?” деган саволга 77,8% - “тижорат фаолияти билан шуғулланиш”, 11,1% - “йиллик даромад декларацияси топшириш” ва  11,1% “чет элга чиқиш” каби жавобларни белгилаган.
Юқоридагиларни инобатга олиб, олий малакали илмий ва илмий-педагог кадрлар аттестацияси тизимида коррупциявий хавф-хатарларни эрта аниқлаш ва уларни келтириб чиқарувчи шарт-шароитларни бартараф этиш мақсадида қуйидагилар таклиф этилади:
1. Коррупцияга қарши курашиш бўйича олиб борилаётган тарғибот тадбирларида ходимларга “Манфаатлар тўқнашуви тўғрисида”, “Коррупцияга қарши курашиш тўғрисида”ги қонунларида келтирилган “коррупция”, “коррупцияга оид ҳуқуқбузарлик”, “манфаатлар тўқнашуви”, “шахсий манфаатдорлик”, “яқин қариндошлар” каби атамаларнинг мазмун-моҳиятини тушунтириб бориш ишларини изчил давом эттириш.
2. Коррупцияга қарши курашиш бўйича фаолиятни амалга оширувчи ва унда иштирок этувчи органлар ҳамда ташкилотларнинг коррупцияга қарши курашиш соҳасидаги ваколатлари тўғрисидаги маълумотларни доимий равишда етказиш ишларини ташкил қилиш
3. Соҳа вакиллари, жумладан ҳуқуқни муҳофаза қилувчи органлар вакилларини жалб этган ҳолда коррупцияга оид ҳуқуқбузарликларни содир этганлик учун қонунчиликда назарда тутилган мавжуд жавобгарлик тўғрисидаги профилактик тадбирларни ташкил этиш.