Мамлакатимизда таълим ва фан соҳаларини сифат жиҳатидан янги босқичга олиб чиқиш, илмий ҳамда илмий-педагог кадрларни тайёрлаш ва уларни аттестация қилиш тизимини такомиллаштиришга қаратилган кенг кўламли ислоҳотлар изчил амалга оширилмоқда.
Шу муносабат билан, 7.07.2026 й. куни Олий аттестация комиссиясида педагогика фанлари бўйича илмий даражалар берувчи илмий кенгашлар илмий котиблари иштирокида ҳамда онлайн тарзда танқидий-таҳлилий йиғилиш ўтказилди.
Йиғилишда Ўзбекистон Республикаси Президентининг 2026 йил 26 май куни қабул қилинган “Янги авлод илмий кадрларини тайёрлаш ва уларни аттестация қилиш тизимини такомиллаштириш тўғрисида”ги Фармони ижроси доирасида амалга оширилаётган чора-тадбирлар ва амалиётга татбиқ этилаётган янгиликлар юзасида кенг маълумот берилди.

Хусусан, илмий кенгашлар фаолиятини амалдаги низомлар талаблари асосида ташкил этиш, диссертациялар сифатини ошириш, аттестация ҳужжатларини белгиланган тартиб ва талабларга мувофиқ расмийлаштириш, ёш тадқиқотчилар учун қулай шарт-шароитлар яратиш, уларни ҳар томонлама қўллаб-қувватлаш ҳамда илмий аттестация жараёнларида очиқлик ва шаффофликни таъминлашга қаратилган ишлар атрофлича таҳлил қилинди.
Йиғилиш давомида аттестация ишларини тақдим этишда айрим илмий кенгашлар томонидан йўл қўйилаётган тизимли камчиликлар мавжуд диссертация ишлари ва аттестация ҳужжатлари мисолида танқидий таҳлил қилинди. Шу билан бирга, мазкур камчиликларни бартараф этиш бўйича илмий-методик ва амалий тавсиялар ҳамда аниқ кўрсатмалар берилди.
Таъкидланганидек, билдирилган таклиф ва тавсияларнинг амалиётга татбиқ этилиши илмий котиблар фаолияти самарадорлигини ошириш, аттестация жараёнларини сифат жиҳатидан янада такомиллаштириш ва ҳужжатларни белгиланган талаблар асосида расмийлаштиришда муҳим аҳамият касб этади.
Йиғилиш якунида иштирокчилар томонидан берилган саволларга масъул ходимлар томонидан батафсил жавоблар ва ҳуқуқий-амалий тушунтиришлар берилди.

ОАК Ахборот хизмати