2026 йил 22 июнда қабул қилинган ЎРҚ-1155-сон Қонун мамлакатимизда коррупцияга қарши курашиш тизимини янада кучайтириш, коррупциявий жиноятлар учун жавобгарлик муқаррарлигини таъминлаш ҳамда давлат органлари фаолиятида шаффофликни оширишга қаратилган муҳим ҳуқуқий ҳужжат ҳисобланади.
Қонунга мувофиқ, коррупцияга оид жиноятларни содир этган шахсларнинг махсус электрон реестри юритилади. Ушбу реестрга киритилган шахсларга бир қатор ҳуқуқий чекловлар қўлланилади. Хусусан, давлат хизматига қабул қилиниши, сайланадиган ва айрим масъул лавозимларга номзод этиб кўрсатилиши, давлат харидлари ва давлат-хусусий шериклик лойиҳаларида иштирок этиши чекланади. 
Бу механизм коррупция учун жазо нафақат жиноий жавобгарлик, балки муайян ҳуқуқий оқибатларга ҳам олиб келишини таъминлайди.
Шунингдек, Қонун билан Жиноят кодексида “коррупцияга оид жиноятлар” атамасига аниқ ҳуқуқий таъриф киритилди. Бунда коррупцияга оид деб эътироф этиладиган 18 турдаги жиноятлар рўйхати белгиланди. Бу ҳуқуқни қўллаш амалиётида ягона ёндашувни шакллантириш, статистик ҳисоботларни юритиш ва жавобгарлик чораларини аниқ белгилашга хизмат қилади.
Қонун билан коррупция хавфларини барвақт аниқлаш ва олдини олишга қаратилган комплаенс ҳамда коррупцияга қарши ички назорат тузилмаларининг ҳуқуқий мақоми белгилаб берилди. Эндиликда мазкур тузилмаларнинг ваколатлари, ҳуқуқлари, мажбуриятлари, мустақил фаолият юритиш кафолатлари қонун даражасида мустаҳкамланди.
Бу эса давлат органлари ва ташкилотларда коррупциянинг олдини олиш бўйича ички назорат механизмларининг самарадорлигини оширишга хизмат қилади.
Умуман олганда, мазкур Қонун коррупцияга қарши курашишда жазолашдан кўра унинг олдини олиш, мансабдор шахсларнинг масъулиятини кучайтириш ва давлат бошқарувида ҳалоллик тамойилларини қарор топтиришга қаратилгани билан аҳамиятлидир. 

ОАК Ахборот хизмати