2026-yil 19-iyun kuni Oliy attestatsiya komissiyasi tomonidan ilmiy izlanuvchilarga amaliy ko‘mak berish, ularning xalqaro ilmiy nashrlarda maqola chop etish bo‘yicha bilim va ko‘nikmalarini oshirish maqsadida “Scopus va Web of Science jurnallarida maqola chop etishning zamonaviy talablari va amaliyoti” mavzusida Telegram platformasi orqali ovozli chat shaklida ochiq muloqot tashkil etildi.
Muloqotni OAK Axborot xizmati rahbari Bahodir Jovliev olib bordi. Tadbirda ilmiy tadqiqot natijalarini xalqaro ilmiy hamjamiyatga taqdim etish, nufuzli ilmiy bazalarga kiruvchi jurnallarda maqola e’lon qilishning zamonaviy talablari, maqola tayyorlash jarayonida uchraydigan muammolar va ularning echimlari yuzasidan batafsil ma’lumotlar berildi.
Ochiq muloqotning asosiy ma’ruzachisi sifatida xalqaro ilmiy nashrlar bilan ishlash bo‘yicha katta tajribaga ega mutaxassis, Toshkent davlat yuridik universiteti professor v.b., pedagogika fanlari doktori Soliha Allayarova “Ijtimoiy-gumanitar fanlarda xalqaro ilmiy nashrlar: Scopus va Web of Science jurnallarida maqola chop etishning zamonaviy talablari va amaliyoti” mavzusida taqdimot qildi.
Taqdimot davomida ilmiy maqola mavzusini to‘g‘ri tanlash, tadqiqot metodologiyasini asoslash, xalqaro nashrlar talablariga mos ilmiy maqola tayyorlash, jurnal tanlash mezonlari, taqriz jarayonlari hamda maqolalarning rad etilishiga sabab bo‘ladigan omillar haqida amaliy tavsiyalar berildi. Shuningdek, so‘nggi yillarda xalqaro ilmiy nashrlar sohasida kuzatilayotgan tendensiyalar va ilmiy etika masalalariga ham alohida e’tibor qaratildi.
Muloqotning savol-javob qismida izlanuvchilar tomonidan berilgan ko‘plab savollarga mutaxassislar tomonidan amaliy tajribalarga asoslangan batafsil javoblar berildi. Ishtirokchilar, ayniqsa, maqolalarni xalqaro jurnallarga yuborish tartibi, jurnal tanlash, sun’iy intellekt vositalaridan foydalanish hamda ilmiy natijalarni xalqaro miqyosda targ‘ib qilish masalalari bo‘yicha o‘zlarini qiziqtirgan savollarga javob oldilar.
Ta’kidlanganidek, ilmiy tadqiqotlar natijasida olingan ilmiy yangiliklarni xalqaro ilmiy nashrlarda maqola sifatida e’lon qilish ko‘nikmalari oliy ta’lim va ilmiy tashkilotlarda ilmiy darajaga da’vogarlik jarayonidan avval shakllantirilishi, bu boradagi ishlar tizimli va maqsadli yo‘lga qo‘yilishi zarur. Xalqaro ilmiy nashrlarda faol ishtirok etish ilmiy tadqiqotlar sifati, ularning xalqaro ko‘rinuvchanligi hamda mamlakat ilm-fanining global ilmiy makondagi nufuzini oshirishga xizmat qiladi.
Mazkur seminar O‘zbekiston Respublikasi Prezidentining “Yangi avlod ilmiy kadrlarini tayyorlash va ularni attestatsiya qilish tizimini takomillashtirish to‘g‘risida”gi hujjatida belgilangan vazifalar ijrosini ta’minlash, yosh tadqiqotchilar va ilmiy izlanuvchilarning xalqaro ilmiy faoliyatini qo‘llab-quvvatlash maqsadida tashkil etildi. Tadbir ilmiy jamoatchilik tomonidan katta qiziqish bilan kutib olinib, izlanuvchilar uchun foydali amaliy muloqot maydoniga aylandi.
OAK Axborot xizmati.
