O‘zbekiston Respublikasi Fanlar akademiyasi huzuridagi Oliy attestatsiya komissiyasi Rayosatining 2026 yil 10 iyundagi tegishli qaroriga muvofiq «Development of science» ilmiy jurnali texnika va kimyo fanlari bo‘yicha «Dissertatsiyalar asosiy ilmiy natijalarini chop etish tavsiya etilgan milliy ilmiy nashrlar ro‘yxati»dan chiqarildi.
Tegishli ekspert kengashlari tomonidan o‘tkazilgan tahlillar natijasida mazkur jurnalda chop etilgan maqolalarning sezilarli qismi ilmiy nashrlarga qo‘yiladigan ilmiy etiket va umumiy texnik talablariga to‘liq javob bermasligi, tadqiqot natijalarining ilmiy yangiligi va nazariy-amaliy ahamiyati etarli darajada asoslanmaganligi kabi holatlariga yo‘l qo‘yilganligi aniqlandi.
Mazkur qaror ilmiy tadqiqotlar sifati va natijadorligini oshirish, dissertatsiya ishlarining asosiy ilmiy natijalarini e’lon qilishda yuqori akademik standartlarni ta’minlash, ilmiy etika tamoyillariga qat’iy rioya qilish hamda mamlakatimizda sog‘lom va raqobatbardosh ilmiy muhitni shakllantirishga qaratilgan tizimli chora-tadbirlarning mantiqiy davomi hisoblanadi.
Oliy attestatsiya komissiyasi tomonidan milliy ilmiy jurnallar faoliyatini baholash va monitoring qilish ishlari izchil davom ettiriladi. Ilmiy nashrlar faoliyatida sifat mezonlari, tahririy siyosat, taqrizlash tizimi va ilmiy etika talablariga rioya etilishi doimiy nazoratda bo‘lib, belgilangan talablarga javob bermaydigan nashrlarga nisbatan tegishli choralar ko‘riladi.

OAK Axborot xizmati