12 март куни Олий аттестация комиссияси раиси А.Т.Юсупов Сурхондарё вилоятида хизмат сафарида бўлиб, Термиз давлат университети, Термиз иқтисодиёт ва сервис институти ҳамда куннинг иккинчи ярмида Термиз муҳандислик ва агротехнологиялар университети ва Термиз давлат педагогика институтининг илмий-педагогик жамоаси ҳамда ёш илмий тадқиқотчилари билан учрашув ва сайёр қабуллар ташкил этди.
Тадбирлар давомида Ўзбекистон Республикаси Президентининг ташаббуси билан ҳар ҳафтанинг пайшанба куни “Ёшлар куни” этиб белгилангани муносабати билан олий таълим муассасаларининг ёш илмий тадқиқотчилари билан ҳам алоҳида мулоқотлар ўтказилди.
Илмий жамоатчилик ва ёшлар билан учрашувларда олий таълим муассасаларининг 320 нафар, шундан 35 ёшгача бўлган 290 нафар ёш тадқиқотчиси иштирок этди. Эътиборлиси, юртимизда хотин-қизларнинг давлат ва жамият ҳаётидаги фаоллигини ошириш, айниқса уларнинг таълим олиши ва илм-фан соҳаларидаги фаолиятини қўллаб-қувватлаш борасида амалга оширилаётган кенг кўламли чора-тадбирларга ҳамоҳанг равишда “Аёлларни эъзозлаш” ойлиги доирасида илмий-педагогик фаолият олиб бораётган аёл-қизлар фаолияти, уларни қизиқтирган масалаларга ҳам алоҳида эътибор қаратилди. Мазкур тадбирларда 228 нафар аёл-қизларнинг фаол иштирок этгани ҳам ёшлар таълим-тарбияси, илм-фан соҳаларида билимли ва илғор хотин-қизлар фаоллиги ошиб бораётганини кўрсатмоқда.
Ялпи учрашувларда маърузачилар томонидан “Ўзбекистон-2030” стратегияси доирасида мамлакатимизда илм-фанни ривожлантириш, ёш олимларни қўллаб-қувватлаш, янги илмий тадқиқотларнинг амалий аҳамияти ва самарадорлигини янада оширишга муҳим аҳамият қаратилаётгани таъкидланди. Буни олиб борилаётган ислоҳотлар таркибида олий малакали илмий ва илмий-педагог кадрлар аттестацияси тизимининг сифати ва самарадорлигини ошириш борасида татбиқ этилаётган янгиликлар ва уларнинг натижалари мисолида ҳам кўриш мумкин.
Шунга кўра йиғилишда диссертация тадқиқотлари сифатини ошириш, илмий кенгашлар фаолиятини низомлар талаблари асосида ташкил этиш, коррупцион ҳолатларга йўл қўймаслик ва аттестация ҳужжатларини белгиланган талаблар асосида расмийлаштириш каби масалалар атрофлича муҳокама қилинди ва амалий тажрибалар асосида тегишли услубий тавсиялар берилди.
Очиқ ва самимий тарзда ўтказилган учрашув ва мулоқотларда 51 та саволга тушунтириш берилди, 11 нафар тадқиқотчига жойида услубий ёрдам кўрсатилди. Сайёр қабуллар давомида 3 нафар тадқиқотчи 3 та масала юзасидан оғзаки мурожаат қилиб, уларга низомлар талаблари асосида жойида батафсил тушунтиришлар берилди.
Албатта, бу каби учрашувлар жойларда илмий фаолият олиб бораётган ёшлар ва аёл-қизларнинг илмий фаолиятини қўллаб-қувватлаш, уларнинг давлат ва жамият ҳаётидаги фаоллигини ошириш ҳамда она-Ватанимиз тараққиётига муносиб ҳисса қўшиш туйғусини кучайтиришда муҳим аҳамият касб этмоқда.
ОАК Ахборот хизмати
