ОАК раҳбарияти томонидан илмий жамоатчилик билан ўтказилган учрашув ва сайёр
қабул (11.02.2026 й.) бўйича маълумотнома
Юртимизда давлатимиз раҳбари томонидан таълим ва илм-фан соҳаларини ривожлантириш, ёшлар ва аёл-қизларнинг замонавий талаблар асосида илм-фан сирларини ўрганиши ҳамда фундаментал илмий-инновацион лойиҳалар бўйича долзарб йўналишларда илмий тадқиқотлар олиб бориши учун катта эътибор қаратилмоқда.
Ушбу жараёнларда илмий тадқиқотчилар учун қулай шарт-шароитлар яратиш ҳамда аттестация жараёнларида очиқлик ва шаффофликни таъминлаш муҳим аҳамият касб этади. Бунда илмий жамоатчилик ва масъул ташкилотлар билан мунтазам равишда бевосита мулоқотнинг ўрни муҳим.
ОАК раҳбарияти томонидан 11.02.2026 й.да Навоий давлат университетида Навоий инновациялар университети, Profi universityнинг Навоий вилояти филиали ҳамда Навоий давлат кончилик ва технологиялар университетида Шарқ университетининг илмий-педагогик жамоалари ҳамда ёш илмий тадқиқотчилар билан учрашувлар ва сайёр қабуллар ташкил этилди.
Учрашув аввалида Олий аттестация комиссияси раиси А.Т.Юсупов барча иштирокчилар қаторида илмий-педагогик фаолият олиб бораётган аёл-қизларни
11 феврал — “Илм-фан соҳасидаги аёллар ва қизлар халқаро куни” билан муборакбод этди. Зеро, мамлакатимизнинг барча таълим муассасалари ва илмий ташкилотларида илмий жамоатчилик томонидан мазкур байрам кенг тантана қилиниши анъанага айланиб улгурган. Бу юртимизда аёл-қиз олималарнинг илм-фан соҳасидаги фаолияти кенгайиб бораётгани ва улар учун давлатимиз томонидан кенг миқёсли имкониятлар яратилиб, тизимли қўллаб-қувватлаш ишлари олиб борилаётганидан далолат.
Очиқ мулоқот ва услубий-амалий семинар шаклида ўтказилган мазкур учрашувларда олий малакали илмий ва илмий-педагог кадрларни аттестациядан ўтказиш, илмий даража ва илмий унвонлар бериш тартиблари, ОАКнинг ваколат ва функциялари, илмий даражалар берувчи илмий кенгашлар ҳамда илмий семинарлар фаолиятини ташкил этиш юзасидан атрофлича маълумот берилди. Шунингдек, диссертация ишларини ташкил этиш, ҳимоя жараёнлари ва аттестация тизимида амалга оширилаётган рақамлаштириш жараёнлари, шаффофлик ва сифат назоратини кучайтиришга қаратилган янгиликлар муҳокама қилинди.
Сайёр қабулларда Навоий вилоятида фолият кўрсатаётган юқоридаги олий таълим ташкилотларининг 305 нафар, шундан 265 нафар ёш тадқиқотчи иштирок этди. Тадбирда 21 та саволга тушунтиришлар берилди ҳамда 10 нафар тадқиқотчига жойида услубий-амалий ёрдам кўрсатилди.
Сайёр қабул давомида 1 нафар тадқиқотчи мурожаат қилиб (ёзма), унинг томонидан 1 та масала кўтарилди. Очиқ мулоқотда тегишли масала юзасидан ҳам норматив-ҳуқуқий ҳужжатлар асосида батафсил тушунтириш берилди.
(Ўрганиш жараёнида бўлган, узоқ муддатли назоратга олинган ва рад жавоби ҳамда жамоавий мурожаатлар мавжуд эмас. Навоий вилоятида фаолият кўрсатаётган олий таълим ва илмий ташкилотларда илмий изланиш олиб бораётган тадқиқотчилар томонидан ЎзР Президенти Виртуал қабулхонасига мурожаат йўлланмаган).
Очиқ мулоқот шаклида ўтказилган учрашувлар якунида илмий изланувчиларни қизиқтирган барча саволларга атрофлича жавоб берилди ва услубий ёрдамлар кўрсатилди.
ОАК ахборот хизмат
