Мирзаев Джонрид Абдиахатовичнинг
фалсафа доктори (PhD) диссертация ҳимояси ҳақида эълон 

I. Умумий маълумотлар.
Диссертация мавзуси, ихтисослик шифри (илмий даража бериладиган фан тармоғи номи): “Гидродинамик ва иссиқлик жараёнларини жадаллаштириш ҳисобига кўмир ёқиладиган қозон агрегатларининг иш самарадорлигини ошириш”, “05.05.04 – “Саноат иссиқлик энергетикаси” (техника фанлари). 
Диссертация мавзуси рўйхатга олинган рақам: В.2025.1.PhD/Т771
Илмий раҳбар: Бабаходжаев Раҳимжон Пачеханович, техника фанлари доктори, профессор, 
Диссертация бажарилган муассаса номи: Тошкент давлат техника университети. 
ИК фаолият кўрсатаётган муассаса номи, ИК рақами: Тошкент давлат техника университети, DSc.03/2025.28.11.Т.02.01.
Расмий оппонентлар: Узоқов Ғуломжон Норбоевич, техника фанлари доктори, профессор; Шоисломов Алишер Шоабдураҳмонович, техника фанлари номзоди, профессор. 
Етакчи ташкилот: “Иссиқликелектрлойиҳа” АЖ
Диссертация йўналиши: назарий ва амалий аҳамиятга молик.
II. Тадқиқотнинг мақсади: юқори кул миқдорига эга қўнғир кўмирни ёқиш жараёнида гидродинамик ва иссиқлик жараёнларини жадаллаштириш орқали қозон агрегатларининг ўтхона қурилмаси ва конвектив иссиқлик алмашиниш юзаларини такомиллаштириш.
III. Тадқиқотнинг илмий янгилиги:
кўмир ёқадиган иситиш қозони ўтхонасига сопло ва тутун гази каналига сферасимон чуқурчали иссиқлик алмашинув юзалари ўрнатилиши туфайли гидродинамик режимни ўзгартириш ва турбулентликни ошириш натижасида иссиқлик алмашинув жараёнини жадаллаштирувчи қурилма конструкцияси такомиллаштирилган;
муаллақ қатламнинг асосий параметрлари ўртасидаги боғлиқликни ҳисобга олган ва ишлов берилаётган материалларнинг иссиқлик - физик хоссаларига асосланиб турғун қайнаш жараёни бошланишининг критик тезлиги ва газ – қаттиқ заррача аралашмаси босимининг йўқотилишини ҳисоблаш имконини берувчи фавворали қайнаш қатламининг математик модели такомиллаштирилган;
фавворали қайнаш қатлами аппаратида газ фазасининг критик тезлиги ва газ–қаттиқ заррачалар аралашмасида босим йўқотилишини аниқлашга имкон берувчи, заррача параметрлари ва фазавий нотексликни ҳисобга олувчи эмпирик тенгламалар кўринишидаги қонуниятлар аниқланган;
рекуператив қурилмалар учун турбулизаторнинг геометрик параметрларини тўлиқ ҳисобга олувчи ва иссиқлик алмашинув самарадорлигини нисбий Нусселт мезони (Ну/Ну₀) орқали баҳоловчи, газ оқимининг турбулентлик даражасини инобатга олувчи формула таклиф этилган.
IV. Тадқиқот натижаларининг жорий қилиниши. Иссиқлик ташувчилар оқимлари учун турбулизацияловчи юзалар (деворлар)ни қўллаш орқали гидродинамик ва иссиқлик жараёнларини жадаллаштириш ҳисобига ўрта ва кичик қувватли кўмир ёқадиган қозонларда ёқилғидан фойдаланиш самарадорлигини ошириш ва уларнинг иш режимларини бошқариш бўйича олинган илмий натижалар асосида: 
иссиқлик алмашинув жараёнини жадаллаштирувчи қурилма “Ангрен иссиқлик энергияси” ДУКда жорий қилинган (Ўзбекистон Республикаси Уй-жой ва коммунал хизмат кўрсатиш вазирлигининг 2022-йил 9-сентябрдаги 04/05-4554-сонли маълумотномаси). Натижада, фавворали қайнаш қатлами асосидаги янги қозон агрегатларини ўрнатиш ва эксплуатация қилиш ҳисобига обектларда йиллик фойда 183,7 миллион сўмни ташкил этган; 
кичик қувватли кўмир ёқадиган қозонларда гидродинамик жараёнларни жадаллаштириш ҳисобига ёқилғи ва энергия ресурсларидан фойдаланиш самарадорлигини ошириш усули “Ангрен иссиқлик энергияси” ДУКга жорий қилинган (Ўзбекистон Республикаси Уй-жой ва коммунал хизмат кўрсатиш вазирлигининг 2022-йил 9-сентябрдаги 04/05-сонли маълумотномаси). Натижада, илмий натижаларни амалиётга татбиқ этиш орқали обектларда йилига 467,0 тонна миқдорида кўмир ёқилғисини тежаш имконини берган.