Oripov Dastonbek Dilshodbek o‘g‘li
falsafa doktori (PhD) dissertatsiyasi himoyasi haqida e’lon

I. Umumiy ma’lumotlar: 
Dissertatsiya mavzusi, ixtisoslik shifri (ilmiy daraja beriladigan fan tarmog‘i nomi): “4n-tartibli xususiy hosilali buziladigan differensial tenglamalar uchun boshlang‘ich-chegaraviy masalalar”, 01.01.02-Differensial tenglamalar va matematik fizika (fizika-matematika fanlari).
Dissertatsiya mavzusi ro‘yxatga olingan raqam: №B 2025.1.PhD/FM1226
Ilmiy rahbarlar: Urinov Axmadjon Kushakovich, fizika-matematika fanlari doktori, professor,
Karimov Kamoliddin To‘ychiboevich, fizika-matematika fanlari doktori (DSc), dotsent.
Dissertatsiya bajarilgan muassasa nomi: Farg‘ona davlat universiteti.
IK faoliyat ko‘rsatayotgan muassasa nomi, IK raqami: Farg‘ona davlat universiteti, PhD.03/2025.27.12.FM.10.04.
Rasmiy opponentlar: Kadirkulov Baxtiyar Jalilovich, fizika-matematika fanlari doktori, dotsent; Irgashev Baxrom Yusupxonovich, fizika-matematika fanlari nomzodi, dotsent.
Yetakchi tashkilot: Termiz davlat universiteti.
Dissertatsiya yo‘nalishi: nazariy ahamiyatga molik.
II. Tadqiqotning maqsadi. To‘g‘ri to‘rtburchak sohada buziladigan 4n-tartibli xususiy hosilali differensial tenglamalar uchun boshlang‘ich-chegaraviy masalalarni qo‘yish va o‘rganish hamda ushbu masalalarni tadqiq etish usullarini ishlab chiqishdan iborat.
III. Tadqiqotning ilmiy yangiligi quyidagilardan iborat:
buziladigan 4n-tartibli model tenglamalar uchun qo‘yilgan birinchi chegaraviy shartli boshlang‘ich-chegaraviy masalalarning korrektligi Fure va Grin funksiyalar usuli hamda integral tenglamalar nazariyasi usullaridan foydalanib asoslangan;
yuqori juft tartibli buziladigan differensial tenglamalar uchun nolokal shartli boshlang‘ich-chegaraviy masalalar echimlarining mavjudligi, yagonaligi hamda turg‘unligiga oid teoremalar Fure usulidan foydalanib isbotlangan; 
4n-tartibli buziladigan tenglamalar uchun yangi uchinchi chegaraviy shartli boshlang‘ich-chegaraviy masalalarning bir qiymatli echilishini ta’minlaydigan shartlar Fure usuli yordamida bir qiymatli aniqlangan;
vaqt o‘zgaruvchisi bo‘yicha Bessel operatori qatnashgan yuqori juft tartibli buziladigan differensial tenglamalar uchun qo‘yilgan lokal va uchinchi chegaraviy shartli boshlang‘ich-chegaraviy masalalarning korrektligi Fure va Grin  funksiyalari usuli hamda integral tenglamalar nazariyasi usulidan foydalanib isbotlangan. 
IV. Tadqiqot natijalarining joriy qilinishi. 4n-tartibli xususiy hosilali buziladigan differensial tenglamalar uchun boshlang‘ich-chegaraviy masalalarni tadqiq qilish bo‘yicha olingan natijalar asosida:
yuqori juft tartibli buziladigan xususiy hosilali differensial tenglamalar uchun boshlang‘ich-chegaraviy masalalar echimining mavjudligi, yagonaligi va turg‘unligi bo‘yicha olingan natijalardan 374874-2022 raqamli “Fazali o‘tish masalalari va kritik hodisalari. Matematik jihatlari va ularning tenglamalari tez o‘tishlar va asimptotikalari” nomli xorijiy loyihada yuqori tartibli tenglamalar uchun chegaraviy masalalarni echishda foydalanilgan (Qirg‘iziston Respublikasi O‘sh Davlat universitetining 2025-yil 23-oktyabrdagi №1435-sonli ma’lumotnomasi). Natijada, yuqori tartibli tenglamalar uchun yangi masalalarning aniq echimini topish imkonini bergan;
yuqori juft tartibli buziladigan xususiy hosilali differensial tenglamalar uchun masalalar echimining korrektligi bo‘yicha olingan natijalar 125031904188-2 raqamli “Matematik fizikaning lokal va nolokal tenglamalari uchun chegaraviy va optimal boshqaruv masalalari” mavzusidagi ilmiy tadqiqot ishlarida foydalanilgan (Rossiya Fanlar akademiyasi Kabardino-Balkar ilmiy markazining Amaliy matematika va avtomatlashtirish institutining 2025-yil 6-noyabrdagi № 01-13/99-sonli ma’lumotnomasi). Natijada, yuqori juft tartibli xususiy hosilali buziladigan tenglamalar uchun masalalarning echimlarini topish imkonini bergan.