Омонов Набижон Нормаматовичнинг

фалсафа доктори (PhD) диссертацияси ҳимояси ҳақида эълон

I. Умумий маълумотлар.

Диссертация мавзуси, ихтисослик шифри (илмий даража бериладиган фан тармоғи номи): «Ғўза навларига мосланувчанлиги оширилган пахта териш аппаратлари яратишнинг илмий-техник ечимлари», 05.07.01–Қишлоқ хўжалиги ва мелиорация машиналари. Қишлоқ хўжалиги ва мелиорация ишларини механизациялаш.

Диссертация мавзуси рўйхатга олинган рақам: B2019.1.PhD/Т420.

Илмий раҳбар: Абдазимов Анвар Даниярович, техника фанлари доктори, доцент.

Диссертация бажарилган муассаса номи: Тошкент давлат техника университети.

ИК фаолият кўрсатаётган муассаса номи, ИК рақами: Тошкент ирригация ва қишлоқ хўжалигини механизациялаш муҳандислари институти, DSс.27.06.2017.Т.10.01.

Расмий оппонентлар: Шаймарданов Бахтиёр Пардаевич, техника фанлари доктори, профессор; Усаров Саъдулла, техника фанлари номзоди.

Етакчи ташкилот: «BMKB-Agromash» АЖ.

Диссертация йўналиши: назарий ва амалий аҳамиятга молик.

II. Тадқиқотнинг мақсади: янги районлаштирилганва истиқболли ғўза навларига мосланувчанлиги оширилган пахта териш аппаратлари яратишнинг илмий-техник ечимларини ишлаб чиқишдан иборат.

III. Тадқиқотнинг илмий янгилиги:

пахта териш машинасининг агротехник кўрсаткичларини аниқлашнинг тезкор усули ишлаб чиқилган;

пахта териш машинаси териш аппарати кириш қисмининг кенглиги шпинделли барабан радиуси, шпинделларнинг барабанда жойлашиш марказий бурчаги, ишчи тирқиш кенглигининг мақбул чегаравий қийматлари ғўза тупини ишчи камерага эгилиб кирмаслик шартини ҳисобга олган ҳолда аниқланган;

териш аппарати барабанидаги шпинделлар сонининг рационал қийматлари машина ишчи тезлиги, шпинделли барабаннинг параметрлари ва шпинделнинг ғўза қаторига ишлов бериш даражасини ҳисобга олган ҳолда аниқланган;

териш аппаратларини машинада фронтал жойлаштиришнинг схема ва параметрлари аппарат ишчи органларининг ўлчамлари ва ғўза қатори кенглиги ҳамда териш аппаратига қулай техник қаров масофасини ҳисобга олган ҳолда асосланган;

пахта териш машиналари самарадорлигини ошириш имконини берувчи автоматик назорат ва бошқариш тизимлари учун кириш катталиклари ғўза тупи ва кўсаклар ўлчамлари орасидаги корреляцион боғлиқликлар асосида аниқланган.

IV. Тадқиқот натижаларининг жорий қилиниши.

ғўза навларига мосланувчанлиги оширилган пахта териш аппаратлари яратишнинг илмий-техник ечимларини ишлаб чиқиш бўйича тадқиқотларда олинган натижалар асосида:

пахта териш машинасининг агротехник кўрсаткичларини тезкор аниқлаш усулига Интеллектуал мулк агентлигининг ихтиро патенти олинган («Пахта териш машинасининг агротехник кўрсаткичларини аниқлаш усули», №IAP 05123, 2015 й.). Натижада дала агрофони ва машина агротехник кўрсаткичларини аниқлаш муддатини 1,5-2 мартага, синовларни ўтказишга кетадиган сарф харажатларни 25-30 фоизга камайтириш имконини берган;

пахта ҳосилини теришда ғўза навларига мосланувчанлиги оширилган териш аппаратларининг конструкцияси ҳамда уларни ғўза қатори оралиғига фронтал жойлаштириш схемаси Тошкент қишлоқ хўжалиги техникаси заводида жорий этилган («O’zagrotexsanoatxolding» акциядорлик жамиятининг 2019 йил 2 апрелдаги МК-19-15/546-сон маълумотномаси). Натижада муайян ғўза навлар ҳосилини теришга мослашган аппаратларга эга пахта териш машиналарини ишлаб чиқиш имкони яратилган;

вертикал шпинделли пахта териш машинаси замонавий автоматик назорат ва бошқариш қурилмаларини ишлаб чиқаришни ўзлаштириш учун лойиҳа-конструкторлик ҳужжатлари «МКБ Трактор» унитар корхонасида лойиҳалаш жараёнига жорий этилган («O’zagrotexsanoatxolding» акциядорлик жамиятининг 2019 йил 2 апрелдаги МК-19-15/546-сон маълумотномаси). Натижада терим жараёнида пахта териш машинасининг ишчи қисмлари ишлашини назорат қилиб бориш, машинада терим тўлиқлигини 3-5 фоизга ошириш ва терилган ҳосилнинг сифат кўрсаткичларини Давлат стандарти талаблари даражасида бўлишини таъминлаш имкони яратилган.