Umaralieva Nargiza Tashkinbaevna
falsafa doktori (PhD) dissertatsiyasi himoyasi haqida e’lon

I. Umumiy ma’lumotlar: 
Dissertatsiya mavzusi, ixtisoslik shifri (ilmiy daraja beriladigan fan tarmog‘i nomi): “Boshqaruv funksiyalari turli chegaralanishli dinamik o‘yinlar va ularning animatsion modellari”, 01.01.02-Differensial tenglamalar va matematik fizika (fizika-matematika fanlari).
Dissertatsiya mavzusi ro‘yxatga olingan raqam: № B2024.4.PhD/FM337
Ilmiy rahbar: Samatov Baxrom Tadjiaxmatovich, fizika-matematika fanlari doktori, professor.
Dissertatsiya bajarilgan muassasa nomi: Namangan davlat universiteti.
IK faoliyat ko‘rsatayotgan muassasa nomi, IK raqami: Farg‘ona davlat universiteti, PhD.03/30.12.2019.FM.05.04.
Rasmiy opponentlar: Mamadaliev Numanjon Alimdjanovich, fizika-matematika fanlari doktori, professor;  Ibaydullaev Tulanboy Tursunbaevich fizika-matematika fanlari nomzodi, professor.
Yetakchi tashkilot: Termiz davlat universiteti.
Dissertatsiya yo‘nalishi: nazariy ahamiyatga molik.
II. Tadqiqotning maqsadi boshqaruv funksiyalariga qo‘yilgan turli xil chegaralanishlar, jumladan, geometrik, yig‘indi va Langenhop tipidagi chegaralanishlarga ega dinamik quvish-qochish masalalarini hal qilishdan iborat.
III. Tadqiqotning ilmiy yangiligi quyidagilardan iborat:
boshqaruv funksiyalari geometrik chegaralanishga ega bo‘lgan, ko‘p quvlovchi va bitta qochuvchili diskret o‘yinda quvish masalasini echish uchun quvlovchilar tomonidan qo‘llaniladigan parallel yaqinlashish usuli (Π-strategiya) asosida kafolatlovchi etarli shartlar topilib, o‘yinning 2D animatsion modeli ishlab chiqilgan.
boshqaruv funksiyalari yig‘indi chegaralanishga ega bo‘lgan, sodda harakatli diskret o‘yinda quvish masalasi echilishi uchun tutishni kafolatlovchi etarli shartlar quvlovchi tomonidan qo‘llaniladigan parallel yaqinlashish usuli (Π-strategiya)dan foydalanib topilgan;
boshqaruv funksiyalari Langenhop tipidagi chegaralanishga ega bo‘lgan differensial o‘yinda qochish masalasi echilishi uchun qochuvchining kechikkan boshqaruvi orqali aniqlangan etarli shartlarda o‘yinchilar orasidagi masofaning quyi chegarasi topilgan;
boshqaruv funksiyalari Langenhop tipidagi chegaralanishga ega bo‘lgan diskret o‘yinda quvish masalasining Π-strategiya yordamida topilgan echimi asosida o‘yinning 2D animatsion modeli ishlab chiqilgan.
  IV. Tadqiqot natijalarining joriy qilinishi. Boshqaruv funksiyalari turli chegaralanishli dinamik o‘yinlar va ularning animatsion modellari bo‘yicha olingan natijalar asosida:
boshqaruv funksiyalariga geometrik chegara qo‘yilgan ko‘p quvlovchilardan va bir qochuvchidan iborat diskret o‘yin masalasining animatsion modeli uchun yaratilgan kompyuter dasturidan FZ-201905171 raqamli “G‘ovak muhitlarda suyuqlik va gazlarni anomal filtrlash jarayonini tadqiq etish uchun gidrodinamik modellar va samarali algoritmlar yaratish” mavzusidagi amaliy loyihada suvli qatlamlar bilan chegaralangan gaz konlarini kompleks tadqiq qilishda flyuidlar filtratsiya jarayonining kompyuter modelini ishlab chiqishda foydalanilgan (O‘zbekiston Respublikasi Fanlar Akademiyasi V.I. Romanovskiy nomidagi Matematika institutining 2025-yil 25-iyundagi 2/272-sonli ma’lumotnomasi). Natijada, koordinatalar bo‘yicha ajralish va differensial haydash usullariga asoslangan g‘ovak muhitdagi filtratsiya masalalarini hal qilish va ularning sonli algoritmlarini yaratish imkonini bergan;
boshqaruv funksiyalari geometrik va Langenhop tipidagi chegaralanishli dinamik o‘yin masalalarini echishda optimal yaqinlashish strategiyalari (P-strategiyalar) asosida masalalar echimlarini kafolatlovchi shartlardan hamda masalalarni tutish jarayonini vizual tarzda ifodalovchi yaratilgan animatsion modellaridan OT-F4-33 raqamli “Differensial tenglamalar bilan tavsiflanuvchi ziddiyatli boshqaruv uchun yangi usullarni ishlab chiqish va ularning sonli tadbiqi” mavzusidagi fundamental loyihada boshqaruv funksiyalari turli chegaralanishli dinamik o‘yin masalalarini hal etishda foydalanilgan (O‘zbekiston Milliy universitetining 2025-yil 18-iyundagi 04/11-7621-sonli ma’lumotnomasi). Natijada, Langenhop va geometrik chegaralarga ega diskret tenglamalar bilan ifodalangan ziddiyatli holat jarayonlarini boshqarish masalalari uchun yangi usullarni ishlab chiqish, ularni sonli hal etish va natijalarni amaliy jihatdan to‘g‘riligini tasdiqlash imkonini bergan.