Хамитов Азизбек Ахмаджон ўғли
фалсафа доктори (PhD) диссертацияси ҳимояси ҳақида эълон

I. Умумий маълумотлар: 
Диссертация мавзуси, ихтисослик шифри (илмий даража бериладиган фан тармоғи номи): “Уч ўлчовли фазода учинчи тартибли каррали характеристикали тенглама учун чегаравий масалалар”, 01.01.02-Дифференциал тенгламалар ва математик физика (физика-математика фанлари).
Диссертация мавзуси рўйхатга олинган рақам: № В2024.3.PhD/FM1144
Илмий раҳбар: Апаков Юсупжон Пулатович, физика-математика фанлари доктори, профессор.
Диссертация бажарилган муассаса номи: Наманган давлат техника университети.
ИК фаолият кўрсатаётган муассаса номи, ИК рақами: Фарғона давлат университети, PhD.03/30.12.2019.FM.05.04.
Расмий оппонентлар: Ситник Сергей Михайлович, физика-математика фанлари доктори, профессор;  Ибайдуллаев Тўланбой Турсунбоевич, физика-математика фанлари номзоди, доцент.
Етакчи ташкилот: Урганч давлат университети.
Диссертация йўналиши: назарий аҳамиятга молик.
II. Тадқиқотнинг мақсади  уч ўлчовли фазода чегараланган ва ярим чегараланган соҳаларда учинчи тартибли каррали характеристикали тенгламалар учун чегаравий масалаларни қўйиш ва тадқиқ этишдир.
III. Тадқиқотнинг илмий янгилиги қуйидагилардан иборат:
чегараланган соҳада учинчи тартибли каррали характеристикали тенглама учун чегаравий масалалар ечимларининг мавжудлиги ва ягоналиги Фуре ва энергия интеграллари усуллари ёрдамида исботланган;
ярим чегараланган соҳаларда учинчи тартибли каррали характеристикали тенглама учун чегаравий масалаларнинг бир қийматли ечилиши ўзгарувчиларни ажратиш ҳамда энергия интеграллари усулларидан фойдаланиб исботланган;
Фуре усули ёрдамида ҳосил қилинган учинчи тартибли бир жинсли бўлмаган оддий дифференциал тенгламага қўйилган аралаш шартли чегаравий масала учун Грин функсияси қурилиб, унинг структураси ҳамда асосий хоссалари аниқланган;
учинчи тартибли каррали характеристикали бир жинсли бўлмаган дифференциал тенглама учун аралаш шартли чегаравий масалалар корректлиги Фуре, Грин функсиялар ва энергия интеграллари усулларидан фойдаланиб исботланган.
IV. Тадқиқот натижаларининг жорий қилиниши. Уч ўлчовли фазода чегараланган ва ярим чегараланган соҳаларда хусусий ҳосилали учинчи тартибли каррали характеристикали дифференциал тенгламалар уcнун чегаравий масалалар бўйича олинган илмий натижалар қуйидаги илмий-тадқиқот лойиҳаларида қўлланилди:
уч ўлчовли фазода учинчи тартибли каррали характеристикали бир жинсли бўлмаган тенглама учун чегаравий масалаларнинг ечимларини Грин функсияси ёрдамида қуришнинг янги усуллари бўйича олинган натижалар НИОКТР 122041800029-5 рақамли “Асосий ва аралаш типдаги тенгламалар учун чегаравий ва бошқарув масалалари ва уларни тақсимланган параметрларга эга системаларни ўрганишда қўлланилиши” номли хорижий лойиҳа бўйича илмий тадқиқот ишларида фойдаланилган (Россия Фанлар Академиясининг Кабардин-Балкар илмий маркази Амалий математика ва автоматлаштириш институтининг 2025-йил 15-апрелдаги № 01-13/47-сонли маʼлумотномаси). Натижада, юқори тартибли бир жинсли бўлмаган тенгламалар учун янги чегаравий масалаларни ечиш имконини берган;  
уч ўлчовли фазода чегараланган ва ярим чегараланган соҳаларда хусусий ҳосилали учинчи тартибли каррали характеристикали дифференциал тенгламалар учун янги чегаравий масалаларнинг ечимини қуриш усуллари бўйича олинган натижалар  374874-2022 рақамли “Фазали ўтиш масалалари ва критик ҳодисалари. Тенгламаларнинг математик жиҳатлари, тезкор ўтишлар ва асимптотика” номли хорижий лойиҳа бўйича илмий тадқиқот ишларида фойдаланилган (Қирғизистон Республикаси Ўш Давлат университетининг 2025-йил 17- апрелдаги №652-сонли маʼлумотномаси). Натижада, уч ўлчовли фазода чегараланган ва ярим чегараланган соҳаларда учинчи тартибли тенгламалар учун янги чегаравий масалаларнинг ошкор кўринишдаги ечимларини қуриш имконини берган.