Бекчанов Даврон Машариповичнинг

фалсафа доктори (PhD) диссертацияси ҳимояси ҳақида эълон

I. Умумий маълумотлар

Диссертация мавзуси, ихтисослик шифри (илмий даража бериладиган фан тармоғи номи): «Маҳаллий давлат ҳокимияти органлари томонидан тадбиркорлик фаолиятини ривожлантиришнинг ҳуқуқий асосларини такомиллаштириш (Ўзбекистон ва Япония мисолида)», 12.00.02–Конституциявий ҳуқуқ. Маъмурий ҳуқуқ. Молия ва божхона ҳуқуқи (юридик фанлар).

Диссертация мавзуси рўйхатга олинган рақам: В2017.1.PhD/Yu4.

Илмий раҳбар: Рузметов Хайрулло Ибодуллаевич, юридик фанлар доктори.

Диссертация бажарилган муассаса номи: Ўзбекистон Республикаси Президенти ҳузуридаги Давлат бошқаруви академияси.

ИК фаолият кўрсатаётган муассаса номи, ИК рақами: Ўзбекистон Республикаси Президенти ҳузуридаги Давлат бошқаруви академияси, DSc.27.06.2017.Yu.23.01.

Расмий оппонентлар: Исмаилова Гулноза Сайдиганиходжаевна, юридик фанлар доктори; Отахонов Фозилжон Хайдарович, юридик фанлар номзоди, доцент.

Етакчи ташкилот: Тошкент давлат юридик университети.

Диссертация йўналиши: назарий ва амалий аҳамиятга молик.

II. Тадқиқотнинг мақсади: маҳаллий давлат ҳокимияти органлари томонидан тадбиркорлик фаолиятини ривожлантиришнинг ҳуқуқий асосларини (Ўзбекистон ва Япония мисолида) такомиллаштириш юзасидан тавсия ва таклифлар ишлаб чиқишдан иборат.

III. Тадқиқотнинг илмий янгилиги:

чет эл инвестицияларини жалб қилишда маҳаллий давлат ҳокимияти органлари томонидан инвестиция дастурларини ишлаб чиқиш ва уни амалга оширишга техник ёрдам кўрсатишни ташкил қилиш таклифи асослаб берилган;

тадбиркорликни ривожлантириш борасида маҳаллий давлат ҳокимияти органларининг норма ижодкорлиги фаолияти ҳамда ҳуқуқни қўллаш амалиётидаги камчиликларни ўз вақтида бартараф қилиш мақсадида ҳудудий адлия органларига тегишли халқ депутатлари Кенгашларига бу ҳақда ахборот тақдим этиш мажбуриятини юклаш мақсадга мувофиқлиги исботланган;

бизнес лойиҳаларини пухта ишлаб чиқиш учун тадбиркорларни ҳудуддаги мавжуд меҳнат ресурслари тўғрисидаги маълумотлар ҳамда яқин келажакдаги прогнози билан таъминлаш мажбуриятини маҳаллий давлат ҳокимияти органлари зиммасига юклаш зарурати асослантирилган;

маҳаллий давлат ҳокимияти органлари томонидан жамоат бирлашмалари ўртасида ҳудудда тадбиркорликни ривожлантириш борасида энг яхши ғоя танловини ўтказишнинг жойларда ижтимоий шериклик механизмини такомиллаштиришдаги аҳамияти очиб берилган.

IV. Тадқиқот натижаларининг жорий қилиниши.

Маҳаллий давлат ҳокимияти органлари томонидан тадбиркорлик фаолиятини ривожлантиришнинг ҳуқуқий асосларини такомиллаштириш бўйича олинган илмий натижалар асосида:

чет эл инвестицияларини жалб қилишда маҳаллий давлат ҳокимияти органлари томонидан инвестиция дастурларини ишлаб чиқиш ва уни амалга оширишга техник ёрдам кўрсатишни ташкил қилиш таклифи Ўзбекистон Республикасини  1991 йил 14 июнда қабул қилинган «Ташқи иқтисодий фаолият тўғрисида»ги 285–XII-сонли Қонунининг 19-моддасини ишлаб чиқишда инобатга олинган (Ўзбекистон Республикаси Олий Мажлис Қонунчилик палатасининг 2019 йил 14 январдаги 04/1-06-7-сон маълумотномаси). Мазкур таклиф маҳаллий давлат ҳокимияти органлари томонидан ҳудуддаги тадбиркорлик тузилмаларига инвестицияларни жалб этиш учун техник ёрдам кўрсатишни самарали ташкил этишга хизмат қилган;

ҳудудий адлия органларининг ҳар ярим йиллик якунлари бўйича тегишинча халқ Кенгашларига жойлардаги норма ижодкорлиги фаолияти ҳамда ҳуқуқни қўллаш амалиётининг ҳолати тўғрисида ахборот тақдим этиш борасидаги таклиф Ўзбекистон Республикасининг 1993 йил 2 сентябрда қабул қилинган «Маҳаллий давлат ҳокимияти органлари тўғрисида»ги 913-XII-сонли Қонунининг 253-моддасини тайёрлашда инобатга олинган (Ўзбекистон Республикаси Олий Мажлис Қонунчилик палатасининг 2019 йил 16 январдаги 06/1-05/177-сон маълумотномаси). Мазкур таклиф маҳаллий давлат ҳокимияти органларининг тадбиркорликни ривожлантириш борасидаги норма ижодкорлиги фаолияти ҳамда ҳуқуқни қўллаш амалиётидаги камчиликларни ўз вақтида бартараф қилишга хизмат қилган;

меҳнат органлари томонидан тадбиркорларга меҳнат бозори ҳолати тўғрисида ахборот бериш бўйича бепул хизмат кўрсатиш тўғрисидаги таклиф 2018 йил 3 январь ЎРҚ-456-сонли Қонуннинг 3-моддаси билан берилган Ўзбекистон Республикасининг 1992 йил 13 январда қабул қилинган «Аҳолини иш билан таъминлаш тўғрисида»ги 510-XII-сонли Қонунининг 16-моддасининг янги таҳририни тайёрлашда фойдаланилган (Ўзбекистон Республикаси Олий Мажлис Қонунчилик палатасининг 2019 йил 15 январдаги 04/3-06-03-сон маълумотномаси). Ушбу норма тадбиркорлик тузилмаларига бизнес лойиҳаларини меҳнат ресурсларини инобатга олган ҳолда тайёрлашга хизмат қилган;

маҳаллий давлат ҳокимияти органлари томонидан жамоат бирлашмалари ўртасида ҳудудда тадбиркорликни ривожлантириш борасида энг яхши ғоя танловини ўтказишнинг ижтимоий шериклик механизмини такомиллаштиришдаги аҳамияти “Маҳаллий бошқарув” дарслиги мазмунига сингдирилган  (Ўзбекистон Республикаси Президенти ҳузуридаги Давлат бошқаруви академиясининг 2018 йил 3 июнь 11/1295/1-сон маълумотномаси). Давлат ҳокимияти ва бошқарув органлари раҳбар ҳодимларини тайёрлаш, қайта тайёрлаш ва малакасини оширишга хизмат қилган.