Мамлакатимизда барча соҳалар сингари таълим ва илм-фан тармоқларини сифат жиҳатдан янги босқичга олиб чиқиш йўналишида стратегик мақсадлар амалга оширилмоқда. Янги Ўзбекистонда Учинчи Ренессанс пойдеворини яратишдек улуғвор ғоянинг рўёбида ҳам айнан ёш авлод камолоти, илм-фан ривожи ҳамда устоз-муалимнинг педагогик фаолияти муҳим аҳамият касб этади. Зотан, Президентимиз Шавкат Мирзиёев таъкидлаганлиридек, “Абдулла Авлоний бобомизнинг доно фикрларини такрор ва такрор айтишга тўғри келади: таълим-тарбия – биз учун ҳаёт-мамот масаласидир. Қайси соҳани олмайлик, биз замонавий етук кадрларни тарбияламасдан туриб бирон-бир ўзгаришга, фаровон ҳаётга эриша олмаймиз”.
Жорий йилнинг 24 июн куни Олий аттестация комиссиясида педагогика ҳамда филология фанлари бўйича илмий даражалар берувчи илмий кенгашлар раҳбарияти билан ўтказилган йиғилишда мазкур фанлар йўналишида олиб борилаётган тадқиқотларнинг долзарб масалалари муҳокама этилгани шундан.
Йиғилишни “Ўзбекистон - 2030” стратегияси доирасида мамлакатимизда илм-фанни ривожлантириш, ёш олимларни қўллаб-қувватлаш, янги илмий тадқиқотларнинг амалий аҳамияти ва самарадорлигини янада оширишга муҳим аҳамият қаратилаётгани таъкидланди. Буни сўнгги йилларда давлатимиз раҳбари ташаббуси билан олиб борилаётган ислоҳотлар таркибида олий малакали илмий ва илмий-педагог кадрлар аттестацияси тизимининг сифати ва самарадорлигини ошириш борасидаги янгиликлар ва уларнинг натижалари мисолида ҳам кўриш мумкин. 

Албатта, интеллектуал салоҳиятли ёшлар камолоти узлуксиз таълим тизимининг барча босқичларида меҳнат қилаётган ўқитувчи-педагогларнинг билим ва маҳорати, илғор тажриба ва сўнгги илмий янгиликлардан нечоғлик бохабарлигига боғлиқ. Бунда уларга педагогика ва филология фанлари бўйича илмий тадқиқот олиб бораётган ёш тадқиқотчи ва етук олимларнинг бир неча йиллик илмий-амалий, тажрибавий, бир сўз билан айтганда, “Игна билан қудуқ қазишдек” машаққатли меҳнатга менгзаладиган илмий изланишлари меваси қувват манбаи, методик таъминот бўлади. 
Шунга кўра йиғилишда диссертация тадқиқотлари сифатини ошириш, илмий кенгашлар фаолиятини низомлар талаблари асосида ташкил этиш, коррупцион ҳолатларга йўл қўймаслик ва аттестация ҳужжатларини белгиланган талаблар асосида расмийлаштириш каби масалалар атрофлича муҳокама қилинди ва амалий тажрибалар асосида тегишли кўрсатмалар берилди.
Ўтказилган йиғилиш якунида мавзу доирасида йўлланган саволларга масъуллар томонидан атрофлича жавоблар берилди.  

ОАК Ахборот хизмати