Abdikadirov Sultanbay Mamutovichning
falsafa doktori (PhD) dissertatsiyasi himoyasi haqida e’lon

I. Umumiy ma’lumotlar.
Dissertatsiya mavzusi, ixtisoslik shifri: “Separat-garmonik va α-separat-garmonik funksiyalarni analitik davom ettirish”, 01.01.01-Matematik analiz (fizika-matematika fanlari).
Dissertatsiya mavzusi ro’yxatga olingan raqam: № B2024.1.PhD/FM1000.
Ilmiy rahbar: Imomkulov Sevdiyor Akramovich, fizika-matematika fanlari doktori.
Dissertatsiya bajarilgan muassasa nomi: Qoraqalpoq Davlat universiteti.
IK faoliyat ko’rsatayotgan muassasa nomi, IK raqami: Urganch davlat universiteti, PhD.03/30.12.2019.FM.55.01. 
Rasmiy opponentlar: Shoimqulov Bahodir Allaberdievich, fizika-matematika fanlari doktori, professor; Atamuratov Alimardon Abdirimovich, fizika-matematika fanlari nomzodi, katta ilmiy xodim.
Yetakchi tashkilot: Toshkent davlat pedagogika universiteti.
Dissertatsiya yo’nalishi: nazariy ahamiyatga molik.
II. Tadqiqotning maqsadi: Separat-garmonik va α-separat-garmonik funksiyalarni analitik davom ettirish masalasini o‘rganish, shuningdek, ushbu funksiyalarning bartaraf etiladigan maxsusliklarini tadqiq qilishdan iborat.
III. Tadqiqotning ilmiy yangiligi:
plyurisubgarmonik funksiyalar sinfining qismi bo‘lgan H sinf va 
h-plyuripolyar to‘plamlar yordamida o‘zgaruvchan garmoniklik radiusiga ega bo‘lgan separat-garmonik funksiyalar uchun Hartogs lemmasining analogi isbotlangan;
o‘zgaruvchan garmoniklik radiusiga ega bo‘lgan separat-garmonik funksiyalar uchun Hartogs lemmasidan foydalanib, ushbu lemmani tekisliklar dastasida garmoniklik shartlarini qanoatlantiruvchi separat-garmonik funksiyalar uchun umumlashtiruvchi teorema isbotlangan;
ikki marta uzlyuksiz differensiallanuvchi funksiyalar sinfida aniqlangan operatorlar yordamida α-separat-garmonik va α-separat-subgarmonik funksiyalarning ta’riflari kiritilgan;
α -separat-garmoniklik va α -separat-subgarmoniklik tushunchalari asosida α -separat-subgarmonik funksiyalarning α-subgarmonikligi haqidagi va α -separat-garmonik funksiyalarning α -garmonikligi haqidagi teorema isbotlangan;
golomorf funksiyalarga o‘tish va golomorf davom ettirish prinsiplaridan foydalanib, α  haqiqiy-analitik differensial biforma bo‘lganida, α -separat-garmonik funksiyalar uchun Lelon teoremasining analogi isbotlangan;
α-garmonik funksiyalarni golomorf davom ettirish va Sichak-Zaharyuta teoremasini qo‘llash orqali, α haqiqiy-analitik differensial forma bo‘lganida, α-separat-garmonik funksiyalarni tayinlangan yoʻnalish bo‘ylab analitik davom ettirish to‘gʻrisidagi teorema isbotlangan;
separat-analitik funksiyalarni analitik davom ettirish haqidagi teorema va P-o‘lchovning xususiyatlaridan foydalangan holda, separat-garmonik funksiyalar uchun Osgud-Braun tipidagi teoremalar isbotlangan;
α-separat-garmonik funksiyalar uchun Lelon teoremasining analogi va Puasson karrali integralining analogini qo‘llagan holda, α-separat-garmonik funksiyalar uchun Osgud-Braun teoremasining analogi isbotlangan.
IV. Tadqiqot natijalarining joriy qilinishi. Dissertatsiyada olingan natijalar quyidagi ilmiy-tadqiqot loyihalarida qo‘llanilgan:
separat-analitik funksiyalarni analitik davom ettirish haqidagi ilmiy natijalardan va separat-garmonik funksiyalar uchun Osgud-Braun tipidagi teoremalar RFTJning “Ko‘p o‘lchamli kompleks analaiz” mavzusidagi fundamental loyihasi doirasida separat-garmonik funksiyalarning bartaraf etiladigan maxsusliklarini o‘rganishda foydalanilgan (Sibir Federal universitetining 2024 yil 19 sentyabrdagi 475 sonli ma’lumotnomasi, Rossiya). Ilmiy natijalarning qo’llanilishi ko‘p o‘lchamli kompleks analizda α-separat-garmonik funksiyalarning maxsusliklari bilan bogʻliq masalalarni echish imkonini bergan;
o‘zgaruvchan garmoniklik radiusiga ega bo‘lgan separat-garmonik funksiyalar uchun Hartogs lemmasining analogi va ushbu lemmani tekisliklar dastasida garmoniklik shartlarini qanoatlantiruvchi separat-garmonik funksiyalar uchun umumlashtiruvchi ilmiy natijalar UT-OT-2020-1 raqamli “Monje-Amper tenglamasi va ekstremal plyurisubgarmonik funksiyalar” mavzusidagi fundamental loyihasi doirasida α-separat-garmonik funksiyalarni analitik davom ettirish va ularning bartaraf etiladigan maxsusliklarini o‘rganishga tadbiq etilgan (O’zbekiston Milliy universitetining 2024 yil 30 oktyabrdagi №04/11-9658 sonli ma’lumotnomasi). Ilmiy natijalarning qo’llanilishi haqiqiy va kompleks fazolarda golomorf, garmonik va subgarmonik funksiyalarning davom ettirish masalalarini tadqiq qilish imkonini bergan.