Ўзбекистон Республикаси Президенти Шавкат Мирзиёев томонидан 2025 йил 5 март куни Коррупцияга қарши курашиш бўйича миллий кенгаши йиғилишида берилган топшириқ ижросини таъминлаш юзасидан Олий аттестация комиссиясида Ўзбекистон Республикаси Бош прокуратураси билан ҳамкорликда йиғилиш ўтказилди. “Коррупциядан ҳоли” шиори остида ташкил этилган йиғилишда Ўзбекистон Республикаси Бош прокуратураси бошқарма бошлиғи ўринбосари Юсуфали Усмоналиевич Эшов, бошқарма катта прокурори Жахонгир Ходжакбарович Исмоилов ҳамда олий аттестация комиссияси жамоаси иштирок этди.
Йиғилишда демократик ислоҳотлар асосида мамлакатимиз тараққиёти, халқимиз фаровонлигининг ўсиб бораётгани, фуқароларимизнинг ҳақ-ҳуқуқлари таъминланиб, коррупциявий ҳолатларнинг барҳам топаётгани хусусида батафсил маълумотлар берилди. Шунингдек, давлатимиз раҳбари томонидан 2025 йил 5 март куни ўтказилган Коррупцияга қарши курашиш миллий кенгаши йиғилишида берилган топшириқлар ижросини таъминлаш мақсадида олий малакали илмий ва илмий–педагогик кадрларни тайёрлаш ҳамда уларни аттестациядан ўтказиш тизимини янада шаффоф, очиқ ва ҳар қандай коррупциявий хавф-хатарлардан ҳоли тизимга айлантириш борасида амалга оширилаётган чора-тадбирлар кенг муҳокама этилиб, навбатдаги вазифалар белгилаб олинди.
Маълумки, сўнгги йилларда ҳукуматимиз томонидан “Инсон қадри” тамойили асосида фуқаролар ҳақ-ҳуқуқларини таъминлаш, жамиятда очиқлик ва эркинликни кафолатлаш борасида халқаро ҳуқуқий меъёрларга жавоб берувчи комплекс тизимни яратиш, хусусан, коррупцияга қарши курашиш тизимида ҳам хавф-хатарларни барвақт аниқлаш ва уларнинг сабаб ва шарт-шароитларини бартараф этиш йўналишида кенг кўламли ишлар амалга оширилмоқда. Шунга кўра, олий малакали илмий ва илмий–педагогик кадрларни тайёрлаш ҳамда уларни аттестациядан ўтказиш тизимида ҳам профилактик чора-тадбирларни ташкил этиш, коррупцияга қарши курашиш соҳасидаги ҳужжатлар ижросини таъминлаш борасида фикр-мулоҳоза, таклиф ва тавсиялар берилди.
Йиғилиш сўнггида аттестация жараёнларини рақамлаштириш, тизимда очиқлик ва шаффофликни таъминлаш борасида амалга оширилаётган янгиликлар ишонч ва сифат кафолати бўлиши яна бир бор қайд этилди.
ОАК Ахборот хизмати
