Toshnazarova Lola Shuxratillaevnaning
falsafa doktori (PhD) dissertatsiyasi himoyasi haqida e’lon

I. Umumiy ma’lumotlar.
Dissertatsiya mavzusi, ixtisoslik shifri (ilmiy daraja beriladigan fan tarmog‘i nomi): «O‘zbekiston milliy sug‘urta bozorining samarali faoliyatini ta’minlash yo‘llari», 08.00.07 – Moliya, pul muomalasi va kredit (Iqtisodiyot fanlari).
Dissertatsiya mavzusi ro‘yxatga olingan raqam:B2024.2.PhD/Iqt4129
Ilmiy rahbar: Quldoshev Qamariddin Mansurovich, iqtisodiyot fanlari doktori, professor.
Dissertatsiya bajarilgan muassasa nomi: Toshkent davlat iqtisodiyot universiteti.
IK faoliyat ko‘rsatayotgan muassasa nomi, IK raqami: Toshkent davlat iqtisodiyot universiteti, DSc.03/10.12.2019.I.16.01.
Rasmiy opponentlar: Alimardonov Ilhom Muzrobshoxovich, iqtisodiyot fanlari doktori, professor; Hasanov Farrux Ravshanovich, iqtisodiyot fanlari bo‘yich falsafa doktori.
Yetakchi tashkilot: O‘zbekiston Respubliksi Bank-moliya akademiyasi.
Dissertatsiya yo‘nalishi: nazariy va amaliy ahamiyatga molik.
II. Tadqiqotning maqsadi: O‘zbekiston milliy sug‘urta bozorining samarali faoliyatini ta’minlashga qaratilgan ilmiy taklif va amaliy tavsiyalar ishlab chiqishdan iborat.
III. Tadqiqotning ilmiy yangiligi:
sug‘urta agentlari vositachiligida tuzilgan sug‘urta shartnomalari muddatining amal qilishi tugagunga qadar sug‘urta agenti va sug‘urtalanuvchi o‘rtasida aloqani ushlab turish tartibini qo‘llash asosida sug‘urta shartnomalarining zararlilik darajasini pasaytirish taklifi asoslangan;
mijozlarga keng qamrovli xizmatlarni taqdim etishga qaratilgan maxsus sug‘urta mahsuloti hisoblanuvchi ko‘p tarmoqli mul'tiassistans xizmatlarini tashkil etish orqali sug‘urta xizmatlarining sifati va operativligini ta’minlash asoslangan;
sug‘urta kompaniyalarining tashkilotchiligida telemedisinani (masofaviy tibbiy xizmat ko‘rsatish) mobil aloqalar vositasida ommaviylashtirish va mazkur xizmatlarni sug‘urta polislari bilan kafolatlash tizimini tatbiq etish orqali sug‘urta xizmatlarining qulayligi, tezkorligi va ommabopligini oshirish, tibbiy xizmatlar sohasiga keng qamrovli tarzda kirish, tibbiy ma’lumotlarning saqlanishini ta’minlash taklifi asoslangan;
 sug‘urtalovchilar bilan sug‘urtalanuvchilar o‘rtasida tuzilgan sug‘urta shartnomalarining amal qilishi davomida yuzaga kelgan nizolarni hal etishda hakamlik sudlari xizmatini tashkil etish asosida sug‘urta nizolarini hal qilish jarayonini soddalashtirish hamda mijozlar va sug‘urtachilarning manfaatdorligini oshirish taklif etilgan.
IV. Tadqiqot natijalarining joriy qilinishi.
O‘zbekiston sug‘urta bozorining samarali faoliyatini ta’minlash yo‘nalishida olingan ilmiy natijalar asosida:
sug‘urta agentlari tomonidan ular vositachiligida sug‘urtalanuvchilar bilan tuzilgan sug‘urta shartnomalarini ularning amal qilishi tugagunga qadar o‘z nazoratida ushlab turish bo‘yicha ishlab chiqilgan tizimni amaliyotga joriy etish taklifi “MY Insurance” sug‘urta kompaniyasi AJ tomonidan amaliyotga joriy etilgan (“MY Insurance” sug‘urta kompaniyasi AJning 2024-yil 23- fevraldagi ma’lumotnomasi). Mazkur taklifning amaliyotga joriy etilishi natijasida sug‘urta kompaniyasi tomonidan 2023-yil davomida tuzilgan sug‘urta shartnomalarining zararlilik darajasi 2022-yil davomida tuzilgan sug‘urta shartnomalarining zararlilik darajasiga nisbatan 10 foiz kamayishiga erishilib, 150 mln. so‘m hajmidagi sug‘urta qoplamalarini tejash imkoni yaratilgan;
telemedisinani (masofaviy tibbiy xizmat) mobil aloqalar vositasida sug‘urta kompaniyalarining tashkilotchiligida ommaviylashtirish va ushbu xizmatlarni sug‘urta polislari bilan kafolatlash tizimini amaliyotga tatbiq etish bo‘yicha ishlab chiqilgan taklif “MY Insurance” sug‘urta kompaniyasi AJ tomonidan amaliyotga joriy etilgan (“MY Insurance” sug‘urta kompaniyasi AJning 2024-yil 23-fevraldagi ma’lumotnomasi). Mazkur taklifning amaliyotga joriy etilishi natijasida mijozlarga keng qamrovli xizmatlarni taqdim etishga qaratilgan maxsus sug‘urta mahsuloti hisoblanuvchi ko‘p tarmoqli mul'tiassistans xizmatlarini tashkil etish orqali sug‘urta xizmatlarining sifati va operativligini ta’minlash imkoni yaratilgan;
sug‘urtalovchilar bilan sug‘urtalanuvchilar o‘rtasida tuzilgan sug‘urta shartnomalarining amal qilishi davomida yuzaga kelgan nizolarni hal etishda hakamlik sudlari xizmatidan foydalanish amaliyotini joriy etish to‘g‘risidagi taklif “HAMKOR SUG`URTA” sug‘urta kompaniyasi AJ tomonidan amaliyotga joriy etilgan (“HAMKOR SUG`URTA” sug‘urta kompaniyasi AJning 2024-yil 15-martdagi ma’lumotnomasi). Mazkur taklifning amaliyotga joriy etilishi natijasida kompaniyada yuzaga kelgan nizolarni hal etish operativligi oshgan va sud xarajatlari 50 foiz kamayishiga erishilgan;
sug‘urta xizmatlarini ko‘rsatishda sug‘urtalanuvchilarga qulayliklar yaratish bilan bog‘liq professional xizmatlarni kengaytirish, ushbu xizmatlarning sifati va samaradorligini ta’minlash maqsadida ko‘p tarmoqli mul'tiassistans xizmatlarini tashkil etish taklifi “HAMKOR SUG`URTA” sug‘urta kompaniyasi AJ tomonidan amaliyotga joriy etilgan (“HAMKOR SUG`URTA” sug‘urta kompaniyasi AJning 2024-yil 15-martdagi ma’lumotnomasi). Mazkur taklifning amaliyotga joriy etilishi natijasida 2022-yilga nisbatan 2023-yilda tuzilgan sug‘urta shartnomalari soni ko‘paygan va to‘plangan sug‘urta mukofotlari qiymati 2023-yilda 112 foizga oshgan.