Юсупов Сардорбек Баходировичнинг

фалсафа доктори (PhD) диссертацияси ҳимояси ҳақида эълон

I. Умумий маълумотлар.

Диссертация мавзуси, ихтисослик шифри (илмий даража бериладиган фан тармоғи номи): «Давлат органларининг юридик ва жисмоний шахс мурожаатлари билан ишлашнинг ташкилий-ҳуқуқий асосларини такомиллаштириш», 12.00.02–Конституциявий ҳуқуқ. Маъмурий ҳуқуқ. Молия ва божхона ҳуқуқи (юридик фанлар).

Диссертация мавзуси рўйхатга олинган рақам: В2017.3.PhD/Yu91.

Илмий раҳбар: Тультеев Ильяс Тавасович, юридик фанлар доктори, доцент.

Диссертация бажарилган муассаса номи: Тошкент давлат юридик университети.

ИК фаолият кўрсатаётган муассаса номи, ИК рақами: Ўзбекистон Республикаси Президенти ҳузуридаги Давлат бошқаруви академияси, DSc.27.06.2017.Yu.23.01.

Расмий оппонентлар: Хакимов Рахим Расулжонович, юридик фанлар доктори, доцент; Хаитов Хушвақт Сапарбаевич, юридик фанлар номзоди, доцент.

Етакчи ташкилот: Бердақ номидаги Қорақалпоқ давлат университети.

Диссертация йўналиши: назарий ва амалий аҳамиятга молик.

II. Тадқиқотнинг мақсади: Давлат органларининг юридик ва жисмоний шахс мурожаатлари билан ишлашнинг ташкилий-ҳуқуқий асосларини такомиллаштиришга қаратилган таклиф ҳамда тавсиялар ишлаб чиқишдан иборат.

III. Тадқиқотнинг илмий янгилиги:

Ўзбекистон Республикасининг  «Жисмоний ва юридик шахсларнинг мурожаатлари тўғрисида»ги қонунининг татбиқ  қилиш  соҳасини аниқлаштириш ҳамда давлат органларининг мурожаатлар билан ишлашда келиб тушаётган мурожаатларни айнан бир шахс тамонидан бир хил мазмундаги бир неча бор берилиши, реал вақт режимида видео алоқа воситалари орқали мурожаатларни қабул қилиш ва айнан бир мазмундаги мурожаатларни кўчирма нусхаларига ҳуқуқий баҳо бериш, аниқлаштириш мақсадида «такрорий мурожаат», «мурожаатнинг дубликати», «видеконференцалоқа» каби тушунчалар билан тўлдирилган;

мурожаатни кўриб чиқаётган давлат органи, агар такрорий мурожаатларда янги важлар ёки янгидан очилган ҳолатлар келтирилмаган бўлса, илгариги мурожаат материалларида эса текширувларнинг тўла-тўкис материаллари мавжуд бўлса, ва мурожаат қилувчига белгиланган тартибда жавоблар берилган бўлса, мурожаатни кўриб чиқишни тугатиш тўғрисидаги қарорни қабул қилиши зарурлиги асосланган;

мурожаатларни умумлаштириш ва таҳлил қилиш натижаларига кўра тузилган маълумотномалар (шарҳлар) тегишли давлат органларининг расмий веб-сайтларида эълон қилиниши зарурлиги асосланган;

«Ички ишлар органлари тўғрисида»ги қонуннинг татбиқ қилиш соҳасини аниқлаштириш ҳамда давлат органларининг жисмоний ва юридик шахс мурожаатлари билан ишлашда уларнинг ҳамкорлигини йўлга қўйиш ва ички ишлар органи ходими ўзига фуқаро мурожаат этган тақдирда, ўз лавозимини, унвонини, фамилиясини, исмини, отасининг исмини айтиши, уни диққат билан эшитиши шартлиги асосланган.

IV. Тадқиқот натижаларининг жорий қилиниши.

Давлат органларининг жисмоний ва юридик шахс мурожаатлари билан ишлашининг ташкилий-ҳуқуқий асосларини такомиллаштириш тадқиқоти бўйича олинган илмий натижалар асосида:

Ўзбекистон   Республикасининг  «Ички  ишлар  органлари  тўғрисида»  ги Ўзбекистон Республикаси Қонунининг 8-моддаси 8-қисми, 16-моддаси 1-қисми тўртинчи хатбошисини тайёрлашда  фойдаланилган  (Ўзбекистон  Республикаси  Олий Мажлиси Қонунчилик палатаси Мудофаа ва хавфсизлик масалалари қўмитасининг 2017 йил 26 январдаги 06/2-06/170вx-сон маълумотномаси). Ушбу таклифларни амалга оширилиши қонунни татбиқ қилиш соҳасини аниқлаштиришга, ички ишлар органларининг жисмоний ва юридик шахс мурожаатлари билан ишлаш соҳасидаги тизимли ҳамкорлигини амалга оширишга хизмат қилган;

фуқаролар ва уларнинг мурожаат қилиш ҳуқуқини таъминлашга оид нормаларни татбиқ қилиш ҳақидаги таклифлар «Ички ишлар органлари тўғрисида»ги Ўзбекистон Республикаси Қонуни 28-моддаси 4-қисмининг учинчи хатбошисини тайёрлашда фойдаланилган (Ўзбекистон Республикаси Олий Мажлиси Қонунчилик палатаси Мудофаа ва хавфсизлик масалалари қўмитасининг 2017 йил 26 январдаги 06/2-06/170вx-сон маълумотномаси). Мазкур таклифларнинг амалга оширилиши қонунчилигимизда ички ишлар органи ходимларини ўз хизмат вазифаларини амалга оширишда мурожаатлар билан тезкор ишлашнинг  халқаро стандартларга мослашувига хизмат қилган;

Ўзбекистон Республикасининг «Жисмоний ва юридик шахсларнинг мурожаатлари тўғрисида»ги Қонунининг татбиқ қилиш соҳасини аниқлаштириш, мурожаатларни кўриб чиқаётган давлат органлари жисмоний ва юридик шахсларнинг ҳуқуқлари, эркинликлари ҳамда қонуний манфаатлари, шунингдек жамият ва давлат манфаатларига зиён етишини келтириб чиқарувчи сабабларни аниқлаш ҳамда бартараф этишга оид нормаларни татбиқ қилиш ҳақидаги таклифлар «Жисмоний ва юридик шахсларнинг мурожаатлари тўғрисида»ги янги таҳрирда қабул қилинган Қонуннинг 1-моддаси 2–3-қисмлари, 3-моддаси 2-қисми, 5-моддаси 1-қисми, 21-моддаси 1-, 2–3-қисмлари, 28-моддаси 2–3-қисмлари, 29-моддаси 2–3-қисмлари, 30-моддаси 2-, 3–4-қисмлари, 35-моддаси 1-, 2–3-қисмларига ўзгартиш ва қўшимчалар киритилишида фойдаланилган (Ўзбекистон Республикаси Олий Мажлиси Қонунчилик палатасининг 2017 йил 26 октябрдаги 06/2-06/170вx-сон маълумотномаси). Ушбу таклифлар давлат органларининг жисмоний ва юридик шахслар мурожаатлари билан ишлашнинг ташкилий-ҳуқуқий асосларини такомиллаштириш билан боғлиқ жараёнларнинг батафсил тартиби ва муддатларининг мустаҳкамланишига хизмат қилган.