КОНСТИТУЦИЯ – ЭРКИН ВА ФАРОВОН ҲАЁТ ГАРОВИ!

Маълумки, Ўзбекистон Республикаси Конституциясининг янги таҳрири 2023 йил 1 майдан эътиборан кучга кирди. Бутун халқимизни Ватанимиз истиқболи ва ёш авлод иқболининг ёруғ бўлишига ҳисса қўшиш мақсадида бирлаштириб, умумхалқ реферундуми асосида қабул қилинган Ўзбекистон Республикасининг янги таҳрирдаги Конституцияси ҳақиқий маънода халқимиз иродасини ифода этиб, унинг манфаатларига хизмат қилмоқда.
 
Олий аттестация комиссиясида «Конституция – эркин ва фаровон ҳаёт гарови!» бош ғояси асосида Ўзбекистон Республикаси Жамоат хавфсизлиги университети билан ҳамкорликда ўтказилган маънавий-маърифий тадбир Ўзбекистон Республикаси Конституциянинг 32 йиллигига бағишланди.
Байрам тадбирида ҳуқуқий демократик ва адолатли жамият қуришда Бош Қомусимизнинг ўрни, Конституциянинг янги таҳририга киритилган концептуал янгиликлар ва уларнинг халқимиз манфаатлари ва Ватанимиз тараққиётини таъминлашдаги долзарб аҳамияти хусусида кенг қамровли маълумотлар берилди.
Ўзбекистон Республикаси Жамоат хавфсизлиги университети доценти, юридик фанлар доктори М.Махсадов, юридик фанлар бўйича (PhD) фалсафа докторлари А.Пайзиев ва Ф.Ризоевлар томонидан Конституцияда Ўзбекистон – суверен, демократик, ҳуқуқий ва ижтимоий давлат экани қатъий белгилаб қўйилгани, инсон ҳуқуқ ва эркинликлари қонунларимизнинг, ҳар бир вазирлик ва идора фаолиятининг мазмунига айланиши қатъий белгилаб қўйилгани ҳамда бу борада амалга оширилаётган ҳуқуқий чоралар тўғрисидаги маълумотлар анжуман иштирокчилари эътиборини тортди. Бинобарин, қонунлардаги зиддиятлар ва ноаниқликлар инсон фойдасига ҳал бўлиши шарт ва зарур. Бунга кўра, инсон ва давлат ўртасида муносабатларни тартибга солувчи қонунчиликдаги ноаниқликлар, турли тушунмовчиликлар бартараф этилди.

 
Айниқса, Конституцияда давлатнинг ўқитувчилар шаъни ва қадр-қимматини ҳимоя қилиш, уларнинг ижтимоий ва моддий фаровонлиги, касбий жиҳатдан ўсиши тўғрисида ғамхўрлик қилиш мажбурияти қайд этилгани ҳамда олий таълим ташкилотларига академик эркинлик, ўзини ўзи бошқариш, тадқиқотлар ўтказиш ва ўқитиш эркинлиги ҳуқуқи тақдим этиш борасидаги туб ислоҳотлари илм-фанимиз ривожи ва халқимиз фаровонлигида ўз самарасини кўрсатаётгани алоҳида таъкидланди.

Олий аттестация комиссиясида Ўзбекистон Республикаси Конституциянинг 32 йиллиги муносабати билан “Конституцияси бурчаги” ҳам ташкил этилиб, сўнгги йилларда иқтисодий, ижтимоий, таълим, илм-фан ва маданий-маънавий соҳаларда амалга оширилаётган кенг кўламли ислоҳотлар ва унинг самарасида эришилаётган натижаларни мустаҳкамлашда янги таҳрирдаги Конституциянинг ўрни ва роли хусусида кенг маълумотлар олиш имкони яратилгани аҳамиятидир.
Тадбир сўнгида иштирокчилар томонидан Бош Қомусимизнинг мазмун-моҳияти ва «Ўзбекистон – 2030» стратегиясининг асосий устувор йўналишлари доирасида берилган саволларига мутахассис-олимлар томонидан батафсил жавоблар берилди.

Ахборот хизмати